Македонија
СДСМ: За јазикот и идентитетот не се преговара и не може да се преговара

За јазикот и за идентитетот не се преговара, ниту може да се преговара. Македонскиот јазик и македонскиот идентитет се потврдени и признаени, велат од Социјалдемократскиот сојуз на Македонија преку соопштение.
СДСМ реагира на обвинувањата на ВМРО-ДПМНЕ по интервјуто на премиерот Зоран Заев за „Бгнес“ коментирајќи дека опозициската патија предводена од Христијан Мицкоски нема кредибилитет да зборува за Народноослободителната борба и за партизаните.
„Партијата која идеологијата ја градеше со понижување на НОБ, на борците, партизаните, менување на нивното значење, бришење и менување имиња на улици, булевари и установи, кои беа именувани по македонски партизани, партија што за време на режимот ги исфрли на улица живите борци и ги остави без простории, нема никаков кредибилитет да зборува за НОБ и за партизаните. Ништо ново од Мицкоски и ВМРО-ДПМНЕ. Секогаш, во сите клучни моменти за европската иднина, Мицкоски излегува во јавноста и се обидува да ги поткопува државните позиции, да ја кочи државата, да шири лаги и да подгрева тензии во јавноста. Но, граѓаните одамна не веруваат во хистеријата што ја шири Мицкоски. Мицкоски нема чувство за тоа што е државен или национален интерес затоа што се води исклучиво од партискиот интерес. Затоа беше казнет од граѓаните и затоа уште долго ќе остане во опозиција“, наведе СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зошто четири недели по трагедијата во Кочани се уште нема проширување на истрагата, прашува СДСМ

Речиси четири недели по огромната трагедија во Кочани, истрагата сè уште нема одговори на едни од најважните прашања: кој сноси одговорност за пожарот во „Пулс“ и кој е виновен за сериозните безбедносни пропусти на денот на трагедијата, прашуваат од СДСМ.
Иако беше најавено, како што велат, до денеска не е направен ниту еден чекор во насока на проширување на истрагата, ниту за пропустите што ја обележаа кобната ноќ, ниту за оние што ѝ претходеле.
„Не е поведена постапка против ниту едно лице од МВР, ОВР Кочани, СВР Штип или БЈБ, иако тие на 16 март, денот на трагедијата, биле на одговорни позиции. Зошто нема проширување на истрагата иако беше најавено? Зошто ниту еден актуелен функционер којшто бил на функција тој ден не е опфатен со истрагата ниту пак е повикан на распит? Не смее да има заштитени. Не смее да продолжи селективно да се води истрагата.
Одговорност мора да има – без разлика на функцијата или позицијата. Ова не е партиско прашање. Ова е прашање на правда, на доверба во институциите и на почит кон жртвите и нивните семејства“, истакнуваат од опозициската партија.
Граѓаните, додаваат од партијата, имаат право да ја знаат вистината.
Според СДСМ, тие одговори мора да донесат конкретна одговорност, и тоа на сите нивоа.
„СДСМ останува цврсто на ставот: мора да има целосна, транспарентна и неселективна истрага. Правдата за Кочани мора да победи. Таа правда мора да биде недвосмислена, видлива и целосна“, потенцираат од партијата.
Македонија
Продолжува потрагата по исчезнатото лице од село Степанци, ќе се вклучат и извидници и ловци

Потрагата по исчезнато повозрасно лице од село Степанци во Општина Штип продолжува, кое е пријавено за исчезнато на 07.04.2025 година во 16:20 часот преку Едиствениот повикувачки број за итни случаи 112, се уште не е пронајдено, извести ЦУК.
Известени се МВР Штип и Локална самоуправа Штип, а и други институции и служби, здруженија и граѓани коишто можат да помогнат и помагаат во потрагата, информираше Регионалниот ЦУК Штип до Секторот за операции и координација во ЦУК..
Инаку, лицето последен пат било видено во саботата на 05.04.2025 година. Во последното деноноќие, конкретно вчера, е пребаруван повторно теренот околу селото Степанци, а и во и околу другите блиски села, од страна на роднини и пријатели (5-6 лица) на исчезнатото лице.
Претходниот ден (08 април) во потрагата беа вклучени 15 лица од коишто имаше и двајца вработени од РЦУК Штип, коишто доброволно се вклучија во потрагата.
Денеска се очекува во потрагата да се вклучат извидници од Штип, дел ловци од ЛЗ „Ловец“ од Штип, а ловочуварите од ловиштето „Лакавица – Патрик“, директно на нивна територија вршат пребарување и индиректно – преку редовно прегледување на снимките од камерите на терен. Инаку и жители од околните села во тој реон самостојно вршат претага во атарот на нивните села, соопштуваат од ЦУК.
Македонија
„За шест месеци зголемување на платите од 15 проценти во здравство, 12 во образование и 10 за полициските службеници“, велат од Владата

„Во последните шест месеци Владата ги зголеми платите на вработените во здравството, образованието и безбедноста. Просветните работници и сите вработени во образованието добија покачување од 12 проценти. Првото покачување од 5 проценти го добија со септемвриската плата исплатена во октомври минатата година. А второто покачување од 7 проценти го добија со мартовската плата, исплатена во април“, велат од Владата.
„Со ова го враќаме изгубеното достоинство на просветните работници кои ги создаваат идните генерации во државата.
Здравствените работници, медицинските сестри, техничари и административен персонал за шест месеци добија покачување на платите од 15 проценти. Додека пак, матичните лекари и гинеколози добија покачување на капитациониот бод од 33 проценти, а стоматолозите на 22 проценти.
Службените лица во МВР кој се грижат за безбедноста и сигурноста на граѓаните и државата добија покачување на платите од 10 проценти. За ова зголемување на платите на 12.000 полицајци од буџетот се обезбедени 800 милиони денари.
Владата се грижи за сите граѓани. Зголемувањето на платите продолжува, до крајот на мандатот во здравството и образованието предвидено е да се зголемат за 46, односно 50 проценти“, се наведува во соопштението на Владата.