Македонија
Рашковски реагира за мекиците што ги делеше младината на ВМРО-ДПМНЕ
Ексгенералниот секретар на Владата, Драги Рашковски, реагира на акцијата на УМС ВМРО -ДПМНЕ, кои денеска делеа мекици на минувачи, со цел, како што рекоа, да му помогнат бидејќи „сега кога повеќе не е на функција и кога повеќе не дели мекици за своите деца, неговите приходи се сигурно намалени“.
Рашковски од името на своето семејство иронично им се заблагодари за грижата во однос на нивната финансиска состојба по неговото заминување од Владата и им порача да се занимаваат со други теми, како што се сообраќајните незгоди или новите технологии.
„Навистина сте се потрудиле да бидете забавни и со високо ниво на сатиричност со спроведувањето на вашата акција, но додека вие си играте со мојот и со угледот на мојата фамилија и за времетраењето на вашата акција, на неколку метри од вашиот перформанс, во тој период својот живот во сообраќајни незгоди го изгубија две лица. Додека вие правите перформанси за забава, нашата земја, за жал, сѐ уште сме на врвот на листата по број на жртви од сообраќајни незгоди. Наместо млади и прогресивни луѓе, како што се претставувате, да се занимавате со нови технологии што треба да нѐ направат европска држава и да ни го олеснат секојдневието, вие подлегнувате на ниски страсти и недостоинствена политика од која никој нема никаква корист“, вели Рашковски.
Во реакција тој ги повика младите од ВМРО-ДПМНЕ да присуствуваат на секое судење за лично да се уверат дека во неговото работење нема ниту едно криминално дејство, ниту еден денар, пари на граѓаните, не се злоупотребени ниту, пак, е прекршена каква било процедура при јавните набавки.
„Јас нема да ви сугерирам од каде потекнува мојот и имотот на моето семејство, кој е плод на 20 години работен ангажман, за кои средства може слободно да проверите дека секоја година уредно се пријавувани како до УЈП така и до ДКСК, туку доколку ги следите судењата, самите сакам да заклучите дека целокупниот имот е стекнат на легален начин. Од вас како прогресивни сили очекувам да поддржите проекти што спасуваат животи независно од политичката определеност на учесниците во сообраќајот“, порача Рашковски.
На акцијата со мекиците претходеше вчерашната изјава на Драги Рашковски, кој по судското рочиште, рече дека не постои промена во неговата имотна состојба, освен во подароците што ги добивале неговите деца по повод родендени, крштевки, мекици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николовски: Системот на злоупотреби што го создаде Владата ја уништи довербата – земјоделците повторно ќе ја плататат цената
„Колку пати алармирав и предупредував дека во Агенцијата за финансиска поддршка на земјоделството и руралниот развој се создава систем на клиентелизам, влијанија и злоупотреби?“, порача поранешниот министер за земјоделство, Љупчо Николовски, реагирајќи по апсењето на директорот на Агенцијата при земање мито.
„Јавно укажував дека ИПАРД 3 ќе крахира, дека со вакви практики се загрозува кредибилитетот на државата пред Европската комисија и се става под ризик целата програма вредна околу 100 милиони евра – пари наменети за развој на македонското земјоделство“, изјави Николовски.
Според него, денешниот скандал е директна последица на политичко поставување на луѓе без интегритет и без компетенции.
„Ова не е изолиран инцидент, туку резултат на владеење кое ги заменува вредностите и професионалноста со партиска послушност“, нагласи тој.
Николовски потсети дека за време на неговиот мандат ИПАРД 2 програмата беше 100% искористена, со 2.369 договори и реализирани инвестиции.
„Срамно е целиот тој успех и довербата што ја изградивме со Европската унија да биде уништена за само една година поради корупција и лични интереси“, додаде тој.
Тој предупреди дека постои реална опасност Европската комисија да ја стопира ИПАРД 3 програмата за Македонија, што би значело блокада на сите исплати и нови повици.
„Ако се случи тоа, земјоделците повторно ќе бидат жртви на корупцијата и неспособноста на оваа власт“, порача Николовски.
Поранешниот министер побара итна одговорност и расчистување со злоупотребите:
„Време е за целосна одговорност. Македонија не смее да си дозволи да ја изгуби довербата во европските институции поради поединци кои го претворија земјоделството во извор на мито и политички влијанија.“
Македонија
Делови од Центар и Сарај в понеделник без вода
Од ЈП Водовод и Канализација, известуваат дека зафатот кој беше најавен за денеска поради одредени технички пречки се одложува за понеделник.
Поради изведување на водоводен приклучок ф-100мм на ул. Христо Смирненски 13, од 09:00 часот до завршување на интервенцијата, прекинато водоснабдување ќе имаат корисниците од дел од истата улица, поточно потегот од Зур – Маркет до бул. Партизански Одреди, во општина Центар.
Исто така во понеделник ќе се изврши редовно чистење на резервоарот за питка вода во село Рашче. За време на активностите во периодот од 09:00 – 13:00 часот, прекинато водоснабдување ќе имаат корисниците од населените места: Рашче Копаница и Бојане, општина Сарај.
Македонија
До понеделник променливо облачно време со локални врнежи од дожд
Променливо облачно време со локални врнежи од дожд кои повремено ќе бидат пообилни. Процесите ќе бидат поинтензивни во форма на невреме со пообилен пороен дожд (над 30 l/m² за 24 часа), засилен ветер и појава на грмежи. Ќе дува умерен до засилен ветер од јужен, а долж Повардарието од југоисточен правец. Минималната температура ќе биде во интервал од 6 до 12, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува умерен до засилен југоисточен ветер. Минималната температура ќе се спушти до 10, а максималната ќе достигне до 16 степени.
Времето во наредните денови
Под влијание на влажна и нестабилна воздушна маса до понеделник ќе преовладува променливо облачно време со локални врнежи од дожд кои повремено ќе бидат пообилни. Процесите ќе бидат поинтензивни во форма на невреме со пообилен пороен дожд (над 30 l/m² за 24 часа), засилен ветер и појава на грмежи. Од вторник се очекува стабилизирање на времето.

