Македонија
Промовирана „Археолошка Брајова азбука“ – прва литература од ваков тип во Македонија и регионот

Денес, во Домот на култураата „Билјана Беличанец“ се одржа промоцијата на „Археолошка азбука“ и на „Археолошка Брајова азбука“ – првите книжевни дела од ваков тип во Македонија и пошироко во регионот, наменети за деца и млади, чии автори се професори Антонио Јаќимовски, Елизабета Томевска-Илиевска, Маја Јаневска. Настанот се реализира со поддршка од градоначалникот Орце Ѓорѓиевски и Општина Кисела Вода, во соработка со Здружението „Институт за европски образовни, социо-културни и економски политики ЕВРОПА ЗА ТЕБЕ“ – Скопје и Државното училиште за рехабилитација на деца и младинци со оштетен вид „Димитар Влахов“, Скопје. Овие дела имаат длабока едукативна и културна вредност – на интересен, сликовит и инклузивен начин го доближуваат археолошкото наследство до најмладите читатели, вклучително и до оние со оштетен вид, велат организаторите.
– Ми претставува особена чест и задоволство што денес сме тука, заедно со почитуваните професори Антонио Јаќимовски, Елизабета Томевска-Илиевска, Маја Јаневска и пратеничката во македонското Собрание Катерина Димитровска, во Домот на култура ,,Билјана Беличанец” за заедно да промовираме едно навистина посебно и вредно издание – „Археолошка азбука“ и „Археолошка Брајова азбука“ – првата литература од ваков вид за деца и млади во нашата земја и пошироко во регионот, поддржана од Кисела Вода. Нашата општина постојано се залага за еднакви можности и права за сите. Грижата за лицата со попречености, а особено за лицата со оштетен вид, не е само обврска, туку и должност која ја исполнуваме со големо внимание и посветеност. Секоја година, на Денот на Брајовото писмо, ја продолжуваме нашата поддршка за учениците од Државното училиште за рехабилитација „Димитар Влахов“, преку донирање на книги напишани со Брајово писмо за нивната библиотека – затоа што веруваме дека знаењето и културата треба да бидат достапни за сите, без исклучок.
Поддршката што ја дадовме на „Археолошката азбука“ и нејзиното издание на Брајово писмо е токму во таа насока – да понудиме литература која истовремено е и образовна и инспиративна, која ги запознава децата со богатата археолошка ризница на нашата земја и ги поттикнува да се чувствуваат горди на своето културно наследство. Посебно радува фактот што „Археолошката Брајова азбука“ ќе им овозможи и на децата со оштетен вид рамноправен пристап до знаење, визуелно адаптирано и внимателно подготвено според нивните потреби.
Затоа, сето ова не е само промоција на книга – ова е потврда за визија, за вредности, за грижа и за инклузија. Ова е пример како културното и образовното може да се спојат во вистинска алатка за градење свест, идентитет и љубопитност кај младите“, истакна Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Променливо облачно време, попладне дожд

Времето денес ќе биде променливо облачно со сончеви периоди. Попладне ќе има повремени врнежи од дожд, наместа пообилни (10 до 15 l/m²). Локално ќе има услови за појава на нестабилност со пороен дожд и грмежи. Ќе дува слаб до умерен, а долж Повардарието повремено засилен ветер од северозападен правец.
Во Скопје, променливо облачно со сончеви периоди. Попладне ќе има повремени врнежи од дожд и ќе дува умерен, во делови од котлината повремено засилен ветер од северен правец.
Македонија
Прекинато водоснабдување во дел од Општина Карпош

Од ЈП Водовод и Канализација известуваат дека денеска поради дефект на шибер од ф – 80 мм на ул. Руѓер Бошковиќ бр. 15, во периодот од 09.00 часот па се до отстранување на дефектот без вода ќе останат корисниците лоцирани на потегот од бул. Осми Септември до раскрсница со ул. Никола Тесла. (општина Карпош).
Македонија
Мицкоски ќе се сретне со Орбан во Будимпешта

Премиерот Христијан Мицкоски в петок ќе присуствува на CPAC конференција во Будимпешта, Република Унгарија, соопшти владината прес-служба.
Мицкоски во рамки на посетата ќе се сретне со унгарскиот премиер, Виктор Орбан.