Владата на Република Северна Македонија вчера го одобри барањето на Кабинетот на заменик-претседателот на Владата задолжен за политики на добро владеење, Арбен Фетаи, за проширување на работната група која ќе го изработи Акцискиот план за имплементација на препораките од Завршниот извештај на Државниот завод за ревизија за управувањето со државниот имот.

„Ова е значаен чекор кон создавање ефикасен, праведен и одговорен систем за управување со јавниот имот, како и кон спречување на злоупотребите и недостигот на транспарентност што се случувале во минатото“, истакна Фетаи.

Работната група, предводена од Кабинетот на заменик-претседателот, ќе биде составена од претставници на клучните државни институции: Службата за општи и заеднички работи на Владата, Јавното претпријатие за изградба и стопанисување со станбен и деловен простор (АД – Скопје), Јавното претпријатие за стопанисување со деловен простор во државна сопственост (АД – Скопје), Агенцијата за катастар на недвижности, Министерството за финансии, Генералниот секретаријат на Владата и Комисијата за станбени прашања.

Првпат во историјата на државата, се подготвува и Национален регистар на државен имот – иницијатива предводена од Кабинетот на заменик-претседателот Фетаи, базирана на најдобрите европски практики, со цел елиминирање на ризикот од корупција и злоупотреби во овој историски чувствителен сектор, информираат од кабинетот на Фетаи.

„Ова е клучен момент за изградба на модерен систем за управување со државните ресурси, каде што транспарентноста и отчетноста се водечки принципи“, оценува Фетаи.

Градоначалникот на Општина Центар, Горан Герасимовски, информира дека целосно е исчистена дивата депонија зад катната гаража во Буњаковец, во близина на ООУ „Јохан Хајнрих Песталоци“.

Отстранувањето започна минатиот месец како дел од акцијата за чистење „Центар не чека, Центар чисти“, при што беа подигнати големи количини отпад, се миеја улици и се подобруваше хигиената низ целата општина.

„Целосно ја исчистивме дивата депонија позади катната гаража во Буњаковец. На овој простор, кој долго време беше занемарен и невидлив за граѓаните, затекнавме опасен отпад – азбестни плочи и разни градежни и други материјали што претставуваа сериозен ризик по здравјето. Веднаш интервениравме со механизација, го отстранивме целиот отпад и извршивме дезинфекција на теренот. Сега овој простор е безбеден и уреден, а во наредниот период тука ќе се уреди нов паркинг и ќе се засади зеленило, со што оваа локација конечно ќе добие функционална и естетска вредност“, истакна Герасимовски.

Венко Филипче е човек без кредибилитет на врвот на СДС и само второ лице на Зоран Заев, вели Валентин Манасиевски, член на ЦК на ВМРО-ДПМНЕ.

Според него, Венко Филипче е избран со двојно и тројно помалку гласови од своите претходници.

Венко Филипче, како што додава во изјавата Манасиевски, нема ниту автентична политика и тој е второ лице на Заев и негова продолжена рака во политиката.

„Венко Филипче е човек со голем број афери зад него, и само таков човек му одговара на Заев, да го држи зауздан и послушен. Венко Филипче не знае каде тера, тој нема мандат за ништо, ниту пак може да нуди решенија за нешто. Филипче е извор на проблеми долги години наназад“.

Како што истакнува Манасиевски, колкав проблем е Венко Филипче, доволно е да се погледне здравството и на секој ќе му биде јасно.