Македонија
СДСМ во Ваташа: Жртвите на нашите предци од НОБ не’ обврзуваат да ја обезбедиме иднината во Европа
Во Тиквешијата, рамо до рамо со граѓаните попладнево беа генералниот секретар на СДСМ, Миле Зечевиќ Вардарски и претседателот на партиската комисија за транспорт и врски, Митко Трајчулески, во рамки на теренските активности на партијата „Рамо до рамо, до победа“.
„Граѓаните на Тиквешијата, Ваташа, Кавадарци, многу добро знаат дека СДСМ секогаш е на вистинската страна на историјата, а како наследници на партизаните од НОБ врз кои почива македонската држава и во минатото и денеска тоа на дело го покажала. Многу жртви се дале за се она што сме денеска. Споменот на тие жртви не обврзува сите нас да ја обезбедиме македонската иднина во Европа, да бидеме рамноправни на европската маса и да создадеме општество на сигурност, безбедност и благосостојба, за никогаш повеќе да не се повторат нови негирања, ниту пак нови жртви“, порача генералниот секретар Зечевиќ на масовна маалска средба со граѓаните на Ваташа.
Зечевиќ потенцираше дека секогаш левата политичка опција во земјава била на вистинската страна на историјата и на македонската држава, правејќи дистинкција со деструктивното однесување на десната политичка опција.
„Мораме да зборуваме за гласот на вистината да се слушне, да знаеме кои сме ние а кои беа они. Ѕвездата што ја носиме ни е таква каква што е, таа не е само денеска, таква била и во минатото и таква била низ историјата на македонскиот народ, секогаш левата опција била постојано на браникот на Македонија и на македонизмот. Ги гледам организациите коишто ги прави опозицијата, на сметка на Ваташа, на сметка на историјата што ја имаме, ние јасно знаеме кои сме ние а кои се они. Затоа сме тука со вас, говориме и ќе говориме за да направиме јасна дистинкција, кои сме ние а кои се они. Немојте да го заборавите тоа никогаш. Па зарем тие што го лустрираа Славко Јаневски да ни кажуваат дека се големи патриоти? Коишто Блаже Коневски го нарекуваа џуџето од Небрегово? Тие да дозволиме да ни држат денеска предавања за македонската историја и за учество на македонските социјалдемократи во неа?“, додаде Зечевиќ.
Генералниот секретар потенцираше дека сега земјата има историска шанса да стане рамноправен партнер на европската маса и повика на заедничка политичка борба да станеме дел од Европа.
„Стремежот на сите оние генерации пред нас не бил да бидат плен на масата туку да бидат рамноправен партнер. Денеска имаме шанса да бидеме рамноправен партнер на европската маса. Имаме признаен, потврден, македонски литературен јазик. Мора да се бориме како народ, сите заедно, да опстоиме за нашата конечна кауза а тоа е да бидеме дел од Европа. Не Европа во формално правна смисла, суштински, да донесеме вредности за квалитетен живот каков што го имаат европјаните. На народот, на граѓаните им треба и мир и стабилност, им треба и соживот, иднина. Мора да останеме заедно, на патот којшто не чека, да остане сложни“, рече генералниот секретар на СДСМ, Миле Зечевиќ Вардарски вечерва во Ваташа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Охрид најкритично во Далјан, се излеа и Кочанска река – извештај за состојбата по обилните дождови
Обилните врнежи на дожд предизвикаа зголемен водостој на реките и локални излевања во повеќе делови од државата, информира Центарот за управување со кризи (ЦУК), според состојбата до 18:00 часот.
Во Штипско–Кочанскиот регион е регистрирано локално излевање на Кочанска река кај селото Горни Подлог, каде што интервенира КЈП „Водовод“ Кочани со механизација. Оризарска река има излевање кај селото Грдовци, а на терен интервенира Водостопанство „Брегалница“, додека полицијата од Кочани го обезбедува подрачјето и го регулира сообраќајот. Зрновска река се излева пред вливот во Брегалница, а состојбата ја следи Регионалниот центар за управување со кризи. Злетовска река и Брегалница имаат зголемен водостој, но без излевање. На патниот правец Македонска Каменица – рудник Саса се интервенира поради одрон.
Во Охрид, најкритична е состојбата во населбата Далјан по излевање на реката Далја. ЈП „Водовод“, „Нискоградба“ и „Комуналец“ интервенираат со механизација, додека Територијалната противпожарна единица и Дирекцијата за заштита и спасување со пумпи вршат испумпување на водата од поплавените објекти. Регионалниот центар за управување со кризи Охрид ги координира пријавите преку бројот 112. Кај Коселска река, во правец на селата Ливоишта и Вапила, се преземаат мерки за заштита на патниот правец.
