Според првичните информации, работникот Вецко Костадиновски починал откако блудожерот што го управувал се превртел во бездна, во рудникот за јаглен „Суводол“ на РЕК Битола.

Како што истакна директорот на РЕК „Битола“, Златко Ќурчиевски, работникот извршувал редовна работна задача – поместување на транспортна лента за јаловина. Трагичниот настан се случил во ноќните часови, во текот на третата смена. Ќурчиевски вели дека според првичните сознанија, биле запазени сите мерки за безбедност и заштита на работникот, а булдожерот бил во исправна состојба и со извршен редовен сервис во март оваа година.

Имајќи предвид дека рудникот „Суводол“ неодамна беше погоден од елементарна непогода, надлежните уверуваат  дека несреќата не била директно поврзана со санационите активности што таму се изведуваат.

Генералниот директор на АД ЕСМ, Васко Ковачевски, најави дека ќе се формира комисија која ќе го истражи настанот и ќе се земат предвид сите околности. Тој нагласи дека при несреќата немало други присутни работници.

„Настанот е случен во движење, на место оддалечено од другите работни позиции и тоа уште повеќе ни отежнува во овој момент за да дознаеме која е вистинската причина за оваа трагедија“, вели Ковачевски.

По итниот состанок на Управниот одбор на АД ЕСМ и стручниот колегиум на РЕК „Битола“, Ковачевски изрази длабоко сочувство до семејството на починатиот.

„Дозволете ми да изразам најдлабоко сочувство до најблиските на починатиот работник Вецко Костадиновски. Загубивме чесен и вреден работник, често наградуван, кој беше пример и беше секогаш на ниво на своите задолженија. Како компанија ќе преземеме сè да му помогнеме на семејството и неговите најблиски во овие најтешки моменти за нив и ќе бидеме тука и во иднина“, изјави Ковачевски.

Полиција, истражен судија и обвинител, извршија увид на лице место, по што ќе бидат утврдени околностите во кои се случи несреќата. Телото на покојниот е предадено на обдукција за да се утврдат причините за смртта.