Македонија
Протестите на специјализантите имаат политичка заднина, колкав притисок и да прават, решение е можно по изборите, вели Демири

Министерот за здравство ги поддржува барањата за поголеми плати и платени придонеси на приватните специјализанти, но нема мерки што би можел да ги преземе до завршување на изборите за да им ги исполни. Демири смета дека протестот на специјализантите, организиран токму во овој период, има политичка заднина.
„Ги примив специјализантите и направивме една компарација каква беше нивната позиција пред 2017 година и каква е сега. Има една голема разлика оти до 2017 година немаа никакви примања, имаа 0 примања. Сегашните примања не велам дека се задоволувачки, јас сакам да бидат нивелирани со примањата на еден специјализант кој е вработен во јавна здравствена институција, но за тоа треба буџет и ребуџетирање, кое сега пред изборите не може да се оствари. Нивните примања за три месеци се доволни да платат рата за специјализација, без да ги вклучам примањата што ги земаат како надоместок за дежурствата. Сигурно ова не е генерирано од проста желба да го подобрат нивниот социјален статус, економските примања, туку генерирано е и со политичка заднина. Независно од притисокот што може да го направат во јавноста, ова е реалноста. Зошто не се задоволни кога правиме таква компарација, која е драстична. Зошто баш сега се иницираат нивните барања е многу индикативно. Треба да се има трпение“, рече министерот Демири.
По изборите, Демири најави дека ќе се избори да има ребаланс на буџетот и примањата на приватните специјализанти да се изедначат со примањата на специјализантите, кои се вработени во јавните здравствени установи.
Приватните специјализанти од Клиничкиот центар „Мајка Тереза“, по неколкунеделни најави, денес почнаа генерален штрајк. Клинички остана без приближно 400 лекари специјализанти, кои нема да се појавуваат на работа, нема да дежураат и нема прават амбулантски прегледи сè додека во писмена форма не добијат гаранција од Владата дека по изборите, ќе бидат исполнети нивните барања за платено пензиско и здравствено осигурување и поголеми плати, кои сега изнесуваат 26.000 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Стефковски приреди велигденска трпеза: Да се почитуваме како народ за да опстоиме како држава

Градоначалникот на општина Гази Баба Бобан Стефковски вчеравечер приреди велигденска трпеза по повод Воскресението христово – Велигден.
Во обраќањето пред присутните, градоначалникот Стефковски говореше за ликот и делото на Исус Христос и за тоа дека ниту една друга личност, како личноста на Исус Христос и ниту еден друг настан како настанот со воскресението не предизвикале таков интерес и не направиле таков пресврт во историјата на светот и човекот.
„И доаѓањето на Исус Христос неговото живеење и неговото заминување биле пропратени со необични појави и случувања. Кога се родил во Витлеем се појавила необична ѕвезда на небото, а додека живеел од него излегувала сила која ги лекувала. Болни исцелувал, грешни поправал, гревови простувал и никој ниту пред него, ниту по него не живеел со таква сила“, наведе Стефковски.
Дополнително тој се осврна и соживотот кој го имаат граѓаните од различни етнички заедници во општината.
„Од оваа година започнавме една нова традиција. За Бајрам се собравме на Ифрат со граѓаните од Исламска вероисповест, а денес на третиот ден од Велигден сме собрани тука на Велигденска трпеза. Само со взаемно почитување на религијата и традицијата ќе ја покажеме нашата големина пред се како индивидуи, а потоа и како народ“, истакна градоначалникот Стефковски.
На крајот од своето обраќање Стефковски им упати порака на граѓаните и порача: Мојата порака до сите наши граѓани, без разлика на етничката, верската или било каква друга припадност е да се почитуваме помеѓу себе, да си помагаме секогаш кога тоа е потребно. Во тагата да тагуваме, а во радоста да се радуваме – заклучи Стефковски.
На велигденската трпеза присуствуваа свештеници од МПЦ, пратеници во Собранието на Република Македонија, советници и голем број на граѓани.
Македонија
ВЛЕН: Определбата на Ахмети е да предизвика политичка криза и предвремени избори

