Македонија
СДСМ: Гиновска ги штити загадувачите на Крива Река, наместо граѓаните

Скандалозно е што директорката на Државниот инспекторат за животна средина денес на прес-конференција застана во заштита на предизвикувачите на еколошка катастрофа, наместо да застане во одбрана на животот и здравјето на граѓаните што е нејзина должност соогласно Устав и Закон, велат од СДСМ.
„Ивана Гиновска денеска покажа застрашувачка неинформираност и непознавање од областа на заштитата на животната средина, но и основни познавања од областа на математиката. Имено директорката тврдеше дека концентрацијата цијанид во Крива Река е само два пати над дозволеното. Разликата помеѓу 0.001 микрограми по литар колку што е дозволеното ниво на цијанид и количеството од 0.014 микрограми по литар колку што е регистрирано е разлика од 14 пати, а не два како што тврдеше директорката. Дополнително таа тврдеше дека некој шпекулирал со количество на олово. Количеството на олово во реката е зголемено за 10 пати од дозволено ниво од 10 микрограми по литар, моменталната состојба во Крива Река кога е тестирана водата количеството е од 100 микгрограми по литар“, велат од СДСМ.
Како што додаваат, во моментот водата на Крива Река е петта класа, според концентрациите на олово, многу загадена и не смее да се употребува за ништо.
Застрашувачка е леснотијата со која Гиновска, велат од СДСМ, призна дека двајцата инспектори кои биле на должност по преливањето на јаловиштето во Тораничка река се во тесни релации со рудникот Булмак, односно едниот инспектор е поранешен вработен во рудникот додека сопругата на другиот работела во споменатата компанија.
Дополнително, како што се додава, загрижува и леснотијата со која Гиновска констатира дека инспекторите кои требало да го контролираат рудникот се бивши раководители и вработени во „Булмак 2016”.
„Директорката Гиновска, заедно со Владата предводена од Христијан Мицкоски треба да одговорат како ќе ги обештетат сите земјоделци кои по течението на реките Тораница, Крива Река, Пчиња и Вардар ги коистат овие води за наводнување на земјоделското земјшите. Владата на чело со Мицкоски треба да им одговои на граѓаните колку пари чини животот и здравјето на и за колку пари дадени во кампања го продаде здравјето на граѓаните на Николај Волканов?“, се вели во партиското соопштение.
Се додава и дека ВМРО-ДПМНЕ заедно со нивните коалициони партнери, но и бизнис паратнери на чело со Христијан Мицкоски како премиер на Владата застанаа во одбрана на криминалот и труењето на сопствените граѓаните.
За крај ситетреба да одговораат не само пред судот на јавноста туку и пред правосудните органи за ставање во ризик на здравјето на илјадници граѓаните на државата, како и за ноторно лажење на целата македонска јавноста за опасностите од овој екоцид во паланечко, вели СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: СДС е симбол на криминал, Владата е стабилна и работи на економски раст

Од ВМРО-ДПМНЕ велат дека слободното изразување мислење и став за различни проблематики за СДС е непознат поим. Во нивното соопштение се наведува дека од партија која на таканаречени внатрепартиски избори настапува со еден кандидат, без можност членовите да избираат, ништо друго и не може да се очекува.
„Во владината коалиција владее демократија каде што секој има право на свое мислење, слободно изразување и партиско делување,“ велат од ВМРО-ДПМНЕ.
Од партијата нагласуваат дека Владата предводена од ВМРО-ДПМНЕ посветено работи на враќање на функционалноста на институциите на системот, кои, како што велат, биле целосно уништени за време на владеењето на СДС.
„Нешто што се рушело и разградувало седум години не може преку ноќ да се среди, но полека, но сигурно, системот се враќа во функција,“ истакнуваат од ВМРО-ДПМНЕ.
Во соопштението се потенцира дека економскиот пустош што го оставила претходната власт влијаел на стандардот на граѓаните, но дека со посветена и чесна работа Владата успева да го запре слободниот пад на економијата.
„Економијата заживеа, што го потврдуваат податоците на институциите – последниот квартал од минатата година заврши со раст на БДП од 3,2 проценти. Платите и пензиите се покачуваат, растат директните странски инвестиции и се вложува во капитални проекти,“ соопштуваат од ВМРО-ДПМНЕ.
Воедно, од партијата додаваат дека единствената работа што функционирала за време на седумгодишното владеење на СДС и ДУИ биле криминалот и корупцијата.
„Тоа не го тврдиме само ние, туку го потврдуваат и надлежните институции. Нема област каде што ќе се направи ревизија, а да не излезе форма на организиран криминал и корупција од времето на претходната власт,“ велат од ВМРО-ДПМНЕ.
На крајот, од владејачката партија порачуваат дека Владата е стабилна, функционална и целосно посветена на обезбедување економски раст и подобар животен стандард за сите граѓани, додека, како што велат, СДС останува симбол на криминал, корупција и предавства.
Македонија
Левица: Стан во Центар од 1 денар, куќа од 28 денари, еве што пријавиле функционери од ВМРО-ДПМНЕ

