Македонија
Производителите го чекаат последниот ден за намалување на цените на млечните производи, одлуката од утре ќе стапи во сила

Производителите очигледно го чекаат последниот ден за да ги намалат цените, смета вицепремиерот за економски прашања, Фатмир Битиќи, коментирајќи го фактот што на рафтовите во продавниците сè уште стојат старите цени, а одлуката за замрзнување на цените на млечните производи стапува во сила од утре.
„Очигледно така сме навикнати во нашето општество, секогаш е последниот ден, дури и ако е за добра работа, чекаме последен ден. Ќе ги видиме утре наутро цените што ги кажавме“, рече Битиќи.
Вицепремиерот нагласи дека Владата ги следи движењата на пазарот во Европа. Цените паѓаат, рече тој, и справувањето со економската криза го оцени како успешно.
„Резултатите се видливи. Тоа значи дека и кај нас трговците треба да ги следат истите текови. Ако паѓаат основните суровини, ќе треба да продолжат да паѓаат и цените“, рече Битиќи одговарајќи на новинарски прашања.
Утре стапува во сила одлуката за замрзнување на млечните производи, односно намалување на цената за 10 отсто. Тоа значи дека ако на 1 март цената на млекото била 76 денари за литар, тогаш на 16 март овој производ треба најмалку да биде поевтин за 7,6 денари. Во оваа група влегуваат трајното кравјо млеко со масленост од 2,8, 3,2 и од 3,5 проценти, урдата, кравјото бело сирење и мешаното бело сирење, кравјиот кашкавал, со исклучок на кравјиот кашкавал без додатоци и пармезанот, киселото млеко, павлаката и јогуртот без додатоци.
Одлуката за замрзнување на цената на млечните производи ќе важи до 31 мај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Потребен е механизам за спречување блокади на билатерална основа

Да се воведат механизми кои нема да дозволат билатерални спорови да се пречка за остварување на заедничка цел, порача премиерот Мицкоски од состанокот на постојаниот комитет на парламентарното собрание на НАТО чиј домаќин е земјава.
Според него, досега биле направени многу отстапки и одрекувања за остварување на државните цели како што е членството во НАТО, но како што вели, потребен е механизам за спречување блокади на билатерална основа, со кој ќе се одблокира и европската иднина за државата.
„Пријатели си помагаат, но и пријатели искрено си ги кажуваат своите чувства и забелешки. Сметам дека треба да се размисли и за воведување на механизми каде нема да се дозволи билатерални спорови да бидат пречка за остварување на колективната и заедничка цел. Ако ние сите заедно ја чуваме куќата, тогаш и заедно имаме право да си ги кажеме нашите проблеми, разочарувања и очекувања. Ние ќе останеме лојален партнер, и заедно и посветено ќе работиме кон остварувањето на колективните цели“, истакна премиерот.
Пред шефовите на парламентарните делагации од земјите членки на НАТО, Мицкоски се осврна и на трагедијата во Кочани по која сојузниците ја покажале својата солидарност. Помош понудиле десет европски држави, а преку механизмот за цивилна заштита на ЕУ дел од повредените заминаа на лекување во странство.
„Оваа трагедија ни покажа дека солидарноста не е само збор, туку дело што ги поврзува народите. Таа е темелот на нашата Алијанса-принцип што не води во заедничките напори за зачувување на мирот и безбедноста. Солидарноста значи дека кога еден од нас страда, сите страдаме. Кога еден е во неволја, сите притрчуваме на помош. Во изминатите пет години од нашето членство во НАТО, активно придонесувавме кон колективната безбедност и стабилност на Алијансата“, кажа Мицкоски.
Состанокот на Парламентарното собрание на НАТО кој се одржува во Скопје доаѓа на петгодишнината од членството на земјава во северноатланската алијанса, а денеска се одбележуваат и 76 години од основањето на НАТО како камен темелник на европската и северноамериканската безбедност..
Македонија
Утре ќе се одржат внатрепартиските избори за Претседател на СДСМ

Утре ќе се одржат директните внатрепартиски избори за Претседател на СДСМ кои беа одложени поради трагедијата во Кочани.
„Социјалдемократскиот сојуз на Македонија е единствена партија којашто Претседателот го избира на непосредни, внатрепартиски избори.
Изборите ќе се спроведат во општинските организации на СДСМ ширум републиката, на 78 избирачки места, кои на денот на гласањето ќе бидат отворени од 08 до 20 часот.
Централната изборна комисија го потврди и го затвори Избирачкиот список, на кој активно регистрирани се 23.712 членови, обезбеден е избирачки материјал, паравани за тајност на гласањето, избирачки кутии, ознаки и се што е потребно за изборниот ден.
Сите активно регистрирани членови на СДСМ ќе можат да го остварат своето право на непосредно и тајно гласање за избор на Претседател во својата општина на соодветно гласачко место.
Членовите што гласаат, со себе задолжително треба да ја има електронската членска картичка на СДСМ и важечки личен документ за идентификација (лична карта или пасош).
Гласањето на болни и немоќни е овозможено, еден ден порано, односно во сабота на 05.04.2025 година.
Сите детални информации, одлуки, правилници, роковници и останати документи поврзани со внатрепартиските избори за претседател на СДСМ се достапни на веб страната на СДСМ или директно на следниот линк:
Надлежна за спроведување на гласањето е Централна изборна комисија.
Информација за резултатот ќе го соопштиме во недела по завршување на процесот на гласањето“, стои во соопштението на СДСМ.
Македонија
Министерство за здравство: 69 пациенти се на лекување во странство и нема промена во нивната состојба

Министерството за здравство информира дека во моментов 69 пациенти се на лекување во странство и нема промена во нивната состојба, во споредба со претходните денови.
Непроменета е и состојбата на пациентите во критична состојба.
Во установите во Скопје се лекуваат 15 пациенти и тоа:
– Во Хируршка клиника „Св Наум Охридски“ – 6,
– На Клиника за пластична хирургија – 4 пациенти пристигнати синоќа од странство,
– На Клиника за токсикологија има двајца пациенти (еден од претходно кој е префрлен од Хируршка клиника ,,Св. Наум Охридски” и еден кој ноќеска е дојден од Шпанија) и еден пациент е хоспитализиран на Клиника за пулмологија.
– Во Систина се лекуваат двајца пациенти.
Сите пациенти кои се третираат во нашите установи се во стабилна состојба, известија од Министерството за здравство.