Македонија
Ристовски: Јанева со новите истраги продолжи со партиските нарачки од СДСМ

Со денешното отворање на новите истраги од Специјалното јавно обвинителство, Катица Јанева продолжи со уште една партиска нарачка и со непрофесионалното, политичко постапување на СЈО, сметаат од ВМРО-ДПМНЕ, откако претходно ова обвинителство ги објави двете нови изтраги „Тарифа“ и Тенк“.
„Ова е уште еден дефокус на Катица Јанева од срамната одлука за повлекување од предметот „Пуч“. Катица Јанева го загуби професионалниот кредибилитет во замена за улогата на политички инструмент на Зоран Заев“, рече Спиро Ристовски, од ВМРО-ДПМНЕ.
Според него недозволиво е Катица Јанева шести ден да се крие и да не коментира ништо околу срамната и скандалозна одлука да се повлече од предметот „Пуч“ и директно да се стави во заштита на аболицираниот Зоран Заев.
„Го нема ниту Зоран Заев, да побара преиспитување на одлуката, укинување на аболицијата и враќање на предметот во суд каде ќе се докаже дали е одговорен за криминалот или не. Додека Катица Јанева и Зоран Заев се кријат и молчат, целата јавност ги очекува одговорите зошто Ѕвонко Костовски потпишал спогодба со судот и го признал делото? Дали на Ѕвонко Костовски, според Катица Јанева му се лежело во затвор или истиот бил соочен со бројни докази и заради тоа признал и се спогодил за пониска казна? Дали скајп комуникацијата меѓу обвинетите во случајот „Пуч“ е измислена или е обезбедена во рамки на истрагата и ги потврдува нивните мотиви? Овие прашања за жал остануваат неодговорени од страна на Заев и Катица, а целата јавност го знае одговорот“, рече Ристовски./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Судот оваа недела ја завршува оценката на обвинението за „Пулс“

Скопскиот Кривичен суд најави дека до петок ќе ја донесе одлуката дали обвинението за пожарот во кочанската дискотека ќе биде прифатено. Судиите треба да утврдат дали актот е јасен, правно издржан и поткрепен со доволно докази.
Постапката се одолговлекуваше поради тоа што дел од адвокатите на обвинетите не биле достапни за прием на документацијата, но сега, според судот, сите рокови истекуваат на 3 октомври.
Премиерот Христијан Мицкоски изрази незадоволство од начинот на кој обвинителството ја води постапката и порача дека сите поврзани со случајот мора да одговараат. Од опозициската СДСМ, пак, обвинија дека власта ги штити своите функционери кои биле чести гости во дискотеката.
Во пожарот загинаа 62 млади луѓе. Паралелно се води и истрага за 29 полициски службеници, за кои сè уште се анализираат доказите.
Македонија
Можност за воведување на нови авиолинии, тема на средбата меѓу вицепремиерот Николоски и шведскиот амбасадор Солстром

Заменик претседателот на Владата и министер за транспорт Александар Николоски денеска оствари работна средба со новоименуваниот амбасадорот на Шведска, Ола Солстром.
На средбата, вицепремиерот Николоски го запозна амбасадорот со владината програма во делот на капиталните проекти и вклученоста на Македонија во регионалните инфраструктурни проекти со што сe дава придонес во развој и промоција на регионалната соработка.
Се разговараше и за можностите и услови за инвестирање што ги нуди Македонија и јакнење на економската соработка.
Исто така, вицепремиерот Николоски ја отвори и темата за поквалитетна поврзаност меѓу двете земји и можностите за зголемување на авиолиниите меѓу Македонија и Шведска.
На средбата беа потврдени добрите билатерални односи меѓу Македонија и Шведска кои традиционалнo се пријателски. Двајцата соговорници ја нагласија потребата од интензивирање на соработката во дејностите од заеднички интерес за двете земји.
Македонија
Нова програма за Тетово на Касами: бесплатен јавен превоз, 100 евра за првачиња, нови училишта, жичница

Кандидатот за градоначалник на Општина Тетово, Билал Касами, денес одржа прес-конференција на која ја претстави својата изборна програма за следниот четиригодишен мандат.
Касами истакна дека изминатите четири години биле посветени на итни интервенции и решавање на основните проблеми со инфраструктурата, финансиската стабилизација и редот во општината.
– „Тетово денес е многу подобро отколку што беше пред 4 години. Успеавме да реализираме стотици проекти и да вратиме долг од 9 милиони евра. Сега сме подготвени да преминеме на ново поглавје – развој и модернизација на градот“, истакна Касами.
Во својата програма за 2025–2029 година, тој предвидува целосно решавање на проблемите со водоснабдување и отпадни води, модерна канализациона и улична инфраструктура, електрични автобуси и бесплатен јавен превоз, дигитализирани јавни услуги и стратегија за паркирање.
Посебен фокус е ставен на образованието со целодневна настава, нови лаборатории, подобрени услови во училиштата и субвенции од 100 евра за секое дете запишано во прво одделение.
Програмата предвидува и урбанистичка трансформација на Тетово со нов Генерален урбанистички план, изградба на Плоштад со подземен паркинг, катни гаражи, пешачки подвозници и жичница Тетово–Лисец–Попова Шапка.
„Вториот мандат ќе биде мандат за брз развој, за европски стандарди во секоја сфера, за заживување на културата, спортот и туризмот, но и за грижа за најранливите категории“, нагласи Касами, додавајќи дека сите проекти се базирани на конкретни стратегии и финансиски планови.
Тој порача дека Тетово не смее да се врати назад во „ерата на хаос, анархија и корупција“ и дека новата програма е „договор за работа“ кој ќе се реализира доследно.