Во Кичево, поради претходните врнежи, дел од површините се заезерени, а состојбата со поплавените објекти на улицата „Прилепска“ е непроменета. ТППЕ, ДЗС и ЈП „Комуналец“ вршат испумпување и обезбедување на теренот, додека Општина Кичево и Црвениот крст се грижат за евакуираните лица.
Во Битолскиот регион, во Општина Битола се вршат теренски контроли од страна на РЦУК и општинските служби. ЈКП „Комуналец“ интервенира во населбата Стрчин, „Македонија пат“ расчистува на регионалниот пат Р-2333, а Водостопанство ја следи состојбата на реките Шемница и Црна. Во Ресен и Демир Хисар се врши испумпување и заштита на загрозените површини.
Во Куманово, Липково и Крива Паланка состојбата се следи од РЦУК, општините и Водостопанство, а „Македонија пат“ и комуналните претпријатија вршат превентивно расчистување и посолување на ризични патни делници.
Во Тетово се интервенира со механизација на патиштата кон селото Ѓермо и месноста Бањиче. Во Мала Речица полицијата и инспекциските служби постапуваат по уривање на потпорен ѕид, а во Желино се интервенира по излевање кај реките Стримница и Палатица. На Попова Шапка, по координација со РЦУК Тетово, патот се расчистува со механизација. Во Гостивар, ЈП „Комуналец“ и Водостопанство преземаат мерки по пријавени излевања.
Македонија
ЗНАМ: Одбивањето лидерска средба е признание за политичка слабост
Движење ЗНАМ за Наша Македонија ја поздрави иницијативата на претседателот на Владата за одржување лидерска средба, оценувајќи ја како одговорен и државнички чекор насочен кон стабилност, дијалог и политичка зрелост во, како што наведуваат, клучен момент за државата.
Од ЗНАМ реагираат дека денешната прес-конференција на претседателот на СДСМ, Филипче, покажала отсуство на капацитет и волја за конструктивен политички дијалог, при што, според нив, наместо аргументи се нудат поделби, навреди и неосновани обвинувања.
„Кога се нема аргументи и резултати, се посегнува по стари сценарија – плашење на јавноста, теории на заговор и етикетирање на политичките противници“, се наведува во реакцијата, додавајќи дека, наместо соочување со сопственото минато, СДСМ повторно бега од разговор и се крие зад техничката влада.
Од Движење ЗНАМ за Наша Македонија нагласуваат дека се залагаат за целосно и непречено функционирање на институциите, одговорно носење одлуки и изнаоѓање конкретни решенија во интерес на граѓаните и државата. Според нив, на Македонија ѝ е потребна политичка храброст и зрелост, а не блокади, уцени и калкулации.
Во соопштението се посочува дека иницијативата за лидерска средба претставува можност релевантните политички чинители да покажат одговорност кон државата и граѓаните, при што одбивањето на дијалог, како што наведуваат, е признание за слабост.
ЗНАМ порачува дека останува определено за транспарентност, почитување на демократските процеси и враќање на довербата во институциите, како предуслови за стабилна држава и јасен, одговорен пат на Македонија кон полноправно членство во Европската Унија.
Македонија
Променливо облачно утре, дожд и снег најавени за северозападните делови
Времето утре ќе биде променливо облачно со сончеви периоди. Кон крајот на денот и во текот на ноќта, во северозападните делови од земјата ќе има повремени врнежи од дожд, додека на планините се очекува снег. Ќе дува слаб до умерен ветер од јужен правец. Минималните температури ќе се движат од -9 до -2 степени, а максималните од 3 до 9 степени.
Во Скопје се очекува променливо облачно време со сончеви периоди и слаб променлив ветер. Утринската температура ќе се спушти до -6 степени, а дневната ќе достигне околу 4 степени.
Во наредните денови следува нестабилен период. Во сабота ќе има локални врнежи, на планините и повисоките места од снег, а во пониските предели од дожд и снег. Врнежите ќе бидат пообилни во западните делови, каде што се очекува и дополнително зголемување на снежната покривка.
Во недела и понеделник ќе дува умерен до засилен северен ветер со брзина над 60 километри на час, а ќе има и повремени локални врнежи од снег. Температурите ќе бидат во опаѓање, при што на одредени места дневните температури ќе останат под нула степени.
Од вторник се најавува период на стабилно и суво време.

