Македонија
Светски ден на предвремено родените деца – петпати во пет години намалена смртноста на прематурусите во државата
Клиниката и годинава го продолжува трендот на сериозно намалување на смртноста на предвремено родените бебиња, истакна министерот за здравство, Фатмир Меџити, на прес-конференцијата одржана на ГАК по повод одбележувањето на Светскиот ден на прематуритетот.
„Годинава (од 1.1.2023 до 14.11.2023), вкупната смртност на прематурчиња и на критично болни новороденчиња на ЈЗУ У ГАК е 5,6 проценти, со тенденција и понатаму да паѓа. Само за споредба од изминатите години кога Северна Македонија во 2016 година беше на врвот на смртноста на новороденчиња во Европа, проценот во изминатите години се движеше од: 2016 г. – 25 %; 2017 г. – 21 %; 2022 г. – 8,2 % и 2023 г. – 5,6 %“, рече тој.
Директорката на ГАК, Викторија Јовановска, истакна дека Клиниката за гинекологија и акушерство се приклучува на одбележувањето на Светскиот ден на предвремено родените деца – 17 Ноември со цел подигнување на свеста за предизвиците и ризикот од предвременото породување, за начините да се спречи тоа, за тоа како на прематурчињата да им се овозможат најдобрите здравствени услови да преживеат и да напредуваат, како и давање поддршка на семејствата на овие дечиња.
Прематуритетот, според неа, останува глобален проблем и водечка причина за смртност на деца до петтата година, а некои од преживеаните деца се борат со тешки компликации врз здравјето.
„Бројките зборуваат за драстичен пад на процентот на смртност кај предвремено родените бебиња на што особено се гордееме, а тоа се должи на навистина огромниот ангажман на целиот персонал од одделот за неонатална интензивната нега (ОИНТ) и на сериозната инвестиција во персонал, знаење и во најсофистицирана и најсовремена апаратура.
Прочистениот број на смртност (предвремено родени бебиња над 26. гестациска недела) годинава е 1,38 %, а 2022 година ја завршивме со 2,4 %.
За одбележување е дека во наведениот период од 2023 година во добра здравствена состојба дома заминаа 6 прематуруси родени во 26. гестациска недела, едно во 25. гестациска недела и две родени во 24. гестациска недела.
Нашата држава сериозно се доближува до најразвиените земји во светот кога станува збор за преживување и на предвремено родените новороденчињата со најмала гестациска недела и тежина.
Клиниката за гинекологија и акушерство се соочува со недостиг на персонал, како педијатри и медицински сестри“, рече таа.
Рената Димитриовска, началник на одделението за интензивна нега и терапија, се осврна на примената на нови методи, кои почнуваат да се применуваат и на интензивната нега на ГАК. ГАК, според неа, континуирано ги следи препораките на СЗО, со што се приближува кон светското семејство на достигнувања.
Клиниката, како што рече, полека, но сигурно почнува да го имплементира процесот на кенгурирање, најбитниот момент и контакт помеѓу предвреме роденото бебе и родителите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Забрана за камиони на патните правци Маврово – Дебар и Гостивар – Стража – Кичево
Од 06:50 ч., воведена e забрана за тешки товарни возила на патните правци Маврово – Дебар и Гостивар – Стража – Кичево поради обилни врнежи од снег, информира АМСМ.
Сообраќајот на останатите државни патишта се одвива непречено, по претежно суви коловози.
Слаб снег провејува на П.Шапка кој во мометов не се задржува на коловозот.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Денеска врнежи од дожд и од снег на планините
Под влијание на циклонска активност, денеска ќе има врнежи од дожд во пониските, дожд и снег на повисоките места, а на планините од снег, информира УХМР.
Врнежите ќе бидат пообилни во западните делови каде се очекува да наврнат над 15 l/m² воден талог. На планините висината на снежната покривка ќе се зголеми од 10 до 15 см.
Потоа во следните денови времето ќе биде претежно стабилно со ниски утрински температури. За време на викендот ќе дува умерен до засилен северен ветер, а во сабота наместа ќе има услови за провејување на слаб снег.
Во Скопје, денеска ќе има повремени врнежи од дожд. Потоа ќе биде стабилно со пониска утринска температура.
Македонија
По 100 дена мандат, Ѓорѓиевски порача: „Скопје повторно почна да дише“
Градоначалникот на Град Скопје, Орце Ѓорѓиевски, објави отчет за првите 100 дена од мандатот, наведувајќи дека ја презел функцијата во услови на, како што рече, „град на раб на финансиски колапс – празна каса, блокирани сметки, јавни претпријатија со неисплатени плати, систем без дисциплина и долг од речиси 300 милиони евра“.
„Тотален колапс! Институции што одамна престанале да работат во служба на граѓаните“, наведува градоначалникот, додавајќи дека добил доверба од граѓаните и дека „таа доверба нема да биде изневерена“.
Според него, за три месеци се намалени обврските за повеќе од 40 милиони евра преку кратење на непродуктивни трошоци и воведување финансиска дисциплина, а стабилизирана е и исплатата на платите во јавните претпријатија.
Ѓоргиевски информира дека биле отстранети над 600 фиктивно вработени кои со години земале плата без да доаѓаат на работа, како и дека е спроведена акција за чистење во која, како што наведува, учествувале над 2.500 луѓе, стотина возила и биле отстранети повеќе од 4.500 тони отпад за 72 часа.
„Скопје повторно почна да дише“, наведува тој.

Градоначалникот посочува дека се деблокирани клучни инфраструктурни проекти, меѓу кои клучката кај „Момин Поток“, булеварот „Македонија“ со подземната сообраќајница, улиците „Љубљанска“ и „Перо Наков“, како и реконструкцијата на „Фрањо Клуз“.
Почнува изградба на нови кружни текови, булевари и монтажни катни гаражи, како и доизградба на булеварот „Борис Трајковски“.
Во делот на јавниот превоз, наведува дека со поддршка од Владата се работи на модернизација со нови еколошки автобуси и проекти за современ транспорт.
Ѓоргиевски информира и за уредување нови зелени површини, расчистување на Вардариште, изградба на Луна парк, како и за набавка на нов мебел, компјутери, интерактивни табли и прочистувачи на воздух за средните училишта. Посочува дека Скопје останува Европска престолнина на културата 2028.
Во обраќањето тој наведува дека буџетот за 2026 година е повисок и развоен, со рекордни капитални инвестиции во образование, култура, инфраструктура и животна средина.
„Наследивме долгови, но градиме стабилна иднина. Наследивме хаос, но воспоставуваме систем и ред. Наследивме разочараност, но ја враќаме надежта и достоинството“, наведува градоначалникот.
Ѓоргиевски упати благодарност до Советот на Град Скопје, до својот тим и до премиерот Христијан Мицкоски, наведувајќи дека „со дела, како никој во минатото покажа што значи вистинска грижа за граѓаните и вистинска поддршка за Скопје“.

