Македонија
Протестна нота од Софија поради нападот врз секретарот на клубот во Охрид

Амбасадорката на Република Северна Македонија во Бугарија, Агнеса Руси-Поповска, ќе биде повикана во Министерството за надворешни работи во Софија, каде што ќе ѝ биде врачена протестна нота како реакција од официјална Софија на нападот врз секретарот на бугарскиот клуб „Цар Борис Трети“ во Охрид, Христијан Пендиков.
Бугарското МНР ќе побара од властите во Македонија да преземат итни и ефективни мерки за, како што велат, борба против злосторствата од омраза врз Бугарите, а министерот за надворешни работи на Бугарија, Николај Милков, во телефонскиот разговор со Бујар Османи добил уверување дека ќе ја добијат потребната помош од локалните власти.
„Привремениот раководител на Генералниот конзулат на Република Бугарија во Битола и екипа од бугарската амбасада во Скопје се во контакт со повредениот државјанин и се испратени во Охрид. Бугарската држава со месеци упорно го потенцира своето очекување властите во Северна Македонија да преземат итни и ефективни мерки против сериозната ескалација на злосторствата од омраза и манифестации против Бугарите во земјата. Бугарската страна сè уште нема добиено официјални информации за истрагата и спроведувањето на правдата во врска со последните напади, вклучително и пукање со огнено оружје, врз организацијата „Цар Борис III“ од крајот на 2022 година. За жал, нападот од 19 јануари 2023 година е пример за тешките последици од системското отсуство на адекватен одговор и посветеност од страна на Северна Македонија, вклучително и неможноста да ја исполни својата главна обврска – да ја гарантира безбедноста на сопствените граѓани“, соопштија од бугарското МНР.
Бугарија очекува надлежните органи во Северна Македонија да преземат итни активности за откривање, изведување пред лицето на правдата и казнување на сторителите на кривичното дело имајќи ја предвид сериозноста на делото.
„Очекуваме земјата што ја декларира својата желба да биде дел од Унијата заснована на слобода, демократија и владеење на правото, да вложи доследни и реални напори за исполнување на своите заложби поврзани со заштитата и гарантирањето на човековите права. За жал, последниве месеци сме сведоци на токму спротивните трендови во општеството на Северна Македонија. Постоењето проблеми со правата на Бугарите во Северна Македонија не може да продолжи да се негира и од локалните власти и од меѓународните партнери. Очигледно, тоа само води кон нивно продлабочување и е неспоиво со членството во Европската Унија“, реагираат од Софија.
Орце Костов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Палевски вели дека не се пријавил во полицијата во Баликесир оти секако ќе го нашле, се видел на сите вести во пицеријата додека пиел еспресо

