Македонија
Рекордни 12.000 учесници од 58 држави пријавени на „Визер скопскиот маратон“

15. јубилеј на најмасовната спортска манифестација во државата, „Визер скопски маратон“, ќе се одржи утре, со почеток во 8:30 часот во срцето на Скопје, пред Собранието на Република Северна Македонија. Тимот на „Визер скопски маратон“, Сојуз на спортови на Скопје, порача „Најголемиот спортски спектакл е подготвен!“. Тие повторно се надминаа и го срушија рекордот со тоа што се пријавија над 12.000 учесници од 58 држави.
„Оваа година за оваа манифестација Градот Скопје од својот буџет издвои 1.500.000 денари, а ги стави на располагање и сите јавни претпријатија под негова ингеренција, кои беспрекорно ја вршат својата работа и за тоа им упатувам јавна благодарност. Ги повикувам сите граѓани на Скопје утре да излезат во што поголем број, да им посакаат добредојде и да им пружат поддршка на сите учесници, спортисти и рекреативци“, истакна градоначалникот на Град Скопје, Петре Шилегов, како домаќин на манифестацијата. Тој додаде дека особено го радува фактот што меѓу натпреварувачите годинава се пријавени и околу 60 вработени во администрацијата на Градот Скопје.
„Ние веруваме дека не можат да се постават маргини на спортот и на здравиот начин на живеење. Затоа секојдневно се трудиме да се надминеме себеси во нашата работа. Колку подобри чекори ќе дадеме, толку повеќе луѓе се пријавуваат и влегуваат во светот на спортот. Со ова убедување успеавме 15. јубилеј да го направиме за сеќавање и да го срушиме рекордот со тоа што се пријавија над 12.000 учесници од 58 држави од целиот свет. Воведовме новини во секој сегмент и дадовме сѐ од себе да го зајакнеме хуманитарниот карактер на настанот. Секој можеше да донира преку givengain.com и да учествува на бесплатните тренинзи кои беа поддржани од страна на Делегацијата на ЕУ во склоп на нивното покровителство на штафетниот маратон ‘ЕУ за спорт’. Воедно, оваа година стартот го преместивме пред Собрание во очекување на големиот интерес. Исто и патеките беа подложни на промени со цел да им биде полесно на учесниците. Тие беа измерени од страна на официјални претставници од ИААФ и АИМС и се обнови постоечкиот сертификат за точност исполнувајќи ги сите стандарди за учество на Олимписки игри и Светски првенства“, рече Кире Синадиновски, директор на „Визер скопски маратон“. Тој додаде дека од клучно значење е да излезат навивачите и да ги бодрат учесниците. Ги повика да се пријавуваат за најдобар транспарент и најдобра фотографија посочувајќи дека и оваа година има околу 30 музички точки по должина на патеката на кои можат да им се приклучат.
„Според техничките податоци и бројката на пријавени учесници можеме да забележиме дека ‘Визер скопскиот маратон’ може да напредува. 58 земји учеснички. Тоа воопшто не е мала бројка. Очекувам оваа година да имаме и 7 домашни тркачи кои ќе ја скршат границата од 3 часа, што е многу значајна за напредокот на овој спорт во државата“, вели маратонецот Александар Кираџиев.
„Ја користам оваа можност да ги повикам сите скопјани да излезат на улиците затоа што тоа на маратонците многу им значи“, посочи рекордерката Адријана Поп Арсова.
Утре од 18:30 до 21:00 во „Парк Хотел и спа“ во ресторанот Brick Eat ќе се одржи хуманитарна паста парти. Купонот за паста парти по цена од 100 ден. може да се купи при подигнување на стартен број или на самата забава. Сите средства собрани од хуманитарниот настан ќе бидат донирани за Проект Среќа.
Подигнувањето на стартните пакети за „Визер скопски маратон 2019“ е вчера и денеска во „Парк Хотел и спа“. Работното време на центарот денеска е од 10.00 до 20.00 часот.
„’Парк Хотел и спа’ веќе трета година по ред е горд партнер на оваа елитна спортска манифестација и е домаќин на маратонците кои оваа година ќе бидат дел од ‘Визер скопскиот маратон’. И понатаму ќе бидеме дел во вакви проекти, од наскоро зајакнати со нов член на Parkland Hospitality Group семејството – новиот хотел со 4 ѕвезди ‘Некст дор Парк хотел’, веднаш до ‘Парк Хотел и спа’“, порачаа од „Парк Хотел и спа’.
„Визер скопскиот маратон“ е под покровителство на Делегацијата на Европската Унија, Град Скопје и Агенција за млади и спорт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Даниловски алармира: Глувците во Скопје шират ризик од болести, преминат е Рубиконот, потребна е итна интервенција

