Проректорот на Универзитетот „Св. Климент Охридски“ и професор на Факултетот за безбедност – Скопје, проф. д-р Марјан Ѓуровски, во рамките на дводневната работна посета на Софискиот универзитет денеска во Ректоротот ќе одржи предавање на тема: „Безбедносните ризици за Северна Македонија и Западен Балкан: регионални предизвици и приоритети“.

Се очекува проректорот Ѓуровски да биде примен од ректорот на Софискиот универзитет, проф. д-р Анастас Герџиков, каде што ќе се разговара, меѓу другото, за имплементацијата на заедничкиот меморандум на соработка меѓу Софискиот и битолскиот државен универзитет, во функција на негово интензивирање преку одржување заеднички активности и истражувања, како и изнаоѓање механизми за подготовка и апликација на проекти поддржани и финансирани од програмите на Европската Унија. Меморандумот пред една година го потпишаа ректорите на битолскиот универзитет, Сашо Коруновски, и на Софискиот универзитет, професор Герџиков.

Проректорот Ѓуровски вчера зеде учество на ЕУ-проектот „Превекс“, финансиран од програмата „Хоризонт 2020“ за научни иустражувања и иновации. Посебен акцент на меѓународниот семинар од негова страна беше ставен на факторите, контекстите и развивањето на насилниот екстремизам низ призмата на јавните политики и стратегии. Важен процес, според професорот Ѓуровски, е дерадикализацијата и ресоцијализацијата на лицата странски борци повратници или радикални поединци, кои злоупотребувајќи ја верата, може да направат безбедносни проблеми во земјата и пошироко. Меѓу другото, беше искажано загрижување за појавата на политички екстремизам и радикализам, кој по земјите од Европската Унија, има индиции за појава и во земјите од Западени Балкан.