Левица најостро ја осудува праксата на непрофесионално и паушално пополнување на анкетните листови за имотна состојба од страна на функционерите на ВМРО-ДПМНЕ, нарекувајќи го тоа флагрантно потценување на законските обврски и грубо поткопување на транспарентноста и интегритетот на јавните функции.
Согласно Законот за спречување на корупцијата и судирот на интереси, функционерите се должни до Државната комисија за спречување на корупција (ДКСК) да достават анкетни листови, односно детално да го пријават својот имот и имотот на нивните семејства, како и секоја промена која ќе настане за време на нивниот мандат. Сепак, и без да се познаваат личните финансиски прилики на функционерите на ДПМНЕ, јасно се забележуваат бројни паушални податоци, неправилности и несоодветно исполнување на законската обврска.
Според јавно достапните податоци, министерот за култура и туризам, Зоран Љутков, има пријавено пет недвижнини. Помеѓу нив се издвојува неговиот стан во Банско, како и: стан во Карпош од 38 квадратни метри со вкупна вредност од 2,39 денари; куќа во Габрово со површина од 315 квадратни метри со вкупна вредност од 28 денари и двор од 44 квадратни метри со вкупна вредност од 1,5 денари, сето тоа на име на неговиот брачен другар. Дополнително, брачниот другар поседува и стан во Карпош од 55 квадратни метри вреден 3,5 денари.
Пратеничката од ДПМНЕ, Бети Стаменкоска – Трајкоска, и покрај тоа што пријавила кредит, како сопственик се јавува само на акции стекнати уште во 2005 година во Стопанска банка, Макстил и ЗК Пелагонија. Следејќи го примерот на нејзините родители кои исто така поседуваат голем имот во акции, таа има пријавено три моторни возила, сите на име на нејзиниот брачен другар. Недвижниот имот е на име на нејзините родители, а пријавила и градежно земјиште од 134 квадратни метри во вредност од 0 денари. Иако според законите е должна да пријави целиот имот на нејзиното семејство, нема податоци за банкарски сметки.
Пратеничката Иванка Василевска, пак, во својот анкетен лист навела дека поседува стан во Центар со површина од 99 квадратни метри и вредност од само 1 денар.
Во вакви услови се поставува логично прашање: зошто ДКСК го толерира ова флагрантно непочитување на законските обврски? Отсуството на сериозна проверка и адекватно постапување од страна на ДКСК не само што ја поткопува довербата во институциите, туку ја охрабрува и понатамошната пракса на прикривање на реалниот имот на носителите на јавни функции. Корупцијата не се спречува со затворање на очи пред ваквите манипулации, потенцира Левица.
Партијата најавува дека во наредниот период јавно ќе ги објавува сите неправилности и забелешки поврзани со пријавениот имот на носителите на јавни функции, со цел да ја поттикне ДКСК на соодветно постапување.
„Бараме итна ревизија на анкетните листови на сите функционери и процесуирање на сите кои со неточни или лажни податоци ја изигруваат законската обврска!“, се наведува во реакцијата на Левица.
Македонија
Муцунски: Дипломатскиот пасош не ѝ дава имунитет на претседателката на ДКСК

Актуелната претседателка на Државната комисија за спречување на корупцијата (ДКСК), Татјана Димитровска, која е осомничена за оддавање службена тајна во случајот „Адитив“, не смее да има контакт со предмети, пошта и друга документација поврзана со работењето на Антикорупциска. Дополнително, таа нема право да гласа или да врши распределба на предмети.
Димитровска завчера беше изведена пред Судија на претходна постапка во Основниот кривичен суд во Скопје. Судијата, постапувајќи по предлогот на Обвинителството, ѝ определи мерки за претпазливост, вклучително и забрана за преземање на одредени работни активности.
Минатата година, Татјана Димитровска доби дипломатски пасош од Министерството за надворешни работи, со што ѝ беше овозможено да патува без чекање на пасошка контрола при влез и излез од државата. Иако и останатите шест члена на Комисијата побарале ваква привилегија, не им била одобрена.
Министерот за надворешни работи, Тимчо Муцунски, во изјава за „Сител“ во емисијата „Тема на денот“, појасни дека поседувањето дипломатски пасош не носи автоматски имунитет и не може да влијае врз истрагата.
„Самиот дипломатски пасош на наш граѓанин не значи дека тој ужива било какви права поврзани со некоја форма на имунитет. Што значи дека истиот не може да влијае на самата постапка која се спроведува од нашите органи и во моментот кога ќе престане функцијата на таа поединечна личност, секако МНР ќе го одземе тој дипломатски пасош“, изјави Муцунски.
Тој додаде дека, иако постои презумпција на невиност, од морални и етички причини Димитровска треба да поднесе оставка.
„Логично е кога сте опфатени со ваков тип на постапка, почитувајќи ја и презумпцијата на невиност, ова го велам пред сѐ како човек, не како министер – логично е да дадете оставка. Тоа не треба, според мене, да влијае на кредибилитетот на сите останати членови на таа комисија“, истакна Муцунски.