Претседателот на Владата, Христијан Мицкоски денеска одговарајќи на новинарско прашање во однос на тоа што предвидува проектот за градба на железница кој ќе произлезе од парите кои ќе се добијат како резултат од Договорот за стратешко партнерство со Обединетото Кралство и кога ќе се потпише договорот за инвестиции, изјави:

„На денешната седница на Владата, којашто е во тек, ќе биде овластен потпретседателот на Влада и министер за транспорт да замине во Лондон, да го потпише договорот оваа недела. Мислам дека утре или задутре, среда или четврток ќе биде и официјално потпишан и на тој начин ќе отпочне проектот за реализација на економскиот дел од договорот за стратешко партнерство со Обединетото Кралство. Имаме на располагање 5 милијарди фунти, околу 6 милијарди евра за проекти коишто се стратешки, јас би рекол трансформациони за државата“.

Пругата како што потстеи е дел од Коридорот 10 којшто ги поврзува Табановце со Гевгелија.

Тој проект, според Мицкоски, опфаќа целосна модернизација, реконструкција и изградба на уште еден паралелен колосек.

„Практично ќе имаме два колосека сега, со што карго транспортот ќе се случува со просечна брзина поголема од 110 километри на час. Денеска буквално, композициите за карго транспортот лазат кога се движат по Коридорот 10, на некои места и по 5-10 километри на час, се вози. Во просек таа брзина е негде околу 25 километри на час, а патничкиот ќе биде околу 160 километри на час, така што ќе има за неколку пати поголема и побрза размена на карго транспортот и на патници.

Истовремено го завршуваме проектот за Клиничкиот центар во Штип, со што овој дел од државата ќе добие вистински современа и модерна здравствена нега, вклучително и Медицински факултет и студентски дом со две стотини легла. Истовремено, како додаток на тоа, ќе ја градиме Болницата, за којашто веќе постигнавме согласност, во Кичево и целосна реконструкција на Клиничката болница во Тетово“.

Ова, нагласи Мицкоски е само почеток, а потоа следен чекор се и други проекти во делот на енергетиката, транспортот, во здравството, и ова како што појасни се капитални инвестиции.

„И сеуште не можам да се изначудам на некои коментари коишто доаѓаат од опозицијата, а најмногу се чудев, кога вчера, коментарот беше од таму, дека се задолжуваме за капитални инвестиции.

Јас навистина не знам кој ја подготвува комуникациската стратегија во опозицијата, но мојот совет до нив е дека, не одат добро и мислам дека на Македонија и е потреба квалитетна опозиција, конструктивна, којашто тоа што го артикулира како порака, практично ќе додава вредност, а не да делува, би рекол, на моменти и смешно.“

Секој месец граѓаните добиват нов ценовен шок. За една година се случи целосен дебакл на економските политики на владата на ВМРО-ДПМНЕ и ЗНАМ.

Податоците на Сојузот на синдикати се поразителни: за само еден месец, синдикалната кошничка поскапела за над 1.200 денари. За 954 денари се зголемени трошоците за храна и пијалоци, вели Мартин Костовски, организациски секретар на СДСМ.

За едно четиричлено семејство, како што наведе, потребни се речиси 63.000 денари месечно само за да преживее.

„Основните намирници стануваат луксуз а платите не мрдаат. Три минимални плати се потребни за да може да се преживее месецот.

Животот е сѐ поскап, платите стојат, а мерки од владата нема.

Додека премиерот Мицкоски ги чека анализите и не знае колку се покачени цените, граѓаните тонат во сиомаштија.

Се живее се потешко, се преживува со задолжувања и жртвувања.

Дали министрите во Владата знааат колку чини да се наполни еден фрижидер? Очигледно не – затоа што додека народот крпи крај со крај фунционерите на ВМРО-ДМНЕ живеат надвор од реалноста, во свет на папаја, манго, октоподи.

Како да не било доволно, во април и мај, СОЗР склучила милионски договор за нови луксузни јадења, за лигњи, школки, лосос“.

Ова што го прави Владата, оценува тој, не е политика, туку грабеж на народот.

Повика власта веднаш да ги прифати предлозите за зголемување на платите и мерките за намалување на цените:

„Да се покачи минималната плата на 500 евра. Да се спроведат мерки за повисоки плати за јавниот и приватниот сектор. Да се укине ДДВ за храна со што веднаш ќе се намалат цените на основните производи“.

Не може, додава Костовски, народот да гладува додека министрите се гоштеваат на сметка на државата.

Подвлече дека СДСМ е со граѓаните, и ќе продолжат да се борат за поголеми плати и за достоинствен живот.

„По синоќешната ТВ-дебата, СДСМ наместо да покаже емпатија кон трагично загубените млади животи, продолжува со правни калкулации и политичка одбрана на неодговорноста. Соопштението на пратеничката Тренчевска од СДСМ денеска не е ништо друго освен обид да се покрие долгогодишниот институционален неуспех и длабоко вкоренета корупција во системот кој доведе до трагедијата во дискотеката „Пулс“, вели Миле Лефков пратеник од ВМРО-ДПМНЕ.

„Моите ставови се јасни и се дел од борбата против политичкиот систем што го наследивме, коруптивен и расипан модел кој произведува кризи и жртви. Тој “расипан” систем го водеше и сè уште го брани СДСМ.

СДСМ сака преку закон да се извлече од вина, да глуми сочувство со параграфи, да “нормализира” корупција а во исто време ќути за својата одговорност“.

Вели дека надомест на штета постои во нашиот правен систем, преку судска постапка, преку утврдување на вина и обврска. Секој граѓанин, според него, има право да бара отштета, а државата има обврска да одговара кога нејзините институции затаиле. Но тоа, како што појаснува, не се решава со политика во Собрание, туку преку судови и институции.

„Правдата не се носи со популистички закони туку со ефикасни и независни институции. Жртвите заслужуваат вистинска правда – не политизација.

Ако навистина сакаме правда – тогаш да бараме одговорност од сите што затаиле во системот, а не да нудиме „отштета“ со закон од собраниска говорница. Тоа е непочитување кон жртвите и нивните блиски.

Нема правда без одговорност и токму тоа им пречи“.

Повтори дека ова не е прашање на партиски поени. Ова, како што нагласи е прашање на основна човечност и морална обврска кон жртвите и нивните семејства.

„И за крај – не прифаќам политичка расправија на сметка на туѓа болка“, додава Лефков.