Македонија
Претепаниот секретар на бугарскиот клуб „Цар Борис Трети“ од Охрид е пренесен на лекување во Софија

Христијан Пендиков – претепаниот секретар на бугарскиот клуб „Цар Борис Трети“ во Охрид, е пренесен во Бугарија со владиниот авион „Фалкон“, јавуваат бугарските медиуми. Двајца лекари и една медицинска сестра од Воената медицинска академија во Бугарија го придружувале повредениот. Неговата состојба според тамошните медиуми е сериозна и му претстои операција.
Медиумите известуваат дека нападот врз 21-годишниот Христијан Пендиков синоќа го извршиле три лица.
Според европратеникот Андреј Ковачев, тој бил претепан и нападнат затоа што е Бугарин. МНР и претседателот Румен Радев го осудија чинот на насилство и потсетија дека наведените амбиции на Република Северна Македонија за членство во Европската Унија се во спротивност со реалноста, стои во написите.
„Властите во Македонија треба да преземат многу решителни мерки за да се надмине оваа атмосфера на омраза, дискриминација и закани кон секој кој отворено го декларира својот бугарски идентитет и своето бугарско потекло“, рече Ковачев.
„Претседателот Румен Радев уште еднаш ќе го предочи на шефовите на држави и влади во Европската Унија, како и на европските институции и на Советот на Европа, прашањето за почитување на правата на Бугарите во Северна Македонија“, е наведено во соопштението од кабинетот на бугарскиот претседател, пренесуваат медиумите во Бугарија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Хеликоптер на МВР исфрли повеќе од 30 тони вода во реонот на Дојран

Денеска во попладневните часови хеликоптерот бел 412 беше повикан за гасење пожар во реонот на Дојран, соопшти МВР.
Притоа во 22 налети биле исфрлени преку 30 тони вода.
„Поради ноќните услови хеликоптерот се повлече во базата“, информираа од ова министерство.
Македонија
Морбидни обивнувања на Мицкоски и измислени приказни за пожарите, велат од СДСМ

Нема крај на морбидното однесување на ВМРО-ДПМНЕ и Христијан Мцикоски. Во услови на огнена стихија и прогласена вонредна состојба на територија на целата држава, партијата на власт наместо да бара решенија, бара изговори за катастрофата, реагираат од СДСМ.
„Минатата година со ВМРО-ДПМНЕ на власт изгореа помеѓу 10% и 15% од целокупната територија на земјата. И тогаш наместо одговорност, Мицкоски бараше виновници додека ветуваше дека ЌЕ биде подобро следната година.
Точно една година подоцна, во моментов гори тоа што остана од шумите и зелените површини низ земјава да догори.
Нема нова опрема – промовираа стари реновирани хермелини и БТР кои ги нема никаде на терен бидејќи веќе се во сервис.
Нема нови авиони, поточно, воопшто нема авиони.
Нема пилоти, иако ветуваа дека за една година ќе обучат и вработат доволно нови пилоти.
Нема нови пожарникари, а сега за 24.000 денари бараат привремени пожарникари кои би требало за минимална плата да го ризикуваат сопствениот живот. Цела година немаат абер да почнат да работат“.
Населението, додаваат од опозициската партија, само се спасува, кравите бегаат и не ја пасат тревата, пожарите беснеат, само Мицкоски не е крив.
„Мицкоски е одлепен од реалноста. Веќе има една жртва од пожарите, а наместо збор на утеха или превземање на мерки, Мицкоски повторно забегува во некрофилска реторика и бара виновници, бркајќи духови“, оценуваат од СДСМ.
Македонија
Во државата се регистрирани 23 пожари, 11 се активни, еден е под контрола, соопшти ЦУК

Центарот за управување со кризи соопшти дека до 19 часот на територија на државата регистрирани се вкупно 23 пожари на отворен простор од кои 11 се активни, а еден е под контрола.
До 19.00 часот регистрирани се вкупно 23 пожари на отворен простор, од кои 11 се активни, 2 се локализирани, 9 се изгаснати и 1 е под контрола.
Според ЦУК активни пожари има во Прилепско с. Бешиште (мешана шума), Македонски Брод – помеѓу с. Црешнево, с. Локвица и с. Слатина (дабова шума и грмушки), Македонски Брод – с. Самоков (лесно запалив материјал), Дебарца-Струга – с. Волино кон с. Ливада, Охрид (ниска вегетација и жито),
Чашка – под Солунска глава, меѓу Изворите на Бабуна и Бабина Дупка (чад во карпест терен),
Чучер Сандево – помеѓу с. Блаце и с. Чучер (мешана шума и ниска вегетација), Чучер Сандево – Кучевишка бара (ниска вегетација), Бутел – с. Лубанци (ниска вегетација), Дојран – с. Николич (нискостеблеста шума), Кавадарци – с. Крушевица (ниска вегетација), Гостивар – автопат Гостивар-Тетово (ниска вегетација).
ЦУК информира и за локализирани пожари: Делчево – градска депонија, Желино – с. Ларце (ниска вегетација и грмушки).
„Под контрола е пожарот во Штип – с. Врсаково (жито).
Изгаснати се пожарите во Чучер Сандево – црква Св. Недела (ниска вегетација), Шуто Оризари – Њу Стар Хотел (депонија), Гази Баба – парк-шума „Гази Баба“ (ниска вегетација),Бутел – с. Лубанци (ниска вегетација), Пробиштип – с. Петршино (ниска вегетација и стрниште), Бутел – с. Визбегово (ѓубре), Велес – поранешна фабрика Порцеланка (ниска вегетација), Росоман – с. Сирково (ниска вегетација), Липково – с. Никуштак (ниска вегетација)“, соопшти ЦУК.