Македонија
СДСМ: Време е ВМРО-ДПМНЕ да покаже зрелост и да помага наместо да одмага
 
																								
												
												
											Додека државата се бори против коронавирусот, ВМРО-ДПМНЕ тера партиска кампања базирана на лажни вести и измислици, реагира СДСМ на обвинувањата на опозициската ВМРО-ДПМНЕ која тврди дека власта ја користи ситуацијата со коронавирусот за профитирање.
„Додека државата и надлежните институции вложуваат натчовечки напори да се изборат против коронавирусот, ВМРО ДПМНЕ засилено тера кампања ширејќи лажни вести и измислици. Како да не им се доста нарачаните лажни вести коишто ги шират медиумите под нивна контрола, ВМРО ДПМНЕ лично ѝ се придружи на екипата ‘лажни вести’, па своите манипулации ги шири и преку официјални прес-конференции, изјави и статуси на социјалните мрежи.
Ниту шлаканицата што ја добија од ООН, кои јавно ги демантираа лажните вести на Александар Николовски и ВМРО-ДПМНЕ, не ги спречи да продолжат да се однесуват неодговорно и да работат на штета на државата.
Обидувајќи се да го минимизираат успехот на нашата земја, изминатите два дена ги таргетираа двете министерства клучни во макорпната работа за нашата земја да стане членка на НАТО и да добие датум за почеток на пристапни преговори во ЕУ.
Откако увидоа дека лагата со патување на министрите за одбрана и надворешни работи во време на пандемијата и затворен аеродром не им проаѓа, наместо да запрат, искористија други конструкции.
ВМРО-ДПМНЕ треба да знае дека владата предводена од СДСМ сите трошоци на министрите јавно ги објавува, за разлика од нивната влада, која ги направи класифицирани.
Владината алатка за отчетност и транспарентност ќе им покаже и дека министерката за одбрана, Радмила Шеќеринска, за две и пол години потрошила 6 пати помалку нивниот за одбрана, Зоран Јолевски, за ист толкав период.
Чиста лага се тврдењата на ВМРО и дека во период на криза, меѓу 17 и 20 март МНР потрошило нешто помалку од 24 илјади за патувања во странство. Министерот за надворешни работи, Никола Димитров, во месец март немал ниту едно патување, а последното патување на дипломат од МНР во странство било на 3 март.
Приказот од трезорот со којшто манипулира ВМРО ДПМНЕ и свесно конструира лага се однесува на претходно реализирани авиобилети на дипломати од МНР во износ помал од 1.500 евра (91.060 денари) и на редовна месечна дознака за патни трошоци на нашите амбасади низ светот, на сите 57 дипломатско-конзуларни претставништва на Северна Македонија во износ од приближно 22.000 евра (1.366.457 денари) односно нешто под 400 евра по ДКП.
Станува збор за редовна активност и токму затоа згрозува фактот дека се злоупотребува од луѓе кои разбираат, кои точно знаат за што се работи, но сепак одлучиле да манипулираат и да лажат и тоа во време кога МНР е една од клучните алки во борбата против коронавирусот.
Во момент кога татковината се зачленува во НАТО, кога ЕУ одлучи да почне пристапни преговори ВМРО-ДПМНЕ не најде време, ниту, пак, виде потреба да му честита барем на народот за двете големи достигнувања.
Напротив, ВМРО ДПМНЕ реши да се затвори во белиот дворец и оттаму да смислува деструктивни сценарија во време кога државата води беспоштедна битка против невидливиот непријател, кој е закана за сите нас.
Време е да се покаже зрелост, лажните вести да прекинат, а институциите да се остават да делуваат во овој тежок период.
Крајно време е и ВМРО-ДПМНЕ да се престрои на страната на граѓаните и да придонесе колку може, да помага, наместо да одмага“, наведува СДСМ во реакцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Македонија
Волонтери од „За Почиста Македонија“ утре ќе го чистат Расадник
 
