Трајко Вељановски, Миле Јанакиески, Спиро Ристовски и Владимир Атанасовски се ослободуваат од кривично гонење во предметот „Организатори на 27 април“.

Судот со денешната одлука ја прекина судската постапка против четворицата обвинети, која се водеше по вторпат. Четворицата беа обвинети и им се судеше како организатори на настаните во Собранието од 27 април 2017 година.

„Барањето за примена на амнестија поднесена од обвинетите Трајко Вељаноски, Спиро Ристески, Миле Јанакиески и Владимир Атанасовски се уважува. Се запира кривичната постапка поведена со обвинителниот акт на Основното јавно обвинителство за гонење организиран криминал и корупција од 31.05.2019 година за кривичното дело терористичко загрозување на уставниот поредок и безбедност од член 313 од Кривичниот закон“, изјави судијата Илија Трпков при соопштувањето на одлуката.

Кривичниот суд ја донесе одлуката по доставеното мислење од Основното обвинителство за гонење организиран криминал и корупција дека за обвинетите треба да се примени Законот за амнестија од 2018 година.

Со истиот закон во друга постапка беа ослободени поранешните пратеници Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, како и водачите на протестите „За заедничка Македонија“, Борис Дамовски, Богдан Илиески-Бетмен, Владо Јовановски и Игор Дурловски.

Судијата Трпков во два наврати одлучуваше дека амнестијата не ги опфаќа овие обвинети, но Апелација бараше и по трет пат да се произнесе, а ситуацијата дополнително доби друг тек откако ОЈО ГОКК во декември лани даде позитивно мислење.

„ТАВ Македонија“, подружница на „ТАВ аеродроми“, ја информира и ја предупредува јавноста дека има лажни страници и профили на социјалните мрежи, на кои наводно се продава изгубен багаж на Меѓународниот аеродром „Скопје“.

 „Ова се лажни објави на социјалните мрежи преку кои се шират лажни информации за наводна продажба на изгубен багаж во име на Меѓународниот аеродром ‘Скопје’, односно аеродромскиот оператор ‘ТАВ Македонија’, а понатаму корисниците се пренасочуваат на линкови до веб-страници, каде што се бараат лични податоци и детали од банкарски сметки со цел да бидат измамени да направат трансакција. Затоа, апелираме до јавноста да бидат внимателни додека се онлајн, особено кога се бара да ги вметнат своите лични податоци и детали за трансакциски сметки, кои може дополнително да бидат злоупотребени“, велат од ТАВ и додаваат:

 „Како сериозна и одговорна компанија, која се грижи за своите клиенти, ‘ТАВ Македонија’ ќе ги преземе сите правни мерки за заштита на својот углед, особено затоа што во аеродромската дејност изгубениот багаж им се враќа на сопствениците во согласност со утврдена процедура, односно со изгубениот багаж никогаш не се тргува.

 Дополнително, ја потсетуваме јавноста дека сите официјални информации и новости во врска со и за Меѓународниот аеродром ‘Скопје’ може да се најдат на веб-страницата на Меѓународниот аеродром ‘Скопје’ https://skp.airports.com.mk/mk-MK/; како и на нашите страници на социјалните мрежи:

фејсбук-страница: https://www.facebook.com/SkopjeAirport;

инстаграм-страница: https://www.instagram.com/skopjeairport/; и

твитер-страница (X): https://x.com/skopjeairport

 Сите други веб-страници и страници на социјалните мрежи на кои луѓето може да наидат лажно се претставуваат и немаат никаква врска со Меѓународниот аеродром ‘Скопје’ и со дејноста на ‘ТАВ Македонија’“, посочуваат од таму.

Во изминатиот период беа формирани работни групи за изготвување предлог на Законот за изменувањето и дополнувањето на Законот за Судскиот совет и предлог-измени на Кривичниот законик.

За претседател на работната група за изменување и дополнување на Законот за Судскиот совет именувана е Мирјана Лазарова-Трајковска, судија во Врховниот суд на РСМ, информираат од Министерството за првада.

Членови на работната група се: д-р Денис Прешова, вонреден професор на Правниот факултет „Јустинијан Први“ – Скопје; д-р Александра Деаноска-Трендафилова, професорка на Правниот факултет „Јустинијан Први“ – Скопје; Александар Камбовски, претседател на Судскиот совет на Република Северна Македонија; Аритон Ала, член на Судскиот совет на Република Северна Македонија; Зоран Герасимовски, судија во Апелациониот суд – Скопје; Исмета Амет, судија во Вишиот управен суд на РСМ; Ивана Петковска, претставник на БЛУПРИНТ-групата на граѓанските организации; Јелена Кадриќ, претставник на БЛУПРИНТ-групата на граѓанските организации; Александра Цветановска, посебен советник на министерот во Министерство за правда на РСМ; Николина Микеска-Костадиновска, раководител на секторот правосудство при Министерство за правда на РСМ.
За претседател на работната група за изготвување предлог-измени на Кривичниот законик именувана е д-р Александра Деаноска-Трендафилова, професор на Правниот факултет „Јустинијан Први“ при Универзитетот „Св.Кирил и Методиј“ – Скопје.

Членови на работната група за измени и дополнувања на Кривичниот законик се:
Цветанка Периќ, судија во Врховниот суд на Република Северна Македонија; Елвин Вeли, јавен обвинител во Јавното обвинителство на Република Северна Македонија; Даниела Алексовска-Стојановска, судија во Основниот кривичен суд – Скопје; Владимир Туфегџиќ, адвокат; Жарко Хаџи-Зафиров, претставник на БЛУПРИНТ-група на граѓанските организации; Никола Прокопенко, државен советник за казнено законодавство во Министерство за правда на РСМ.

Од Министерството за првада очекуваат најбргу што може работните групи да излезат со предлог законски решенија.