Македонија
Промоција на поштенска марка за 25-годишнината од воспоставувањето дипломатски односи со САД

Министерот за надворешни работи, Бујар Османи заедно со помошник државниот секретар Филип Рикер, амбасадорката Кејт Мари Брнз, кои беа вклучени преку видео-конференциска врска и директорот на Пошта, Јани Макрадули, во Министерството за надворешни работи промовираа поштенска марка издадена по повод 25-годишнината од воспоставувањето на дипломатските односи помеѓу Република Северна Македонија и САД.
Министерот Османи во оваа пригода изјави дека дипломатските односи меѓу двете земји во текот на изминатиот четвртина век отсекогаш биле топли и пријателски, засновани врз заеднички вредности и стратешко партнерство, заблагодарувајќи се за континуираната поддршка од САД, особено на патот на РС Македонија кон нејзината евро-атланска иднина, стабилност и севкупен просперитет.
„Неодамна, со нашето членство во НАТО, ова партнерство се претвори во сојуз, што е голема привилегија и уште поголема одговорност и мотивација да работиме заедно кон одржување на мирот, стабилноста и просперитетот на нашата земја и регионот“, истакна Османи, заблагодарувајќи се за континуираната поддршка од САД за постигнување на нашите стратешки цели и да застанете рамо до рамо кога тоа беше најважно за земјава во текот на сите овие години.
Османи уште еднаш потврди дека РС Македонија нема друга алтернатива или пат освен евроатлантската иднина на нашата земја и ние остануваме целосно посветени на остварувањето на таа цел.
„Ова е јубилеј кој денес се брои во децении но по своето значење и традиционални партнерски односи на меѓусебна поддршка може да се каже дека трае навистина многу подолго. Сега сме членка на НАТО, но и кога не бевме се уште членка, високо се ценеше нашиот придонес во многу заеднички мировни пост конфликтни операции“, истакна Макрадули, додавајќи дека верува дека ова Поштенска марка ќе биде предвесник на многу вековни јубилеи на односите со САД.
Помошник државниот секретар Рикер и амбасадорката Брнз, ја поздравија идејата за издавање на поштенска марка по повод јубилејот од воспоставувањето на дипломатските односи.
„Бевме со вас за Времената спогодба со Грција, за Охридскиот договор и последно за историскиот Преспански договор, кој ги отвори вратите за членството на вашата држава во НАТО. Во овие 25 години на промени, нашите цели за Северна Македонија за мир и просперитет останале исти како и надежта Северна Македонија да продолжи по патот на евро-атлантските интеграции останува иста. Нашата поддршка за присуството на Северна Македонија во меѓународните институции останува, нашето партнерство е цврста и ќе продолжи и покрај транзицијата на администрациите во наредните недели и месеци”, истакна Рикер.
Амбасадорката Брнз во своето обраќање се осврна на односите меѓу Република Северна Македонија и САД од воспоставувањето на дипломатските односи до денес, потенцирајќи дека е постигнато повеќе од тоа што двете држави очекувале.
„Иако има предизвици пред нас, Северна Македонија постигнала енормен прогрес за многу краток период” истакна Брнз, додавајќи дека „САД остануваат цврсто во поддршка на заслуженото членство на Северна Македонија во Европската Унија”.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) СДСМ: Орце молчи за дивоградбите, гледаме нова Арсовска под диктат на Мицкоски

Додека Скопје се гуши во урбанистички хаос, Орце Ѓорѓиевски, кандидатот на ВМРО-ДПМНЕ, молчи за дивоградбите во Чаир, обвини Јовица Јанковиќ од СДСМ.
„Над 150 незаконски дивоградби, криминал тежок над 220 милиони евра, узурпиран простор, маала претворени во бетонски џунгли и загрозена безбедност. Тоа е резултатот на политиките на коалициските партнери на ВМРО-ДПМНЕ што денес Орце ги одобрува. Зошто Орце воопшто не нуди решение за проблемот со дивоградбите? Дали поради бизнис интересите на власта? Таа ли улога Мицкоски му ја додели на Орце овој пат?“, праша тој.
Според Јанковиќ, дивоградбите не се само локална приказна туку со ВМРО-ДПМНЕ урбаното дивеење стана тажно скопско секојдневие.
„Секогаш кога ВМРО-ДПМНЕ владее со градот ова се случува, го претвораат во свој партиски вилает за да ги спроведуваат бизнис агендите. Со Орце скопјани можат да очекуваат само нови разочарувања, уште поголем хаос, нови бизнис-договори на грбот на граѓаните. Наместо решенија дивоградбите ќе продолжат, никој нема да одговара и наместо развој на Скопје ќе гледаме партиски диктат за богатење на поединци. На скопјани им треба вистински градоначалник кој ќе се бори со урбаната мафија, а не кој ќе ја штити. На Скопје не му треба нова Арсовска, под диктат на Мицкоски“, рече Јанковиќ.
Македонија
Кривична пријава за градоначалникот на Делчево: вработил лице што исполнувало услови за пензија

