Предметот ТНТ за рушењето на објектот „Космос“ е целосно застарен. Ова произлегува од толкувањето на одредбите на Кривичниот законик, односно правното мислење, кое го дал министерот за правда, Никола Тупанчески, во својство на правник и професор на Правниот факултет во Скопје. Според Тупанчески, кривично дело за кое се заканува казна затвор од над три години, целосно застарува по десет години. Тоа значи дека ако обвинителот ги гони ексминистерот и обвинет Миле Јанакиески и ексградоначалникот и обвинет Тони Трајковски заедно со административците за дела сторени во 2011 година, тие застаруваат во 2021 година. Во овој случај сите обвинети се гонат за злоупотреба на службената положба и овластувањето, каде што минималната казна е три години затвор.

„Ако станува збор за кривично дело за кое според законот може да се изрече казна затвор од над три години затвор, а делото е сторено во 2011 година, релативната застареност е пет години, а апсолутната е десет години. Симплифицирано, тоа значи дека за дела извршени во 2011 година, за кои може да се изрече казна затвор од над три години, според Кривичниот законик, апсолутната застареност е во 2021 година. Секое друго читање на законот и поврзување со стандардот – општ законски максимум би било погрешно и би значело повреда“, се вели, меѓу другото, во правното мислење на Тупанчески.

Обвинението против Јанакиески, Трајковски и административците е за дела за кои обвинителот Бурим Рустеми вели дека ги сториле во периодот на 2011 година, односно во осмиот месец од 2011 година го уривале „Космос“. Според тоа и правното мислење на Тупанчески, делата застареле пред осум месеци.

„А1он“ и претходно се има обраќано до Тупанчески дали издавал мислења за случаи што ги водеше СЈО, како и што содржат тие. Тој одбива да коментира зошто сега кон јавноста се обраќал од министерската функција.

„Со стапување на функцијата министер за правда работниот однос како редовен професор на Правниот факултет „Јустинијан Први“ Скопје му е во мирување.
Во својство на министер за правда министерот Тупанчески се произнесува со мислења само за предмети што се од делокругот на работата на Министерството за правда“, велат од Министерството.

Ова правно мислење е доставено и до судијата Огнен Ставрев, кој во текот на постапката одби да го изведе како доказ. На него повеќето од обвинетите се повикуваат и во текот на завршните зборови, со што бараат судот да донесе одбивателна пресуда. Правното мислење е издадено по барање на адвокатот Влатко Илиевски.