Македонија
Ристески: Нема простор за згради во Лисиче, Муцунски да го повлече спорниот ДУП

Нема простор за згради во Лисиче! Ова е ставот на нашите сограѓани од насеба Лисиче, во врска со коригираниот предлог Детален урбанистички план за градска четврт ЈИ 09, блок 09.01.
СДСМ доследно стои на страната на Лисичани и нема намера да поддржи никакви компромисни решенија на штета на граѓаните.
Тимчо Муцунски и ВМРО-ДПМНЕ уште еднаш ги излажаа граѓаните. Очигледно Муцунски нема намера да се откаже од намерата за изградба на највисоката висококатница, за која е предвидено да брои 12 ката, односно приземје, 10 ката и поткровје.
Токму под оваа предвидена 12-катница поминува и гасоводна цевка со пречник Фи 426 милиметри, што претставува реална пречка не само за градење, туку и за планирање на нови градби во оддалеченост од најмалку 30 метри лево и десно од гасоводната цевка.
Уште еднаш се докажа дека профитот на поединци за ВМРО-ДПМНЕ е секогаш пред интересите на жителите на Лисиче и Аеродром.
Третата јавна анкета за новиот предлог-ДУП за Лисиче е во тек и ќе трае до среда 16 август. Јавната презентација за овој ДУП ќе се одржи во вторник, на 15 август, во просториите на ОУ „Димитар Македонски“ со почеток во 17 часот.
Закажувањето на нова јавна анкета во време на летните одмори со надеж дека така ќе привлече помало внимание е уште еден обид „на мала врата“ да се протурка бетонизација на една од најубавите скопски населби, на директна штета на здравјето и комодитетот на граѓаните, рече денеска Милутин Ристески, координатор на советничката група на СДСМ и коалицијата во Советот на општина Аеродром.
– Ги охрабруваме нашите сограѓани да ја искористат законската можност преку масовно излегување на јавната анкета уште еднаш да го потврдат ставот дека простор за згради во населба Лисиче нема! Го потсетуваме градоначалникот Муцунски, граѓаните ја бараат ветената хумана урбанизација на Аеродром која подразбира подигнување на нови паркови и зелени површини, а не нови 12 катници во урбаното јадро на општината, рече Ристески.
Тој додаде дека советничката група на СДСМ и коалицијата во Советот на Општина Аеродром најостро го осудува ваквиот игнорантски однос кон барањата на Лисичани. Бараме повлекување на спорниот ДУП на доработка, без лажни компромиси на штета на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Љутков ги погази правата на културните работници: СДСМ бара итна исплата на платите

Сегашната ситуација во културата говори за целосно погазување на Колективниот договор и погазивање на правата на културните работници, вели Богданка Кузеска портпаролка на СДСМ.
„И во интервју на министерот Љутков го слушнавме како кажа без срам за колективниот договор за Култура дека е незаконски а тоа е напад на достоинството и правата на сите културни работници во државата. Колективниот договор не е проблем туку потреба за работниците и претставува законска обврска. Тој договор е резултат на борба на работниците, на дијалог и праведна политика на СДСМ кога беше на власт и кога платите во културата беа покачени а се исплаќаа редовно и со почитување на сите права на вработените“.
Денеска, додава таа, за жал културните работници се без плата за месец март и празниците така ги поминаа, а гледаме дека никој не понесе одговорност.
Ова, според неа, е последица на неспособност и распиничко трошење и целосно потфрлање на министерот за култура и владата на ДПМНЕ.
Како што оценува Кузеска, прашање е дали нападот на колективниот договор е најава за ново кратење на правата на вработените во културата и тоа по партиски терк.
„Неговата неспособност не е никакво оправдување. СДСМ бара целосна исплата на мартовската плата, покачена според колективниот договор за културните работници и негово целосно почитување“.
Македонија
Не е време за пиво и скара, туку за протест за 500 евра минимална плата и 100 евра зголемување на другите плати, повика ССМ

Овој Први мај, место марш, Сојузот на синдикатите на Македонија (ССМ) најави протест оти платите се мизерни, најниски во регионот, не се зголемуваат во согласност со потпишаните договори и Владата и работодавците одбиваат да ја зголемат минималната плата на 500 евра и да ги зголемат сите други плати за најмалку 100 евра. Претседателот на ССМ, Слободан Трендафилов, ги повика синдикатите здружени во ССМ, нивните членови, но и сите други синдикати и поддржувачи на работничките права, место на скара, да излезат на протест.
„Недостоинствените услови за работа и недостоинствените плати се главниот мотив оваа година на Први мај да протестираме, а не да маршираме. Има многу причини ‘за’, но ниедна против излегувањето на протест на Први мај. Денеска, за жал, огромен број работници во приватниот сектор уште немаат добиено плата за март. Денеска, огромен број институции во јавниот сектор немаат добиено плата за март 2025 година. Ако тоа што ви се ниски платите, ако тоа што не добивате плата не е доволен мотив да ни се придружите на Први мај, тогаш треба да знаете – колку ќе дојдете и колку ќе дојдеме – толку и ќе добиете и толку ќе добиеме. Нè бројат и Владата и работодавците. Поканата е отворена за сите што сметаат дека треба да ни се придружат на овој Први мај заедно да покажеме дека минималната плата во Македонија е мизерна во однос на најниската во регионот. Ако во некоја држава минималната плата е на дното во регионот, во Македонија минималната плата го проби и дното. Не е време за пиво и скара, време е за борба за работничките права“, рече претседателот на ССМ, Трендафилов.
Протестот ќе почне во 11 часот пред Работничкиот дом на Први мај. Трендафилов апелира работниците да покажат единство оти живеат од плата, не од политика, и масовно да излезат да го искажат незадоволството. Тој нагласи дека пет месеци нарочно не се утврдува репрезентативност на ССМ за да не се одржи седница на Економско-социјалниот совет, на која Владата ќе мора или да го прифати или да го одбие предлогот на ССМ минималната плата да се покачи на 500 евра.
Македонија
Добро е што СДС, конечно, ги тргна розовите очила и виде во каква состојба ја остави државата, велат од ВМРО-ДПМНЕ

Добро е што СДС конечно ги тргна розевите очила и виде во каква состојба ја оставија државата, Владата контиуирано ги зголемува платите, велат од ВМРО-ДПМНЕ во реакцијата на изјавата на Богданка Кузеска од СДСМ.
„СДС очигледно мислат дека работите се поправаат со магично стапче. Да им појасниме, пустошот во кој ја оставија Македонија на секој план, не се поправа преку ноќ. Еве неколку факти за подобрување на животниот стандард кој СДС успеа да го уништи за седум години власт. Прво, припадниците на МВР добија зголемување на платите за 10%. Второ, вработените во основните и средните училишта добија зголемување на платите за 7%, или за мандатот во образование платите ќе се зголемат за 46%. Трето, во здравството се зголеми капитацискиот бод за матичните лекари и гинеколозите за речиси 40 проценти, додека за стоматолозите околу 25%. За период од четири години предвидено е зголемување на платите во здравството до 50 отсто“, пишува во реакцијата.