Македонија
Претседателот Иванов во посета на јужната граница

Претседателот на Република Македонија и врховен командант на вооружените сили, Ѓорге Иванов, денеска беше во посета на јужната граница на Република Македонија за да се информира за тековните состојби и активностите што се преземаат од страна на Армијата на Република Македонија, Агенцијата за разузнавање, ЦУК, граничната полиција и контингентот на странските полициски сили, како субјекти вклучени во соочувањето со нелегалната миграција.
Иванов изврши обиколка на караулата Богородица и привремениот транзитен центар во близина на Гевгелија, на капацитетот за сместување на припадниците на АРМ во Богданци, како и на караулата Езеро во Дојран, соопштија од Кабинетот на претседателот.
За време на посетатa на караулата Богородица, Иванов изврши увид во моменталната состојба на македонско-грчката граница, а од страна на припадниците на АРМ беше информиран за обидите за нелегално минување на државната граница во изминатиот период, како и за тактичките мерки и активности што се применуваат во спречувањето нелегални минувања на јужната граница, се наведува во соопштението.
Од страна на надлежните институции, додаваат во соопштението, било посочено дека во изминатите 3 месеци е спречен обид на околу 3.300 илегални преминувања на јужната граница од мигранти, кои во најголем број доаѓаат од Блискиот Исток.
Претседателот Иванов го посети и привремениот транзитен центар во Гевгелија, каде што беше информиран за работата на хуманитарните организации, од страна на ангажираните во Црвениот крст, Меѓународната организација за миграција, Агенцијата за бегалци при ОН, кои се распоредени таму, и притоа изрази поддршка за нивниот континуиран придонес и ангажман.
Македонскиот претседател, како што се посочува во соопштенеито, разговарал и со мигранти кои во моментот престојуваат во транзитниот центар и се информирал за условите и третманот што тие го добиваат за време на нивниот престој во центарот. Воедно, претседателот Иванов се сретна и со полициските припадници на странски држави што се распоредени во контролирањето на теренот на јужната граница, во поддршка на македонските безбедносни сили.
Во рамките на обиколката на јужната граница, македонскиот претседател ги посети и објектот за сместување на припадниците на АРМ во Богданци и караулата Езеро во Дојран. При тоа беше информиран за моменталните состојби, предизвиците и начинот на ангажирање на припадниците, во однос на справување со обидите за илегални преминувања на тој дел од нашата јужна граница, како и за условите за сместување и работа на припадниците на Армијата на Република Македонија, стои во соопштението испратено од Кабинетот на претседателот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Континуиран раст на наплатата на приходи од Царинската управа, во септември наплатени над 179 милиони евра

Во септември, Царинската управа наплати приходи од 179,5 милиони евра, што претставува раст од 7,5 проценти или зголемување од 12,5 милиони евра во однос на истиот месец минатата година.
Притоа, најголем процентуален раст од 13,4 проценти е остварен во наплатата на приходи од царина. Наплатата на приходи од ДДВ бележи раст од 8,7 проценти, од ДМВ за 6,9 проценти, додека од акциза за 3,7 проценти.
„Создадовме систем што континуирано генерира високи приходи во Буџетот и овозможува повеќе средства за капитални проекти кои ќе генерираат одржлив економски раст. Во јули, наплатата на приходите беше зголемена за 10,5 милиони евра, во август за 14,5 милиони евра, а во септември за 12,5 милиони евра“, вели директорот на Царинска управа, Бобан Николовски.
Кумулативно од почетокот на годината Царинската управа наплати приходи од 1,58 милијарди евра, што е за 78 милиони евра повеќе од лани истиот период.
Македонија
Шукова од Аеродром им го вети на скопјани она што премиерот Мицкоски го најави минатата недела: бесплатни филтри на оџаците се добра и сериозна мерка

