Македонија
СДСМ: Го поддржавме законот за патните трошоци, потребни се казни за злоупотреби

СДСМ наспроти владејачките партии ја поддржа иницијативата на партијата Левица во македонското Собрание, за намалување на патните трошоци на пратениците.
Од партијата преку соопштение велат дека додека граѓаните едвај врзуваат крај со крај, ВМРО-ДПМНЕ, ЗНАМ и ВЛЕН не се откажуваат од патните трошоци.
„Социјалдемократскиот сојуз на Македонија отсекогаш се залагал за рационално и одговорно трошење на парите на граѓаните. Уште во 2018 година, кога СДСМ беше власт, на иницијатива на нашата пратеничка група беа поднесени и донесени законски измени со кои патните трошоци се намалија за најмалку една третина. Нашиот пристап кон ова прашање отсекогаш бил принципиелен и одговорен а не популистички. Суштината на работата на секој пратеник е да им служи на граѓаните, и на секој можен начин да води грижа што повеќе пари да бидат насочени кон потребите на граѓаните кои живеат се потешко“, се вели во соопштението на СДСМ.
Опозициската партија смета дека се потребни дополнителни законски измени кои ќе предвидат: воведување механизам за поголеми казните за можни злоупотреби на патните трошоци, како и воведување на ограничување со кое пратеници кои имаат станови во Скопје нема да имаат основа за наплата на патни трошоци.
Предлогот на Левица за намалување на патните трошоци на пратениците денеска не ја доби поддршката од владејачкото мнозинство, и не беше ставен на дневен ред на седницата. За да биде ставен на дневен ред предлогот за измени на Законот за пратениците, „за“ гласаа само 22 пратеници од Левица и СДСМ и коалицијата. Предлогот се однесуваше на тоа патните трошоци да се пресметуваат 6,5 литри на секои изминати 100 километри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова на Меѓународниот Астана форум 2025

Претседателката Гордана Сиљановска-Давкова денескa во Астана, Република Казахстан, ќе учествува на Меѓународниот Астана форум 2025.
Предвидено е таа да се обрати на пленарната сесија што ќе ја отвори претседателот на Република Казахстан, Касим-Жомарт Токајев.
Меѓународниот Астана форум 2025 се одржува од 29 до 30 мај 2025 година, на тема „Поврзување на умовите, обликување на иднината“.
Форумот се позиционира како значајна иницијатива за унапредување на мултилатерализмот и заедничкото дејствување во решавањето на глобалните прашања. Меѓу клучните теми се геополитичките предизвици, климатските промени и економските промени на глобално ниво.
Македонија
Началникот на Генералштабот на АРМ на 18. конференција на началниците на Генералштабовите во Турција

Началникот на Генералштабот на Армијата, генерал-мајор Сашко Лафчиски, вчера, учествуваше на 18. конференција на началниците на Генералштабовите на балканските земји (форум „BCHOD“), која се одржа во Истанбул, Република Турција.
Годинашната конференција, која се одржа на тема „Визија за употребата на беспосадни системи во идните оперативни средини“, беше отворена од страна на домаќинот, началникот на Генералштабот на Република Турција, генерал Метин Ѓурак.
Генералот во своето обраќање најпрво истакна дека форумот „BCHOD“ претставува успешна приказна за регионална соработка, а тоа треба да ги направи учесниците горди за прикажаните напори во зајакнување на регионалната безбедност преку воената соработка. Навраќајќи се на темата на конференцијата, истакна дека предизвиците од времињата во кои живееме, несигурната и комплексна иднина која се обликува од новите трендови, како беспосадните системи, бараат уште поинтензивна соработка помеѓу вооружените сили.
Претседавачот на Воениот комитет, адмиралот Џузепе Каво Драгоне, за кого ова е прво појавување на овој форум и негова прва посета на Република Турција, во своето излагање ја нагласи стратегиската вредност на Балканот нагласувајќи: „Овој регион продолжува да биде помеѓу најважните приоритети на НАТО“. При ова генералот Драгоне ги потенцираше придобивките и потребата за континуирана воена соработка помеѓу балканските земји.
Началникот на Генералштабот на Армијата, генерал-мајор Сашко Лафчиски, во своето обраќање потенцираше дека се наоѓаме во исклучително важен период, а одлуките кои се носат ќе дефинираат како ќе се развива воената моќ во иднина. Генералот Лафчиски наведе дека Армијата на Република Северна Македонија го препознава значењето на беспосадните системи и активно работи на модернизација и зајакнување на овие капацитети.
Навраќајќи се на важноста на форумот, генералот Лафчиски наведе дека треба да се продолжи со одлучност, заедништво и цврста определба за напредок, бидејќи така ќе се изгради поцврста, понапредна и поотпорна Армија и Алијанса.
Во рамки на конференцијата, генералот Лафчиски оствари и билатерални средби и се запозна со капацитетите на одбранбената индустрија на Република Турција.
На конференцијата, покрај домаќинот, началникот на Генералштабот на Република Турција, генерал Метин Ѓурак, началникот на Генералштабот на Армијата генерал-мајор Сашко Лафчиски и претседавачот на Воениот комитет, адмиралот Џузепе Каво Драгоне, учествуваа и началниците на Генералштабовите на армиите на: Грција, генерал Димитриос Чоупис; Србија, генерал Милан Мојсиловиќ; Романија, генерал Ѓеоргита Влад; Босна и Херцеговина, генерал-полковник Гојко Књежевиќ; Бугарија, адмирал Емил Ефтимов; Албанија, генерал-мајор Арбен Кинџи; Словенија, генерал-потполковник Роберт Главаш, како и началникот на штаб на Црна Гора, полковник Митар Кликови и директорот на Генералштабот на Хрватска, генерал-мајор Денис Третињак.
Форумот „BCHOD“ е основан на иницијатива на Грција и Турција во 2006 година. Официјално иницијативата е воспоставена со потпишување на „The Terms of Reference of the Balkan Countries’ CHODs Conference on Military Cooperation“ од страна на началниците на Генералштабовите на балканските земји на 10 мај 2007 година во Брисел. Главната цел на оваа иницијатива е промоција на стабилноста, соработката и добрососедството на земјите во регионот.
Македонија
Трајко Славески избран за нов гувернер на Народна банка

Трајко Славески е избран за нов гувернер на Народна банка.
Собранието доцна синоќа гласаше за неговиот избор. Тој доби поддршка од 68 пратеници, додека 16 беа против.
Славески е универзитетски професор по економија и поранешен министер за финансии во владата на пребеганиот Никола Груевски. Во последниот состав на Советот на Град Скопје ја извршуваше функцијата претседател.