Македонија
Сашо Мијалков со лозинка можел лично во секое време да прислушува, тврди СЈО

По неколкумесечно одлагање, во кривичниот суд почна судењето за масовното прислушување „Таргет-Тврдина“. Обвинитителката Ленче Ристоска рече дека ова е судски процес што ќе испише нова историја во Македонија, ќе го одбележи времето и ќе остави силна порака за идните генерации.
Со ова обвинение, како што рече Ристоска, ќе се потврди она во кое граѓаните се сомневале: „Немој по телефон, можеби нè прислушуваат“. Обвинителката рече дека Сашо Мијалков, тогашниот директор на УБК, бил главен организатор на злосторничкото здружување, кое прислушувало масовно без судски наредби.
„Искористувајќи ги функцијата, моќта и авторитетот, првин се обидоа да ја негираат ситуацијата велејќи дека не се автентични, за потоа да тврдат дека се сечени, лепени и монтирани“, рече Ристоска.
„Обвинетиот Мијалков имал преглед на сите броеви што биле предмет на незаконското следење на комуникациите“, рече обвинителката.
Таа во воведниот говор рече дека секој од припадниците на злосторничкото здружување имал своја улога и задача во групата. Првин, покрај Мијалков, во групата биле бегалецот Горан Грујевски, началник на Петтата управа, и Надица Николиќ, вработена во УБК. Подоцна на групата ѝ се приклучиле Владимир Варелов, Марјан Шумуликоски, Силвана Златкова, Васил Исакоски и Валентина Симоноска.
По налог на Мијалков, а без судска наредба, било спроведено масовното прислушување. Овие вработени во УБК ги транскриптирале разговорите и му ги предавале на Горан Грујевски надвор од системот за следење на комуникациите. Варелов, според обвинението, внесувал лично телефонски броеви по налог на Грујевски. Сведокот Зоран Костовски бил техничка поддршка на прислушувањето. Имал задача да креира на компјутерите кориснички имиња и лозинки и по барање на организаторите и членовите на групата им дал пристап до прислушуваните материјали на нивните лични компјутери во работните простории.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.