Македонија
Презентирани приоритетите на Белгиското претседателство

На настан организиран од страна на Европското движење во Република Северна Македонија, во просториите на Делегацијата на Европската Унија во Скопје, вчера беа презентирани приоритетите на Белгиското претседателство со Советот на Европската Унија.
Приоритетите беа презентирани и елаборирани од стана на Фредерик Мерис, амбасадор на Кралството Белгија во Република Северна Македонија, со седиште во Софија. Обраќања на настанот имаа и Дејвид Гир, амбасадор и шеф на Делегацијата на ЕУ во Република Северна Македонија; Арбер Адеми, претседател на Комисијата за европски прашања; Александар Николоски, претседател на Националниот совет за евроинтеграции и пратеничките Санела Шкријељ, Снежана Калеска-Ванчева и Гордана Сиљановска-Давкова.
Амбасадорот Мерис посочи дека Белгија е една од шесте земји основачи на Европската Унија, која од 1 јануари до 30 јуни 2024 година, по 13-ти пат, го презема ротирачкото претседавање со Советот на ЕУ. Белгиското претседателство ќе претседава под слоганот „Да се заштити, да се зајакне, да се подготви“.
Белгискиот амбасадор пред присутните ги образложи шесте тематски области на кои Претседателството ќе работи: Одбрана на владеење на правото, демократија и единство на ЕУ; Зајакнување на конкуретноста на ЕУ; Зелена и правична транзиција; Зајакнување на социјалната и здравствената агенда; Заштита на луѓето и границите; Промовирање на ЕУ како глобален фактор.
На крајот од своето излагање, тој истакна дека претседателството ќе го поддржи усвојувањето на Стратешката агенда 2024 – 2029 година и ќе отвори дебата и дискусија за иднината на ЕУ.
Амбасадорот Гир истакна дека за време на Белгиското претседателство, Европската Унија ја очекуваат избори за Европскиот парламент, а потоа избор на нова Европска комисија и нов претседател на Европскиот совет. Воедно, ЕУ треба да подготви реформи и зајакнување на своите темели во иднина.
Во однос на нашата држава, тој напомена дека секое одлагање на евроитегративниот пат има последици по земјата и по Регионот и посебно се ризикуваат досегашните достигнување на земјата во коишто меѓународната заедница инвестираше.
Претседателот на Комисијата за европски прашања, Арбер Адеми, истакна дека интеграцијата на Република Северна Македонија во Европската Унија е единствениот пат кој гарантира развој, просперитет и стабилност. Сега е моментот кога е потребно да се формираат проевропски сили за да не се дозволи отстапување од овој курс, преземајќи ја без одлагање одговорноста, сѐ со цел да не се пропушти нашата шанса и успешно да се заврши овој витален процес за идните генерации. Треба да се има предвид дека отворањето на кластери во преговорите со ЕУ е клучна точка пред нас, чија единствена задача е промени во Уставот, каде ќе се додадат повеќе народи, така што покрај бугарскиот народ, ќе бидат опфатени и хрватскиот, црногорскиот, словенечкиот, еврејскиот и египетскиот народ.
Во однос на реформите во сферата на правната држава, од 2017 година па досега, согласно Извештаите од Европската комисија, е забележан напредок. Во тој домен, тој напомена дека реформите во областите како владењето на правото, реформата во администрацијата и борбата против корупција, треба секогаш заеднички, со широк политички и општествен консензус, да се донесуваат. Законите во оваа сфера треба да бидат поддржани од сите значајни политички фактори, а во нивната изработка да бидат вклучени експертите и граѓанските организации, како и експерти од државите членки на Европската Унија.
Претседателот на Националниот совет за евроинтеграции, Александар Николоски, напомена дека државата е мала, а во исто време и комплексна. Поради тоа, во иднина треба голема улога да им се дава на политичките сили коишто не се во Владата и не се во мнозинството, особено за значајни сектори.
Во однос на владеење на правото, тој предложи примери коишто се индиректно поврзани со владеење на правото. Едниот е Антикорупциската комисија, а вториот е Комисијата за заштита од дискриминација. Двете комисии се бираат на начин со заеднички поделена улога и на власта и на опозицијата и граѓанското општество.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лабудовиќ и Котевски го промовираа проектот „Сјајна патека“ за осветлување на Водно

