Македонија
СДСМ: ВМРО-ДПМНЕ фрлаше пари за споменици, СДСМ ги враќа парите кај граѓаните

После прес-конференцијата на Гордана Димитриеска Кочовска од ВМРО-ДПМНЕ, со реакција излезе СДСМ.
Од партијата наведуваат дека ВМРО-ДПМНЕ нема кредибилитет да зборува за задолжување, тоа е истата партија, која 11 години ги задолжуваше граѓаните да гради споменици, фасади од стиропор, што се распаѓаат, да ја изгради луксузната Бела палата, како центар за ширење лажни вести, за богатење на партиското раководство на сметка на осиромашување на граѓаните.
„Немаме за леб а трошиме за чоколадо“ е добро познатиот односот на ВМРО-ДПМНЕ кон парите на граѓаните.
За разлика од времето на режимот денес парите завршуваат кај граѓаните. Минималната плата е покачена во три наврати, од срамно ниското ниво под 9.000 денари во времето на ВМРО-ДПМНЕ на 18.000 денари, континуирано расте просечната плата, социјалната помош е зголемена за 300 отсто.
Во најтешкиот период од пандемијата од Ковид 19, кога Владата предводена од СДСМ преку шест пакети мерки со 1,1 милијарди евра им помогна на граѓаните и на компаниите, дополнителната заменичка министерка за финансии од ВМРО ДПМНЕ Гордана Димитриеска Кочовска, со месеци кочеше заем од Светска банка, наменет за инвестиции во здравството и за помош на најранливите.
Концептот парите назад кај граѓаните продолжува и во време на светска економска криза. Со антикризниот пакет од 26 мерки, СДСМ им помага на граѓаните, на најранливите категории, на пензионерите и на компаниите.
Со укинување на стапката за ДДВ за основните прехранбени производи, намалување на ДДВ и акцизата за горивата, со субвенционирање на цената на електричната енергија се амортизира ценовниот шок.
СДСМ работи во интерес на народот, парите, не ги вложува во жални врби и панорамски тркала, туку ги враќа кај граѓаните, во семејните буџети, се вели во реакцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода делови од Центар и Аеродром

Од ЈП Водовод и Канализација известиваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)
Македонија
Претежно облачно со повремен дожд

Времето денеска ќе биде променливо облачно со повремени локални врнежи од дожд. Кон крајот на денот врнежите насекаде ќе престанат. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 6 до 13, а максималната ќе достигне од 8 до 16 степени.
Во Скопје, претежно облачно со повремен дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Од четврток времето ќе биде стабилно и суво со слаб до умерен северен ветер. Дневната температура ќе биде во пораст.