Епидемиологот проф. д-р Драган Даниловски предупреди дека Скопје се соочува со закана за јавното здравје, повикувајќи на итна, координирана интервенција на сите надлежни институции.
Тој потсети дека неодамна дете било каснато од глушец во училишен двор во чија близина имало насобран отпад, што, според него, е „црвена линија што не смееше да се премине“. „Преминат е Рубиконот. Нема назад“, порача Даниловски.
Епидемиологот предупредува дека во услови на постојано натрупан отпад и недоволна дератизација, градот станува биолошки резервоар на зарази.
„Купиштата ѓубре создадоа идеални услови за развој и размножување на глувци и стаорци – познати преносители на сериозни заразни болести: лептоспироза, хантавирус, па дури и бубонска чума. Тие болести се пренесуваат преку урината, изметот, плунката и болвите на глодарите. Познато е дека стаорците се размножуваат според експоненцијална прогресија: во период од само 18 месеци еден пар може да даде повеќе од еден милион потомци. Тоа е биолошки факт. Експоненцијалниот модел претпоставува неограничени ресурси како храна, вода и простор. Таа претпоставка во Скопје е исполнета!“, напиша Даниловски.
Додава и дека историјата нè потсетува дека неконтролираното ширење на глодари може да има катастрофални последици. Во Средниот век, меѓу 1347 и 1352 година, како пример во таа насока, бубонската чума („црната смрт“) однесе од 75 до 200 милиони животи – речиси половина од населението на Европа.
Повика на најитна, координирана интервенција на сите надлежни институции – по потреба и со прогласување вонредна состојба на делови од територијата на градот. Првенствено заради дезинфекција, дезинсекција, дератизација и отстранување на ризикот по јавното здравје.
„Во медицината постои еден етички принцип – Primum non nocere („пред сè, не прави штета“). Тој принцип мора да важи и надвор од медицината: за сите професии и институции што имаат допир со граѓаните. Причините – организациски, политички или финансиски – стануваат ирелевантни кога се доведува во прашање здравјето и безбедноста на децата и граѓаните.“ нагласи тој.
Македонија
ВМРО-ДПМНЕ: Арсовска да каже која одлука за „Комунална хигиена“ не била изгласана од нашите советници

Советничката група на ВМРО-ДПМНЕ и Коалицијата реагираше на тврдењата на градоначалничката Данела Арсовска, која утрово на социјалните мрежи напиша дека одговорноста за состојбата со ѓубрето низ Скопје е кај кадрите на ВМРО-ДПМНЕ и ВЛЕН во Советот на Градот и управниот одбор на ЈП „Комунална хигиена“.
Од партијата велат дека сите одлуки предложени од Арсовска и поврзани со претпријатието биле усвоени од страна на советниците на ВМРО-ДПМНЕ, и ја обвинуваат градоначалничката дека „измислува“ криза за политичка корист.
„Советниците на ВМРО-ДПМНЕ и Коалицијата гласаа за сите одлуки предложени од страна на Арсовска, а кои беа поврзани со ‘Комунална хигиена’. Апелираме да каже која одлука врзана со тековното работење на претпријатието не е изгласана од советниците?“ стои во реакцијата.
Од партијата додаваат дека тезата на Арсовска дека проблемот е намерно создаден е „површна, неточна и нелогична“.
„Зошто ВМРО-ДПМНЕ во сред изборна кампања би го ставило Скопје во ѓубре, ако се знае дека товарот и негативата ќе одат на сметка на ВМРО-ДПМНЕ? Арсовска треба да одговори зошто не се собира ѓубрето и што се прави со парите кои граѓаните уредно ги плаќаат“, наведуваат од партијата.
Тие побараа да се испита и кривичната одговорност на надлежните за хаосот со сметот, оценувајќи дека зад него стои „тајна коалиција која четири години ја поддржуваше Арсовска“.
„Ова го прави некој што сака да наштети на ВМРО-ДПМНЕ во изборна кампања. Ќе дојде крајот на ова и ќе има одговорност“, се вели во реакцијата.
Во објавата претходно, Арсовска обвини дека Советот не презел мерки за нормално работење на претпријатието, ниту ги разрешил управниот и надзорниот одбор на „Комунална хигиена“ кое е составено од кадри на ВМРО-ДПМНЕ и Влен, и надлежно за носењето на сите одлуки поврзани со работата на претпријатието.
Македонија
Мециновиќ прифати дебата на Телма телевизија

Амар Мециновиќ, кандидатот за градоначалник на Град Скопје од редовите на Левица, утрово на социјалните мрежи сподели дека прифатил покана за дебата на телевизија Телма.
„Добро утро Скопје, дебата на Телма за следниот четврток.
Со задоволство ја прифаќам поканата на телевизијата Телма за учество во дебатата за главниот град со мојот противкандидат.
Во духот на демократијата и витешката борба, сметам дека сите дебати се добродојдени“, напиша тој на социјалните мрежи.