Не постои поголем степен на криминал, корупција, партизација и злоупотреби на државните институции од оние што се случуваа за време на 11-годишното криминално и расипничко владеење на ВМРО-ДПМНЕ, реагираат денеска од владејачката партија СДСМ на прес-конференцијата на Драган Данев од ВМРО-ДПМНЕ.

„ВМРО-ДПМНЕ 11 години ги партизираше институциите, ги задолжуваше граѓаните и државата, ја изолира и зароби Република Македонија и затоа лицемерно е денес како опозиција да глуми загриженост за состојбата во државата. За 10 месеци од формирањето, Владата предводена од СДСМ успеа да ги санира наследените штети од криминалото владеење на ВМРО-ДПМНЕ, да ја стабилизира економијата и да ја врати и зајакне регионалната и меѓународна позиција на Македонија“, стои во соопштението на СДСМ.

Оттаму додаваат дека времето на криминално и расипничко трошење на буџетските пари, времето на притисoци врз институции и граѓани заврши со заминувањето на ВМРО-ДПМНЕ во опозиција.

„Владата предводена од СДСМ преку успешните економски политики обезбеди повисоки плати и пензии и повисок животен стандард за сите, а преку започнатиот реформскиот процес, институциите се ослободуваат и професионализираат и работат во интерес на граѓаните. Целокупната инфраструктура се подобрува преку започнатиот инвестициски циклус вреден 270 милиони евра, а сериозно се инвестира и во здравството, одбраната, културата, образованието“, се наведува во партиското соопштение.

Од владејачката партија истакнуваат дека ВМРО-ДПМНЕ треба да учи од овие лекции за да се надмине себеси и да даде поддршка на реформскиот процес што е во интерес на граѓаните.