Македонија
Ја нападнал екссопругата со тупаници и ѝ се заканил дека ќе ја убие ако не се смират

Основното јавно обвинителство Скопје поведе постапка против 42-годишно лице за кое постои основано сомнение дека при вршење семејно насилство сторило продолжено кривично дело телесна повреда според член 130 став 2 во врска со став 1 и во врска со член 45 од Кривичниот законик.
На 10 јули, пред зграда на булеварот Јане Сандански, осомничениот кај поранешната сопруга ги враќал двете малолетни деца за кои имале спогодба за видување. Најпрвин инсистирал да се качи во станот и да разговараат, а кога оштетената не му дозволила, пред влезот им го попречил патот и почнал да ја удира со тупаници во пределот на главата, да ја стиска за вратот и рацете.
Повикот за помош на оштетената го слушнале тројца таксисти, кои го оттргнале осомничениот.
Нападнатата жена настанот го пријавила во полициска станица.
На 4 август осомничениот отишол на работното место кај оштетената и најпрвин вербално ја нападнал, упатувајќи и заканувачки и погрдни зборови. Кога заминал, продолжил да ѝ се заканува на телефон дека ако не согласи да се смират, ќе влезе во станот на нејзините родители и ќе ги убие сите.
Загрижена за безбедноста на нејзините деца и за родителите, оштетената настанот го пријавила во полициска станица.
Во попладневните часови осомничениот ја зел од градинка малолетната ќерка и се упатил кон станот на родителите на оштетената. Кога детето влегло во домот, таткото на оштетената го замолил осомничениот да си замине, но тој почнал агресивно да удира на влезната врата и да се обидува насилно да влезе.
Оштетената и татко ѝ се обидувале вратата да ја држат затворена, а од туркањето добиле телесни повреди – гребаници и расеченици. Кога успеале да ја заклучат вратата, осомничениот, занемарувајќи го фактот што повторно биле присутни малолетните деца, продолжил да им се заканува дека ќе ги убие и да се однесува агресивно. Оштетените повикале полиција, која го затекнала осомничениот пред станот и го привела.
Надлежниот јавен обвинител оцени дека постојат околности што укажуваат дека осомничениот би можел да се даде во бегство, па до Основниот кривичен суд Скопје достави предлог за определување мерка притвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Големи колони возила на Табановце, летните одмори го заглавија сообраќајот

Сообраќајот низ Македонија денеска се одвива непречено и без поголеми проблеми, но поради летните одмори забележана е зголемена фреквенција на возила на патиштата, информира Автомотосојузот на Македонија (АМСМ).
Најголем притисок се бележи на граничниот премин Табановце, каде времето на чекање за влез во државата изнесува околу 20 минути. На останатите гранични премини од македонска страна нема подолги задржувања ниту за влез ниту за излез од земјата.
АМСМ апелира возачите да бидат трпеливи и внимателни, особено поради зголемениот интензитет на сообраќај. Се препорачува прилагодена брзина, почитување на сообраќајната сигнализација и максимална претпазливост, особено на патиштата низ котлините, клисурите и речните долини каде постои опасност од одрони.
Посебно критични делници каде е неопходно дополнително внимание се: Катланово – Велес, Маврово – Дебар – Струга, Виница – Берово и Кочани – Делчево.
Македонија
Македонија ќе ја зафати невреме со пороен дожд, силен ветер и град

Македонија денеска ќе биде погодена од нестабилно време кое ќе донесе големи промени во текот на денот. Утринските часови ќе започнат со сончево време и умерена облачност, но попладне и во текот на ноќта под влијание на влажна и нестабилна воздушна маса ќе има врнежи, грмежи и локално невреме.
Според прогнозата, на поединечни места се очекуваат поинтензивни процеси – пороен дожд кој за кратко време може да надмине 20 литри на квадратен метар, проследен со силен ветер што ќе достигнува над 60 километри на час и појава на град. Минималните утрински температури ќе се движат меѓу 9 и 17 степени, додека дневните ќе достигнат од 24 до 35 Целзиусови.
Во Скопје попладне и во текот на ноќта ќе се развие нестабилност со пороен дожд и грмежи, а на одредени делови од котлината можно е и невреме. Ќе дува умерен до засилен југоисточен ветер. Температурата ќе се движи од 12 степени во најстудените делови од денот до максимални 36 степени.
Од Управата за хидрометеоролошки работи (УХМР) предупредуваат дека попладне, во текот на ноќта и во недела претпладне, ќе продолжи променливото и нестабилно време со врнежи и грмежи, на места со обилен дожд и појава на град. Од недела попладне се најавува стабилизација на времето со период на претежно сончеви и топли денови.
Македонија
На Табановце за излез од државата се чека по 20 минути

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 20 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.