Надворешната канцеларија за криминалистички работи Делчево на 25.08.2025 до ОЈО Делчево поднесе кривична пријава против Г.Т. (54) од Делчево поради основи на сомнение за сторено кривично дело „злоупотреба на службената положба и овластување“, предвидено и казниво по член 353 став 3 во врска со став 1 од Кривичниот законик.
Пријавениот Г.Т. како овластено службено лице градоначалник на Општина Делчево на 01.08.2018 по јавен оглас од 25.06.2018 за вработување на административен службеник, злоупотребувајќи ја својата службена положба и овластување со пречекорување на границите на службената должност донел незаконска одлука за избор на кандидатот В.М. од Делчево, кој уште во првата фаза од постапката за вработување, како и во моментот на донесување на решението за стекнување на статус на административен службеник ги исполнувал законските услови да се стекне со право на пензиско и инвалидско осигурување со навршени 64 години старост, што претставува основа за престанок на работен однос на административен службеник, а не основа за вработување согласно член 98 став 1 алинеа 3, а во врска со член 98 став 5 алинеја 9 и 10 од Законот за административни службеници.
Со незаконското вработување, пријавениот Г.Т. му овозможил на В.М. да се стекне со противправна имотна корист од 505.561 денари на име плата и да нанесе штета на Општина Делчево во износ од 762.318 денари по основ на исплатени придонеси и плата.
Македонија
Филипче: ВМРО-ДПМНЕ ја уништи куповната моќ, граѓаните се сѐ посиромашни

ВМРО-ДПМНЕ и Христијан Мицкоски свесно ги туркаат граѓаните во сиромаштија, инфалцијата руши рекорди, платите стагнираат, граѓаните се се посиромашни, посочува претседателот на Социјалдемократскиот сојуз на Македонија, Венко Филипче, во својата објава на социјалната мрежа Фејсбук.
Филипче нагласува дека власта го прекина системот на континуирано зголемување на платите што го воведе СДСМ и ги доведе граѓаните до раб на преживување.
„Пред еден од најтешките месеци во годината, граѓаните се соочени со суровата економска реалност- сè е поскапено, а платите стагнираат. ВМРО-ДПМНЕ и Христијан Мицкоски свесно ги туркаат граѓаните во сиромаштија. Ја прекинаа спиралата на раст на платите што ја започна СДСМ. Инфлацијата од 4,8% секој месец го јаде животниот стандард, граѓаните живеат полошо. Синдикалната потрошувачка кошничка за август изнесува над 65.000 денари. Дури и две минимални плати не се доволни за да се преживее месецот“, вели Филипче.
Тој посочува дека фактот што растот на реалната нето плата која ја мери куповната моќ на граѓаните е помал од пред една година е доволен показател за последиците од погрешните политики на владата.
„Мицкоски се фали со бројки и проценти за наводен раст на платите. Вистината е дека реалната плата, онаа што навистина значи нешто за секое семејство во јуни порасна само 3,8%, за разлика од лани со економските политики на СДСМ растот беше 11%. За прв пат по долго време, имаме пад на просечната плата во споредба со претходниот месец. Ова е аларм што не смее да се игнорира“, вели Филипче.
Во објавата тој нагласува дека Македонија се претвора во земја на сиромаштија и неизвесност, но дека СДСМ нема да отстапи од предлозите за заштита и подобрување на животниот стандард.
„СДСМ знае како да ја врати стабилноста и достоинството на граѓаните. Нема да отстапиме од предлозите за покачување на платите во сите сектори, зголемување на минималната плата на 500 евра, намалување на цените преку укинување на ДДВ за основните прехранбени производи. Битката за поголем приход е битка за достоинствен живот“, додаде Филипче.