Македонија
Притвор за копачот кој сакаше да прави див паркинг, за соучесникот поблага казна

Јавен обвинител синоќа до Основниот кривичен суд Скопје достави предлог за определување мерка притвор за две лица против кои е поведена постапка за кривично дело, узурпација на недвижности.
Судијата на претходна постапка разгледувајќи ги околностите за првоосомничениот, кој го узурпирал земјиштето определи мерка притвор во траење од 8 дена, додека за вториот осомничен, возач на багерот определени се мерки на претпазливост.
„Осомничените, на возраст од 45 и 42 години, на особено дрзок начин, со багер урнале дел од оградата на поликлиниката „Бит Пазар“ и започнале да го рамнат и тампонираат земјиштето во близина на здравствената установа кое не било во нивна сопственост, со намера да го претворат во паркинг, иако за тоа немале соодветна дозвола од општината. Надлежниот јавен обвинител предложи мерка притвор оценувајќи дека во конкретниот случај постои опасност осомничените да го повторат делото, бидејќи кривично-правните дејствија ги презеле преку исклучителен волунтаризам и самоволие, со нарушување на имотот на објект кој е во општа употреба. Двајцата манифестирале огромна упорност за реализирање на својот потфат и за само два часа успеале да ја урнат оградата и бетонските столбови со цел да овозможат пристап на градежна механизација на локацијата, започнале да носат камиони со тампон и истуриле огромно количество песок за да го тампонираат просторот. Во ноќни услови, на особено фреквентно место од градот, со своите ископувања стигнале до самите ѕидови на болницата, при што го загрозиле пристапот до болницата и спроводот на пациентите во итни случаи“, соопштија од ОЈО Скопје.
Според обвинителството, намерата на осомничените била во најкраток можен период за време на викендот да го заокружат криминалниот потфат со ставање сопствена рампа со која во иднина би го узурпирале просторот и би профитирале од наплата на паркинг без дозвола. Ова за обвинителството укажува дека тенденцијата на осомничените била и понатаму да се занимаваат со казниви дејствија што го оправдува стравот дека постои опасност тие да го повторат кривичното дело.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Четири дена молк од Владата за екоцидот на Крива Река

„Четири дена поминаа од еколошката хаварија во Крива Река – а Владата, Министерството за животна средина и надлежните институции сѐ уште не даваат одговори. Нема информации што ќе се преземе, нема најави за нови анализи, нема план за заштита на здравјето на граѓаните. Дали здравјето на граѓаните е воопшто приоритет за оваа власт? Срамно и неодговорно однесување на ВМРО-ДПМНЕ и институциите кои ги водат.
СДСМ прашува: Зошто Владата молчи четири дена откако се потврдија сомнежите дека во Крива Рекла тече вода со цијанид и тешки метали? Кој го донесе политички мотивираното тврдење дека “се излеала само вода”, без ниту една анализа? Дали здравјето на граѓаните е помалку важно од заштитата на интересите на фирма блиска до ВМРО-ДПМНЕ?
„Фактите се јасни. На 14 март, во реката Крива се излеа огромна количина загадена маса од рудникот Тораница. Независната лабораториска анализа, побарана од општина Крива Паланка, покажа драматично зголемено присуство на цијаниди, олово, фосфор и други токсични материи – на ниво кое директно го загрозува животот, здравјето, земјоделството и безбедноста на храната.
Во таква ситуација, Инспекторатот за животна средина не само што не презеде ништо, туку и дезинформираше – тврдејќи дека се излеала „само вода“, без направена анализа. Министерството за животна средина досега не го демантираше тоа, ниту презеде конкретни мерки.
СДСМ ја повикува Владата и министерот Изет Меџити:
Веднаш да одговорат дали ќе се направат нови, целосни анализи на водите од Крива Река, Пчиња и Вардар;
Да соопштат какви мерки се преземаат за заштита на водоснабдувањето и храната во регионот;
Да објават зошто досега нема објавено ниту еден инспекциски извештај за рудникот Тораница.
Ова не е ситен проблем. Ова е прашање на живот и здравје.
СДСМ уште еднаш потсетува: директорот на рудникот Тораница, Тони Тоневски, е партиски кадар на ВМРО-ДПМНЕ. Пратеникот Емил Спасовски, исто така од ВМРО-ДПМНЕ, го обвини градоначалникот на Крива Паланка дека „шири паника“, наместо да побара анализа на водата. Денес е јасно кој ја кажуваше вистината и кој ја прикриваше.
Додека Владата молчи, граѓаните пијат вода, јадат храна и живеат во несигурност. Тоа е пораз на институциите“, велат од СДСМ.
Македонија
Шест пациенти денеска се враќаат од странство, пет од Србија и еден од Италија

Шест пациенти денеска се враќаат од странство, пет од Србија (тројца од КБЦ Ниш и двајца од ВМА Белград) и еден од Италија, соопшти Министерството за здравство. Тие ќе бидат примени во здравствени установи од кои биле испратени и согласно повредите.
Во однос на останатите пациенти во странство, кај дел има подобрување, а неколкумина се уште се интубирани и во потешка здравствена состојба.
Во здравствените установи во државава остануваат 16 пациенти во добра општа состојба, како и во текот на вчерашниот ден, по шест во Св.Наум Охридски и ГОБ 8 Септември и четири во приватните болници.
-И понатаму внимателно ја следиме состојбата на повредените пациенти и остануваме во постојана комуникација со медицинските тимови во земјата и странство, посветени на обезбедување најдобра можна нега за повредените од несреќата во Кочани, наведува Министерството.
Македонија
СДСМ: И по една година, Мицкоски уште сече ленти на инвестиции на СДСМ

„Мицкоски вчера од Штип повторно се обиде да се накити со туѓи перја и да ги промовира инвестициите на СДСМ како свои. Гордо Мицкоски наајави дека оваа недела започнува со работа фабриката на канадската компанија „Магна“, најавувајќи ја како „нова странска инвестиција“. Но, штипјани имаат подобра меморија од него – тие знаат дека оваа инвестиција беше најавена уште во мај 2023 година, од тогашниот премиер Димитар Ковачевски и Владата на СДСМ“, велат од СДСМ.
„Фабриката на „Магна“ е резултат на стратешките економски политики на СДСМ. Обидот на Мицкоски да ја претстави оваа инвестиција како сопствен успех е евтин ПР трик – очајнички обид да се прикаже некаква работа, откако речиси една година не успеа да донесе ниту една нова значајна странска инвестиција. Реалноста е дека Мицкоски и неговата Влада речиси една година тапкаат во место кога станува збор за економијата. Единственото нешто што го „промовираат“ се проекти започнати од претходната Влада, а граѓаните гледаат сечење ленти на проекти кои биле целосно реализирани од претходната влада. СДСМ беше и останува партија што носи реални резултати за граѓаните и економијата. Во време на нашето владеење, Северна Македонија беше препознаена како стабилна и атрактивна дестинација за странски инвестиции. Не со лажен ПР на веќе започнати проекти, туку со вистински нови фабрики, вработувања и економски раст“, посочуваат од партијата и додаваат:
„На Мицкоски му порачуваме, може да глумиш колку сакаш, но економски раст не се гради со лаги и ПР. Се гради со работа, нешто што него очигледно сè уште не му е непознато“.