Македонија
Ременски:Телото за помирување може да бара и одговорност, не само амнестија

Состанокот на координативното тело за помирување и интеграција, кој требаше да се одржи вчера, се одложи за идната недела. Според информациите оттаму, на двете копретседателки кои ќе го водат телото, Фросина Ременски и Емилија Александрова им било потребно дополнително време за консултации со сите вклучени во процесот. Понеделник се исклучува како иден можен термин, со оглед на тоа дека за во понеделник веќе е закажана нова пленарна седница, а во четврток се одржува редовната за пратенички прашања, најверојатно вторник или среда би можело конечно да се одржи првата средба на ова новоформирано тело.
Првото прашање за кое јавноста очекува одговори од Телото за помирување е т.н. нов закон за амнестија , кој според најавите е во подготовка и за што претходно се тврдеше дека би можел да биде доставен како предлог до средината на декември, а ќе ги опфати сите учесници во инцидентите на 27 април, кои не извршиле насилство. Но, една од копретседателките, Ременски, за „Макфакс“ вели дека е рано да се говори за готово законско решение , бидејќи се уште немале ниту еден состанок и додава дека помирувањето е широк процес кој не може да се поврзува со поединци, партија или само со еден настан. Помирувањето, како што вели таа, не значи само амнестија, туку и одговорност.
„ВМРО-ДПМНЕ треба да ја преиспита одлуката да не учествува во Координативното тело за помирување, тоа е широк и обостран процес. Почитување на одлуките на телото и учество во креирањето на одлуките не е исто, бидејќи може да произлезат и препораки за кои треба одговорност. За мене и мојата пратеничка група многу е важно да не се наруши владеењето на правото како услов за ЕУ, имаме консултации и со експерти за ова“, вели Ременски.
Ременски додава дека на првиот состанок ќе биде утврдена методологијата за работа, а ќе се отворат и повеќе теми за меѓуетничките односи, за радикализацијата на младите, за одговорноста на организаторите на спортски настани, како и за говорот на омраза. Принципот на работа на телото ќе биде по пат на консензус. Во него членуваат 20-тина пратеници, претставници на сите парламентарни партии и независни пратеници, со исклучок на ВМРО-ДПМНЕ.
Од ВМРО-ДПМНЕ остануваат на ставот дека не сакаат да бидат дел од Телото за помирување, зашто според нив водело кон селективна правда. Тие предложија закон за целосна амнестија за 27 април, кој е точка на дневен ред на седницата во понеделник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Надлежните се борат со 11 активни пожари: Гори кај Прилеп, Македонски Брод, Штип

Според најновите информации, на територијата на државата се евидентирани вкупно 25 пожари на отворен простор. Од нив, 11 се сѐ уште активни, 3 се под контрола, додека 11 се целосно изгаснати.
Активни пожари се регистрирани во неколку региони. Во источниот дел, пожарите зафатија подрачја кај селото Нивичино, планината Голем Готен и Малешевските Планини, каде што гори нискостеблеста шума и грмушки. Во Прилеп гори на две локации – кај селото Бешиште, со проширување кон Градешница и кон границата со Грција, како и кон селото Дрен. Во Македонски Брод активни се два пожари – кај селото Црешнево и меѓу селата Локвица и Крапа.
Штипскиот регион се соочува со пожар меѓу селата Драгоево и Селце, а во Карбинци гори кај селото Јунузлија. Во близина на Скопје, пожар е активен кај селото Гумалево во општина Зелениково. Во северниот дел на државата, активни пожари се бележат и кај селото Руѓинце во Старо Нагоричане, како и во Куманово – во населбата Ристово Трло и кај селото Романовце.
Три пожари се ставени под контрола. Станува збор за пожарите кај селото Грешница во Македонски Брод, меѓу селата Церово и Групчин во општина Желино и на улицата Брсјачка Буна во Шуто Оризари, каде што гореше дива депонија.
Изгаснати се 11 пожари во различни делови на државата, меѓу кои во Шуто Оризари кај Општината, кај касарната во Прилеп, во селата Долно Перово и Прељубје во Ресен, како и во неколку населени места во Кочани, Куманово, Липково и Гостивар.
Надлежните служби остануваат на терен и продолжуваат со активности за справување со активните пожари и заштита на населението и природата.
Македонија
(Видео) Тошковски: Вложуваме во нашите луѓе – во нивната обука, џудо тренинг сесии со врвен тренер

Министерот за внатрешни работи Пначе Тошковски денеска во Центарот за обука во Идризово присуствуваше на џудо тренинг сесија на полициските специјалци со инструктор од Интернационалната џудо федерација специјализиран за обука на полициски и армиски специјални единици. Оваа соработка произлегува од неодамна Меморандум за соработка помеѓу министерствата за внатрешни работи и министерството за спорт и Меморандумот за разбирање помеѓу Националната џудо федерација и Европската џудо федерација кој беше потпишан на Европското првенство во џудо за кадети кое се одржа во Скопје минатиот месец.
„Вложуваме во нашите луѓе – во нивната обука, знаење и подготвеност. Градиме силна, професионална и подготвена полиција, способна да одговори на современите безбедносни предизвици и ефикасно да се справува со криминалот. Затоа, особено внимание посветуваме на континуираната физичка подготвеност посебно на специјалните единици. Овие тренинг сесии со врвен џудо тренер се со директен ангажман на претседателот на европска џудо федерација Ласло Тот. Неодамна преку министерството за спорт и европската џудо федерација ја опремивме салата со специјализираните душеци – татами и кимона за полициските службеници. Планираме и за во иднина сеопфатни програми за физичка обука на полициските службеници“, потенцираше министерот Тошковски.
Македонија
(Видео) Грета Тунберг по Тетово стигна во Скопје, ќе дискутира за империјализмот и ќе протестира за спас на Дошница

Еко-активистката Грета Тунберг преку видео-обраќање на Инстаграм соопшти дека се наоѓа во Скопје и дека ќе учествува на неколку настани поврзани со социјални и еколошки прашања во Македонија.
Таа најави присуство на јавната дискусија што ќе се одржи во Социјалниот центар „Дуња“ под наслов „Стоп за воената машинерија: Борбата против империјализмот и капиталистичките војни“.
Во обраќањето, Тунберг додаде и дека ќе се приклучи на протестната блокада за спас на реката Дошница на планината Кожуф, која е најавена за утре.
View this post on Instagram
Таа истакна дека настаните во Газа не се изолирани од климатската криза, а според неа, тоа е истиот насилен систем изграден врз експлоатација, окупација и профит над животот.
Активистката ја спомена и одлуката на македонскиот парламент, кој вчера гласаше против испраќање хуманитарна помош во Газа, додавајќи: „Мора да застенеме солидарно, да се поврземе и да се спротивставиме заедно“.
Грета вчера беше во Тетово, каде што ја посети новата локација на Општествено-културниот центар, која се уредува со заеднички волонтерски ангажман и поддршка од меѓународни партнери. Пред да пристигне во Македонија, Тунберг учествуваше на протест во Тирана, каде што повика на итен прекин на израелската опсада врз Газа и остро ја осуди.