Обвинетиот за убиствата на Вања и Панче, Љупло Палевски во судот одговараше на прашањата на обвинителите.
Тој беше прашан зошто самиот не се пријавил во полиција кога во Баликесир видел дека го бараат со меѓународна потерница. Рече дека пред да биде уапсен го вратил клучот од куќата на сопственикот, затоа што сметал дека е јасно дека ќе биде уапсен.
„Без разлика на големината на Баликесир, кога 48 часа сте во градот, не може да знаете каде е судот, обвинителството и полициската станица. Затоа, кажав, дека во истиот ден два пати се вратив во пицеријата, по што, вториот пат бев лишен од слобода, на регуларен, нормален начин. Немам приговори на однесувањето на турската полиција, освен една забелешка, која вашиот претпоставен Бубевски ја злоупотреби. Еден од вработените од Интерпол ме извади во ходник, ме сликаше и сликата по Вотсап му ја испрати на Оливер Спасовски. Подоцна мојот адвокат во Турција ми испрати принтани вести од Македонија, каде ја видов таа слика. Тоа се ваши класични злоупотреби и на предистрагата и на самата истрага, каде ги сликате осомничените и ги праќате по медиуми. Немало бегање и не сум променил град на престој по сознанието дека сум осомничен“, рече Палевски.
Потоа обвинителката му рече дека ако сакал можел и од самата пицерија да се пријави бидејќи бил баран со меѓународна потерница, а прашањето беше насочено кон тоа дали седел без намера да се пријави, Палевски одговори: „И еспресо пиев“.
Додаде и дека не барал полициска станица. На мониторот во пицеријата на сите вести во Турција се гледал себеси.
„Зошто да барам станица кога ќе ме најдат? На 2 декември Дејан Димовски, оној кој вистински ја водел истрагата, а не вие, барал од мојот адвокат Стојков преку телефон да му кажам каде се наоѓам, да му кажам каде сум се движел на 27 ноември. На полицијата ѝ кажав дека сум во Баликесир“, рече Палевски.
На денешното судење, обвинителката Жаклина Јосифовска го праша денеска Палевски каде всушност одел, зашто иако тврдеше дека го боли кичмата и одел во Белград по второ мислење за болеста, со себе немал ни едно ливче од медицинската документација.
„Имав две цедиња во куферот, обвинителството ми ги украде”, кажа Палевски.
Прашан беше и за дента кога беше грабнат и убиен 74-годишниот Панче Жежовски од Велес, и лицето кое вели дека го сретнал, но рече дека не може да се сети на неговото име и презиме. Додека ја шетав Хера, рече Палевски, среќавав многу луѓе.
„Кога и како ќе се осмели тоа лице да се појави пред судот не знам, но за разлика од ЈО, моите тврдења до сега, како и за пиштолот кој недостасува се поткрепени со материјални докази“, одговори Палевски.
Прашан дали однапред платил кирија за декември и покрај лошата финансиска состојба на партијата за да си обезбеди алиби, Палевски одговори: Токму затоа што не сум правел алиби како што сум можел покажува нешто друго, а не да грабнуваш и убиваш. Дополнително слушнавте дека обвинетите рекоа дека се плашеле од мене, тогаш зошто би убивал кога сум можел само да им наредам да го направат тоа.
Македонија
(Видео) Манасиевски: Филипче е послушник на Заев, кој сака да ги применува истите методи и шеми

„Дали методот евро за Вицето, е методот кој народот треба да го учи од Заев, според Филипче?
Дали Венко Филипче е воодушевен од Заев и тврди дека нема друг како него, заради начинот на кој рекетирал во Струмица?
Дали Венко Филипче е воодушевен од Заев, кој цела јавност го слушна како вели дека сите во Струмица на кои им легализирал објекти, плаќале по истата шема – евро за Вицето? Учи ли Филипче од Заев кој ја ограби Македонија, а после си донесе измени на Кривичниот законик со цел да не одговара за ништо?“, прашува Валентин Манасиевски, член на ЦК на ВМРО-ДПМНЕ.
Тој дополнително прашува и дали Венко Филипче се бори во политиката за власт, за да може да работи по методот на неговиот учител Заев – евро за Вицето.
„Добро е што Филипче јасно им даде до знаење на граѓаните, за никој да нема дилема, дека е ученик на Заев, негов послушник кој сака да ги применува истите методи и шеми, со кои ја опустошија Македонија“, додава Манасиевски.
Македонија
Уникатното охридско кајче претставено на Меѓународниот саем за наутика во Белград

Охридски „Зелен град“ го претстави уникатното охридско кајче со фотоволтаични панели и електичен мотор на Меѓународниот саем за наутика во Белград
Екоздружението „Зелен град“ од Охрид имаше забележително учество на Меѓународниот саем за наутика во Белград, Република Србија.
Се претставија со единствениот и уникатен експонат на саемот, традиционалното охридско кајче, на кое беа поставени фотоволтаични панели и иновативен електичен мотор.
„Бродскиот мотор е создаден со примена на напредната технологија на комбинирани намотки ‘славјанка’. Се карактеризира со голема моќност, што му овозможува да го движи кајчето без поголеми проблеми, со користење енергија од фотоволтаичните панели“, информираат од „Зелен град“.
На Саемот за наутика беа прикажани јахти, глисери, катамарани и мотори од најголемите светски производители.
„Меѓу нив нашето кајче беше единствено со поставени фотоволтаични панели, со електромотор и изработено од еколошки материјал – дрво и метал. Се планира да се направат уште неколку тестови со фотоволтаичните панели на Охридското Езеро и со тоа да се иницира транзиција на водниот транспорт до еколошки извори на енергија за зачувување на чистотата на водата, флората и фауната на езерото“, потенцираат од „Зелен град“.