Кандидатот за градоначалник на општина Центар од редовите на Движењето ЗНАМ за наша Македонија, Мирослав Лабудовиќ, заедно со генералот Горанчо Котевски, носител на советничката листа за Град Скопје на Движењето, денес го промовираа проектот „Сјајна патека“ во Дебар Маало, иницијатива од младите активисти и љубители на Водно од Скопје.
„Водно не смее да згасне штом зајде сонцето. ‘Сјајна патека’ не е само инфраструктурен проект, туку визија за град што се грижи за младите, за спортистите, за семејствата, за секој граѓанин. Ова е проект со кој покажуваме дека знаеме да слушаме и знаеме да дејствуваме“, рече Лабудовиќ.
Тој посочи дека недостигот на осветление претставува сериозен урбан предизвик, кој директно влијае врз безбедноста, достапноста и квалитетот на јавниот простор.
„Луѓето го избегнуваат Водно во мрак. Тоа е изгубена можност за рекреација, за здрава навика, за споделено време со најблиските. Со овој проект сакаме да им го вратиме Водно на граѓаните, осветлено, безбедно и достапно“, рече тој.
Лабудовиќ појасни дека проектот предвидува инсталирање енергетски ефикасни, автоматизирани светилки, кои се приспособуваат на природната средина, без да ја нарушат екосистемската рамнотежа на парк-шумата.
На настанот генералот Котевски ја истакна важноста на проектот, како и неговата заложба за создавање безбедни и инспирирани простори за граѓаните, нагласувајќи дека овој проект е симбол на нов, поодговорен пристап кон урбаното планирање и практична грижа за јавниот интерес.
Македонија
Мицкоски: Нека ме наречат заостанат, но формирањето многудентно семејство е највисок патриотски чин

Премиерот, Христијан Мицкоски, упати порака до граѓаните дека формирањето семејство, формирањето многудентно семејство е највисок патриотски чин на еден народ за сопствената татковина.
„Секој оној кој што си игра играчки и кој што ова не го разбира, колку е ова озбилно, не и мисли добро на државата. Нека ме нарекуваат конзервативен, заостанат како сакаат нека ме нарекуваат, но ова мора биде прв приоритет на оваа Влада и на сите следни Влади, а тоа се многудентни семејства. Јас би сакал кон сите македонски граѓани да упатам јасна порака – формирањето семејство, формирањето многудентно семејство е највисок патриотски чин на еден народ за сопствената татковина. Без разлика на верската, на етничката припадност – многудетното семејство значи иднина“, рече Мицкоски.
Тој кажа дека според последниот попис во Македонија има над 1,8 милиони жители, но дека стравува дека за 20 години ќе бидеме држава под 1 милион жители.
„Имаме отприлика над 700 илјади редовно вработени и околу 350 илјади пензионери. Реално присутно население според сите проценки не надминува од 1,5 милиони. За 20 години се плашам дека ќе бидеме држава под 1 милион жители и тогаш ќе имаме на еден пензионер еден вработен“, изјави премиерот.
Според него, тоа значи колапс за пензискиот фонд, тоа значи колапс за здравствениот фонд.
Инаку, Мицкоски денеска ја промовира петгодишната програма која ќе ја спроведуваат Владата и УНФПА.
„Оваа програма не е само документ или формалност, туку е план за дејствување- визија и стратегија која ќе се реализира со конкретни активности, насочени кон иднината на нашата држава и нашите граѓани. Кога зборуваме за ресурси, често споменуваме рудни богатства, финансии, инфраструктура, енергенси, води или природни богатства. Сето тоа е значајно. Но, најважниот ресурс, ресурсот кој ги движи сите други, тоа е човечкиот капитал“, рече Мицкоски.
Тој кажа дека демографската рецесија не е нов феномен и дека таа трае повеќе од 70 години. Како што кажа Мицкоски, од 1950 година па до денес бројот на новородени деца постојано опаѓа.
„Во 1950 година во Македонија имало над 50.000 новородени бебиња. Во 2024 година имаме само околу 16.000 новородени бебиња. Овој пад има две главни причини: прво, иселувањето на младите луѓе и второ, намалениот наталитет и фертилитет. Владата е свесна за сериозноста на ова прашање и веќе работи на неколку линии. Создадовме највисок економски раст на Балканот- тоа значи нови работни места, поголеми плати и поголеми можности за младите. Инвестираме во иднината на семејствата: шест бесплатни обиди за ин витро оплодување, со забрзана процедура, сето тоа на товар на Фондот, зголемивме од три на шест. Бесплатни учебници за учениците- затоа што образованието е темел на демографскиот раст. Нови градинки во повеќе градови- за да им помогнеме на родителите. Поддршка за мајките, за децата и за семејствата, преку нови социјални и економски мерки“, рече Мицкоски и додаде дека овој проблем не е изолиран само кај нас и дека со него се соочува целата Европа и пошироко- Балканот, Европската Унија, САД, Канада, Австралија, Источна Азија. Она што е симптоматично е дека дури и најразвиените и најбогатите земји се најмногу погодени.
Македонија
Од утре дожд и снег на планините и на повисоките места

Од утре попладне до петок, под влијание на влажен бран, ќе има врнежи од дожд, локално пообилни, информира УХМР.
Вкупно од овој бран се очекува на повеќе места да наврнат над 30 литри на квадратен метар, а локално и над 50 литри.
Поради продор на постудена воздушна маса од север и засилен северен ветер, в четврток на повисоките планини врнежите ќе преминуваат во снег, а поради натамошно спуштање студен воздух, в петок ќе има услови да преминуваат во снег и на некои од повисоките места.
На повисоките планини ќе се формира снежна покривка. Температурата на воздухот значително ќе опадне.
Во Скопје од утре кон крајот на денот до петок времето ќе биде претежно облачно со врнежи од дожд, повремено побилни. Ќе дува умерен до засилен северен ветер, а температурата значително ќе опадне.

Извор: УХМР