Не случајно народот вели “Парите дупчат каде ниту бургијата не може!”. Со недели слушаме како ДУИ рони крокодилски солзи за истрагата во Кочани, каде според нив, неосновано се осомничени нивни поранешни функционери. Сепак, вистината е многу сурова. Ахмети наместо да се грижи за неговите поранешни министри за економија, Бектеши, Незири, Сарачини, Кучи, нему единствен фокус му е Пуцко и неговата фамилија, велат од ВЛЕН.
„За него не е важно што негови луѓе набавувале токсичен мазут во износ од 160 милиони евра и труеле цела нација. Преку послушникот на кичевскиот клан, Ислам Абази, прави се’ што може да го спаси од притвор лицето А.Ј. со кауција од 2 милиони евра. Клучното прашање е зошто, на пример Дрин Ахмети не депонира кауција за поранешните министри на неговиот вујко? Или, нивните маки и маките на нивните семејства се неважни за Ахмети?“, прашуваат од коалицијата.
Од таму прерупредуваат дека определбата на Ахмети е, како што велат, да предизвика политичка криза која би резултирала со предвремени парламентарни заедно со локалните избори.
„Нему очајно му треба “Пржинска Влада” во која преку МВР со кое би раководела опозицијата, би се направило се’ за да се уништат доказите против поранешните корумпирани кадри на ДУИ. Затоа, не сакаат само локални избори, бидејќи влегуваат во сигурен катастрофален пораз“, велат од ВЛЕН.
Македонија
(Фото) Спречени обиди за криумчарење парфеми, тутун, облека со потпис на познати модни брендови

На Меѓународен Аеродром Скопје државјанин на Обединети Арапски Емирати родум од Индија се обидел да криумчари во државата 76 парфеми. Патникот при пристигнување во државата се определил на зелен канал при што поради сомневање е селектиран на царинска контрола. При контролата во двата куфери кои ги носел со себе се пронајдени парфеми со потекло од Дубаи коишто патникот не ги пријавил, извести Царинската управа.
Во друг случај на Меѓународен Аеродром Скопје при контрола на патник кој требало да патува со лет на релација Скопје – Лондон – Лутон биле пронајдени 260 пакувања од по 50 грама тутун.
Возач на камион се обидел во државата преку граничниот премин Табановце да шверцува соларен инвертер. Во обидот е спречен од Службата за мобилен скенер која при извршената контрола утврди дека во кабината има неправилности по што е извршен и физички преглед кога е пронајден соларниот инвертер.
Царински службеници на граничниот премин Табановце во куферите на еден од патниците кои патувале со автобус кој сообраќал на релација Скопје – Белград пронајдоа 129 парчиња суплементи Zeo Medic, додаток во исхрана. Суплементите се запленети, а против патникот ќе биде поведена соодветна постапка.
Спречен обид за шверц на 3.150 ќесички маџун со додатоци, откако патник се обидел истите преку граничен премин Богородица нелагално да ги внесе во државата. Лицето кое патувало со автомобил на прашање дали има нешто да пријави за царина одговорило дека нема ништо за пријавување. Поради сомневање возилото е селектирано за детален преглед при што во багажниот простор во три патнички куфери помеѓу личните предмети, е пронајдена непријавената стока.
Мобилен царински тим на Царинска испостава Табановце при контрола на камион, заплени 463 парчиња облека со потписот на Ралф Лаурен, Диор, Бос и други модни брендови поради основано сомневање за повреда на право од интелектуална сопственост.
Патник преку граничен премин Ново село се обидел да шверцува разна стока, меѓу која ножеви, клучеви, рибарски прибор, слушалки, машинка за стругање. Во намерата е спречен од царинските службеници кои при контрола на возилото, во багажникот и помеѓу седиштата ја открија непријавената стока, соопшти Царинската управа.