Кандидатката за градоначалничка на Скопје од СДСМ, Каја Шукова, денес, од Аеродром, на скопјани им вети бесплатни филтри за оџаците на домаќинствата што не се греат на градското парно. Рече дека тоа е добра и сериозна мерка, за која, пак, минатата недела зборуваше и премиерот Христијан Мицкоски. Тој најави дека сака со бесплатни филтри за оџаците на домаќинствата да ги пресретне активистите, кои, кога ќе почне грејната сезона и загадувањето, ќе бараат мерки за почист воздух. Шукова, која е поранешна министерка за животна средина, рече дека половина од загадувањето во Скопје доаѓа од домаќинствата.
„Сметам дека треба да почнеме сериозна работа со домаќинствата. Според сите анализи, 50 отсто од загадувањето во Скопје доаѓа од домаќинствата и мора да им се помогне. Предвидовме неколку мерки во програмата, за тоа ќе говорам наредните денови. Предвидовме бесплатни филтри за оџаците на домаќинствата. Ова е пракса што е спроведена во многу европски градови и покажува резултати. Секоја година по пет до десет илјади домаќинства, односно на нивните оџаци, од каде што излегуваат голем дел од ПМ-честичките, да се постават филтри што ќе ги задржуваат честичките. Мислам дека тоа е добра и сериозна мерка, која ќе го намали загадувањето на Скопје“, најави Шукова.
И премиерот Мицкоски мината недела најави субвенции за иста бројка домаќинства, од пет до десет илјади, за набавка на филтри за оџаците. За да почне субвенционирањето уште оваа сезона, премиерот Мицкоски рече дека треба да се провери што дозволува законот, со оглед на изборите што се поклопуваат со почетокот на грејната сезона.
Шукова денес од Аеродром најави и 15 нови паркови за 15 месеци, со кои ќе формира зелен појас околу Скопје, кој очекува да влијае и на намалувањето за загадувањето, најави и крематориум за домашни миленици, поголема грижа за уличните кучиња и зајакнат мониторинг на загадувачите од општинските инспектори.
Македонија
Систем за влез/излез од ЕУ: За што сè треба да се подготват патниците

Министерството за внатрешни работи ја информира јавноста дека почнувајќи од 12 октомври 2025 година, Европската Унија ќе започне со постепено воведување на Системот за влез/излез (EES), кој ќе биде целосно имплементиран до април 2026 година.
Овој нов дигитален систем претставува една од најзначајните реформи во областа на граничното управување на ЕУ, заменувајќи го досегашното ставање печати во пасошите со електронска евиденција на биометриски податоци (фотографија и отпечатоци од прсти), како и точни записи за датумите на влез и излез.
За кого важи системот?
EES се однесува на сите државјани од земји кои не се членки на Европската Унија или Шенген зоната и кои патуваат за краток престој (до 90 дена во рамки на 180 дена). Тоа ги опфаќа:
- патниците кои се ослободени од виза за влез во ЕУ,
- патниците кои поседуваат виза за краток престој.
Граѓаните на земјите-членки на ЕУ и на Шенген зоната не подлежат на новиот систем.
Земји каде ќе се применува EES
Системот ќе биде активен на сите надворешни гранични премини на 29 земји, меѓу кои се: Грција, Бугарија, Австрија, Германија, Франција, Италија, Шпанија, Шведска, како и Исланд, Норвешка, Швајцарија и Лихтенштајн.
Кои се целите на воведувањето?
Со EES, Европската Унија има за цел:
- да ја зголеми безбедноста на граѓаните, преку подобро откривање на фалсификувани документи и идентитетски измами,
- да ја подобри борбата против криминалот, тероризмот и нелегалната миграција,
- да го олесни патувањето преку побрзи и поефикасни гранични проверки,
- да обезбеди прецизна дигитална евиденција за времетраењето на престојот, елиминирајќи можни недоразбирања кои порано настануваа со рачните печати.
Како ќе функционира системот?
При првото патување по воведувањето на системот, патниците ќе поминат низ целосен процес на регистрација кој вклучува фотографирање, скенирање на отпечатоци од прсти и внесување на податоци од пасошот. За да се олесни процедурата, на граничните премини ќе има и пунктови за самопослужување, а можно е и претходно предрегистрирање преку мобилни апликации.
При следните патувања, контролата ќе биде значително побрза бидејќи податоците веќе ќе бидат складирани во системот и ќе се врши само нивна проверка.
Период на транзиција
Во периодот од октомври 2025 до април 2026 системот ќе се воведува по фази. Тоа значи дека дел од патниците сè уште ќе добиваат печат во пасошите, додека постепено сите гранични премини не преминат на целосна дигитална евиденција. Од 10 април 2026 година, печатите во пасошите целосно ќе бидат заменети со електронски записи.
Заштита на личните податоци
Сите податоци ќе се обработуваат и чуваат согласно строгите стандарди на Европската Унија и Општата регулатива за заштита на податоци (GDPR). Со тоа се гарантира целосна заштита на приватноста и транспарентна употреба на собраните информации.
Апел до граѓаните
Министерството за внатрешни работи апелира до сите граѓани на Република Северна Македонија кои планираат патувања во земјите на Шенген зоната да се информираат за новите правила и постапки, со цел нивните патувања да бидат навремени, безбедни и без непотребни доцнења.