Македонија
РСБСП: Да возиш пијан, значи дека не го почитуваш човечкиот живот
Законот за безбедност на сообраќајот на патиштата вели дека возачот не смее да управува со возило во сообраќај на пат, ниту да започне да управува со возило ако е под дејство на алкохол, велат од Републичкиот совет за безбедност на сообраќајот на патиштата и додаваат дека толеранцијата на алкохол за возач почетник е приближно еднаква на нула.
Казнените санкции, во зависност од количината на алкохол во крвта, изнесуваат до 375 евра во денарска противвредност, односно до 60 негативни бода во возачката книшка, од максимум 100 и забрана за управување возило до 12 месеци, потсетуваа од РСБСП, велат законот е прецизен и јасен.
„Некои сметаат дека казните се високи и нереални. Други дека треба да бидат уште повисоки. Анкетното истражување на РСБСП покажува дека 85 % од возачите барем еднаш во животот возеле под дејство на алкохол. Реалноста е сурова и загрижувачка: секојдневно голем број сообраќајни незгоди се предизвикани од пијани возачи.
Зошто е тоа така? Затоа што возачите не ја сфаќаат сериозноста на проблемот и постојано бараат изговори како да го оправдат своето неразумно и непромислено однесување во сообраќајот и со тоа да ја помираат својата совест.
Управувањето со моторно возило под дејство на алкохол е чин што нема никаква смисла и логика за оправдување. Да се вози под дејство на алкохол не само што значи непочитување на Законот, туку и непочитување на основните хумани и цивилизациски вредности. Да возиш пијан значи дека не го почитуваш сопствениот живот, дека не ги почитуваш животот и здравјето на твоите најблиски, дека не го почитуваш човечкиот живот, без разлика за кој човек станува збор.
Судејќи според последиците, можеме да кажеме дека возењето пијан е исто како да насочиш оружје кон недолжен случаен минувач“, велат РСБСП.
Оттаму додаваат дека речиси нема возач кој не е свесен за штетното влијание на алкохолот врз способноста за управување со моторно возило.
„Истражувањата на РСБСП покажуваат дека дури 85% од возачите во Република Македонија барем еднаш управувале моторно возило под дејство на алкохол.
Па така, во обид да се помират самите со себе и делумно да ја помират својата совест, неодговорните возачи честопати наоѓаат изговори. Еден вели: „Сум возел и друг пат малку пијан, па ништо не ми се случи.“ Друг вели: „Мене алкохолот не ми влијае, можам да возам и пијан.“ Трет вели: „Од две-три пијачки не си пијан, можеш да возиш без никој да те забележи.“ Четврт вели: „Еднаш ако возиш пијан, не значи дека веднаш ќе направиш сообраќајна незгода.“ Вакви изговори, такви изговори и на крај 85 % од возачите барем еднаш управувале моторно возило под дејство на алкохол“, стои во соопштението на Републичкиот совет за безбедност на сообраќајот на патиштата.
Сообраќајните незгоди се случуваат секому, секогаш и секаде и тоа кога најмалку очекувате, посочува РСБСП и додава дека ниеден настрадан во сообраќајна незгода не ни сонувал дека баш него може да му се случи тоа.
Истражувањата покажуваат дека најголем број од сообраќајните незгоди во кои учествуваат пијани возачи завршуваат со сериозни и фатални последици. Најголем број од возачите кои возеле под дејство на алкохол патувале на кратко растојание до 20 километри. Впрочем, сигурно дека никој под дејство на алкохол нема да тргне на пат од 1 000 километри, велат од РСБСП во нивното соопштение.
Изговорите велат едно, статистиката покажува друго, додаваат оттаму, истакнувајќи го ставот на РСБСП: „Само една грешка, само еднаш, ама последиците се за секогаш, тие не прават разлика. Тие се фатални, трајни ненадоместливи, без можност за поправка, без можност за оправдување. Затоа, без изговори и без оправдувања. Пијан зад воланот, апсолутно никогаш“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Обвинителството побара притвор за директорот и за управителот на „Комунална хигиена“
Скопското обвинителство побара притвор за в.д. директорот на ЈП „Комунална хигиена“ – Скопје, Сабахудин Рустеми, и за еден управител за отпад во претпријатието во рамките на истрагата што се води против нив за кривично дело загрозување на животната средина и природата со отпад.
„Осомничените, од кои едниот в.д. директор, а другиот управител за отпад во ЈП ‘Комунална хигиена’ – Скопје, заедно постапиле спротивно на Законот за управување со отпадот и на својата основна дејност за редовно собирање и транспортирање безопасен отпад на подрачјето на град Скопје, како и на обврските предвидени во оперативната програма за собирање и транспортирање на комуналниот отпад и на оперативниот план за одржување на јавната чистота во градот. Со пропуштање на целосниот надзор над собирањето и транспортирањето комунален отпад, како и со непрописното управување со отпадот, тие овозможиле во текот на месецот да се создадат мали депонии на јавни и сообраќајни површини во близина на предвидените садови за собирање комунален отпад со што предизвикале значително оштетување на квалитетот на почвата, воздухот и водата и ги довеле во опасност животот и здравјето на луѓето од предизвикување заразни или други болести“, велат од Обвинителството.
