Нема да биде изненадување за никого овде ако кажам дека Русија се спротивставува на патот што Македонија го има избрано и ќе ги примени сите расположливи средства за да го поткопа тоа. Ова го гледаме и во други делови од Европа, ова го видовме за време на изборите во САД во 2016, изјави заменик-државниот секретар на САД, Џон Саливан, на заедничката прес-конференција со премиерот Зоран Заев во Владата.

„Значи, не сме изненадени, но уште еднаш сакам да нагласам дека САД се тие што ја поддржуваат Македонија, ја поддржуваат нејзината храбра Влада и луѓето во Македонија, а ќе им помогнеме и на другите што се обединети во поддршката кон оваа Влада да се спротивстави и да го разоткрива штетното влијание на Русија во Македонија, во другите делови од регионот и Европа и секаде каде што се обидуваат да ги поткопаат легитимните демократски процеси на владите што прават одлуки во интерес на своите граѓани така како што прави Македонија. Ќе ги поддржуваме тие влади и ќе правиме сè што е во наша можност да се спротивставиме на тоа штетно влијание и да го изнесуваме на виделина“, рече Саливан на новинарско прашање дали има руско влијаение во непријателската реторика кон Македонија, како што напредува процесот за спроведување на преспанската спогодба, со оглед на тоа што Русија отворено ѝ се спротивстави.

Саливан рече дека се гордее што во името на САД е во Македонија како поддршка на она што Владата на Македонија и граѓаните на Македонија го посакуваат, а тоа е прием во НАТО и ЕУ.

„САД ја поддржуваат оваа Влада и нејзините напори да го остварат тоа вклучувајќи ја и спогодбата од Преспа. Јас со гордост го поддржувам тоа, САД со гордост го поддржуваат тоа. Ние го поддржуваме тоа, не потпалуваме ништо. Овие одлуки беа донесени под храброто лидерство на овој премиер. Не е тајна дека Владата на Русија се спротивставува на членството на Македонија во НАТО и може слободно да се каже дека Русија ќе направи сè што е во нејзин сопствен интерес за да го поткопа она што Владата и граѓаните на Македонија го утврдиле како најдобар интерес за оваа земја. Меѓутоа, САД ја поддржуваат Македонија“, рече Саливан.