														Утре, 1 ноември, со почеток во 11:00 часот, „За Почиста Македонија“ организира еко-акција во Расадник, Кисела Вода, со цел расчистување на едно од најголемите, но и најзапоставени зеленила во Скопје.
„Локацијата долги години е оставена без грижа и е преплавена со отпад. Со оваа акција, волонтерите на „За Почиста Македонија“ ќе покажат дека кога институциите не реагираат, постојат свесни и одговорни граѓани кои можат да ја преземат иницијативата во свои раце. Преку тимска работа, позитивна енергија и љубов кон природата, ќе се придонесе кон разубавување на просторот и враќање на неговиот природен сјај“, се вели во најавата на еколошкото друштво.
Акцијата е отворена за сите граѓани кои сакаат да помогнат во создавање на почиста и поздрава средина. Организаторите ќе обезбедат целосна опрема за чистење и логистичка поддршка.
Организаторите велат дека она што ги прави овие акции препознатливи е позитивната атмосфера, исполнета со дружба, музика и нови пријателства. По завршувањето на активностите, учесниците традиционално остануваат на неформално дружење со друштвени игри и неформално дружење во исчистениот простор.
Во изминатите години, „За Почиста Македонија“ има реализирано бројни акции низ целата земја, преку кои се испраќа порака дека секој поединец може да направи вистинска промена.
Македонија
Скопјанец ја малтретирал поранешната девојка – ја влечел пред болница и ѝ се заканувал дека ќе го убие нејзиниот брат
 
														Скопското Обвинителство поведе постапка против 33-годишен скопјанец осомничен за продолжено загрозување на сигурноста на својата поранешна девојка.
Според обвинителството, мажот речиси цел месец, од 5 до 30 октомври, ја прогонувал и ѝ се заканувал на поранешната партнерка, упатувајќи сериозни закани по нејзиниот живот и животот на нејзиното семејство. Тој испраќал писмени и гласовни пораки преку социјални мрежи, полни со навреди и закани, а насилството се засилило откако жената го напуштила неговиот дом поради постојан психички притисок.
Последниот инцидент се случил на 30 октомври пред една клиника во Скопје, каде што оштетената се лекувала. Осомничениот се појавил таму, почнал агресивно да се однесува, да ја тегне за рака и да ја присилува да тргне со него, при што ѝ се заканил дека ќе го убие нејзиниот брат. Од страв и чувство на загрозеност, жената побарала помош.
Поради сериозноста на заканите и повторувањето на делото, јавниот обвинител поднесе предлог до судот за определување мерка притвор за осомничениот.
Македонија
Мицкоски: Да дадеме поддршка за Лабудовиќ и Ѓорѓиевски за повеќе проекти и подобар живот во Центар и во Скопје
 
														Претседателот на ВМРО-ДПМНЕ, Христијан Мицкоски, даде изјава за медиуми од општина Центар и упати јасен и недвосмислен повик до жителите на општина Центар да излезат масовно на гласање во вториот круг од локалните избори и да ја дадат својата поддршка за кандидатот Мирослав Лабудовиќ за градоначалник на општина Центар, како и за Орце Ѓорѓиевски, кандидат за градоначалник на Град Скопје.
Тој посочи дека со победата на кандидатите на ВМРО-ДПМНЕ ќе се обезбеди целосна вертикална поддршка од страна на Владата до општините со што ќе овозможи реализација на повеќе проекти во интерес на граѓаните.
„На тој начин, заедно со поддршката од Владата, една вертикална поддршка, ќе можеме да направиме проект повеќе за центарци, за жителите на општина Центар, и сигурен сум дека ќе имаме ефикасна соработка, бидејќи досега како Влада, изминативе 16 месеци, еднонасочна беше соработката, само од страна на Владата“, вели Мицкоски.
Претседателот Мицкоски ги повика граѓаните обединето да излезат на гласање и да го заокружат бројот 9, да го направат вистинскиот избор за сигурна иднина и развој на општина Центар и град Скопје.
„Убеден сум дека после овие локални избори, после вториот круг, Центар ќе има нов градоначалник, тоа ќе биде г. Лабудовиќ, а Скопје ќе има нов градоначалник, Орце Ѓорѓиевски“, истакна Мицкоски.


 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											