Од таму додаваат дека ваквите сомненија се утврдени и констатирани со вонредните инспекциски надзори од овластените локални инспектори за животна средина кои излегоа на терен по насоки на јавното обвинителство, како и со експертско мислење за влијанието на отпадот врз јавното здравје и можноста за ширење заразни заболувања од ЈЗУ Институт за јавно здравје.
„Поради опасност од влијание врз сведоци и можност за повторување на делото, јавниот обвинител до Основниот кривичен суд Скопје достави предлог за определување мерка притвор за двајцата осомничени“, соопшти Обвинителството.
Македонија
Директорот на „Комунална хигиена“ и раководителот сè уште во полициска станица
Директорот на ЈП „Комунална хигиена“ – Скопје, Сабахудин Рустеми, и уште едно раководно лице сè уште се наоѓаат во полициска станица по приведувањето во врска со проблемот со отпадот во главниот град.
„Лицата се задржани и постапката е во тек“, велат од Јавното обвинителство.
Од тука вчера соопштија дека лицата се приведени во врска со сомненија за кривично дело од член 230 од Кривичниот законик или, како што појаснуваат, станува збор за загрозување на животната средина и природата со отпад.
Владата претходно го задолжи Министерството за внатрешни работи во координација со Државниот комунален инспекторат, Државниот инспекторат за животна средина, Државниот санитарен и здравствен инспекторат и Институтот за јавно здравје да изврши вонреден инспекциски надзор во Град Скопје и во „Комунална хигиена“ со цел да се утврди состојбата со отпадот во главниот град и да се преземат соодветни мерки.
Во врска со приведувањето во текот на вчерашниот ден реагира градоначалничката на Скопје, Данела Арсовска, која на „Фејсбук“ со иронија напиша дека директорот, кој е кадар на ДУИ, бил пуштен од станица кога во полиција по убедување им кажал дека во срцето и душата е „Влен“. Арсовска вината ја лоцира кај претседателката на управниот одбор на претпријатието, Јулијана Спировска, за која исто со доза иронија напиша дека неа не ја апсат оти имала албум со фотографии со сите функционери од ВМРО-ДПМНЕ.
Македонија
Николоски: Ќе работиме да го решиме урбанистичкиот хаос во Центар
Александар Николоски, потпретседател на ВМРО-ДПМНЕ, денеска беше во Маџир Маало, во општина Центар, каде заедно со кандидатот за градоначалник на општината, Мирослав Лабудовиќ, даде изјава за состојбите во овој дел од градот. Тој посочи дека поединци блиски до актуелното раководство на општина Центар го гледаат урбанизмот единствено низ призма на личен финансиски интерес, а поради тоа, граѓаните во Маџир Маало живеат во услови кои не доликуваат на 21 век.
„Денеска ќе се видиме и ќе поразговараме со жителите на Маџир Маало, ова е срцето на главниот град, срцето на Скопје. За жал луѓето живеат во супстандардни услови и овде можете на дело да видите како изгледа урбанистичкиот хаос и создавање на урбанизам само во интерес на поединци“, кажа Николоски и додаде:
„Затоа што поединци кои што се блиски на актуелното раководство на општина Центар, не можат тука да си го најдат финансискиот интерес и не можат тука да најдат бизнис. Затоа луѓето овде живеат во една ситуација која што не приличи на 21 век“.
Николоски укажа и на примерот со новите згради кои се градат во Маџир Маало, каде што тесните улици создаваат проблем и за новите жители, но и за оние кои веќе живеат тука.
„Низ оваа тесна уличка треба да поминуваат сите кои што ќе живеат во овие нови згради кои што се градат тука, а од другата страна зад мене не можат луѓето да си стигнат до куќите. Ова на најдобар начин покажува на кој начин се уништува општина Центар и зошто се потребни промени во општина Центар“, истакна Николоски.
Николоски потсети дека, откако е министер за транспорт и врски, гласно зборува за урбанистичките проблеми и во општина Центар и во општина Карпош.
„Јас многу гласно и за општина Центар и за општина Карпош зборувам откако сум избран за министер. Предложив на двете општини и на двата актуелни градоначалници да донесеме специјални закони за општина Центар и за општина Карпош, кои што би дале развој, но би го заштитиле во исто време урбаното живеење. Двајцата не се согласија, и ги гледаме сега причините зошто“, рече Николоски.
На крај, Николоски истакна дека заедно со кандидатиот за градоначалник на општина центар, како иден градоначалник на општина Центар, ќе работат на решавање на проблемите на жителите од Маџир Маало.
„Ќе работиме да ги решиме овие проблеми и луѓето кои тука денеска разговараат со нас, од Маџир Маало конечно да добијат пристојни услови за живот“, заклучи Николоски.

