Општина Илинден континуирано се труди да го урбанизира и уреди јавниот простор во сите населени места. На тој начин се обезбедуваат модерно уредени урбани катчиња, каде граѓаните можат да го поминуваат слободното време. Со таа цел започната е изградба на нов урбан парк со повеќе содржини во н.м. Марино, велат од општина Илинден.

„Овој урбан парк ќе се наоѓа на потегот помеѓу улиците „531“, „532“ и „534“, и зафаќа површина од околу 5.600 м2. Во склоп на паркот освен неопходното партерно уредување, предвидено е поставување на улично осветлување, чешми, клупи, корпи за отпадоци, паркинг простор, пешачки патеки и сервисна улица. Урбаниот парк ќе содржи зона со зелена површина, отворен плоштад за прошетка и колективни настани, централно поставена фонтана и жардињери со цвеќиња, како и детско игралиште со реквизити, во кое ќе можат да уживаат и најмалите жители на општината.

Увид во почетните фази на градба изврши градоначалникот на општина Илинден, Александар Георгиевски, кој истакна дека урбанизацијата и просторното уредување се од особена важност за жителите на општина Илинден да можат своето слободно време да го поминуваат во квалитетен, модерен и урбан простор за одмор и прошетка“, соопшти Општината.

Граѓаните се соочуваат со нови ценовни шокови по маркетите и продавниците. Цените повторно се покачени по истекот на мерката за замрзнати маржи. Храната и производите кои и со замрзнатите маржи не беа достапни за граѓаните – денес се уште поскапи, обвини СДСМ.

„Маслото за јадење е покачено од 89 на 92 денари, млекото над 72 денари, покачени се цените на јајцата, месото, сирењето, соковите. Средствата за хигиена поскапеа дури и за 60 проценти. Граѓаните имаат се помалку пари во своите џебови. Ова е резултат на трајно погрешна економска политика на владата. Пропадна т.н. есенска кошничка. Пропадна новогодишната кошничка. Пропаднаа и замрзнатите маржи. Цените продолжуваат да растат. Стандардот тоне. Животот во Македонија станува се поскап, граѓаните едвај врзуваат крај со крај, се мислат дали да платат сметки овој месец или да купат храна. Платите им се премали и не им стигнуваат ни до 15 ти во месецот“, изјави Лолита Ристова, членка на Извршниот одбор на СДСМ.

Според неа, синдикалната кошничка е покачена, за едно четиричлено семејство, потребни се најмалку 62.700 денари месечно.

„Ниту три минимални плати не го покриваат тој минимален износ. Додека граѓаните едвај врзуваат крај со крај, за функционерите од власта има богато мени од манго и папаја. Власта нема слух и одбива да ги покачи платите, одбива да ја покачи минималната плата. Не прифаќа ниту еден од предлозите на СДСМ за: укинување на ДДВ за основните производи, за минимална плата од 500 евра, за зголемување на платите во приватниот сектор. Одбива буквално сè што доаѓа од СДСМ. Оваа инает политика е на директна штета по стандардот на народот. Не може во најголемиот буџет нема пари за повисоки плати за работниците. Не може власта да троши 6,5 милијарди евра а да не сака да се откаже од ДДВ за храна“, рече Ристова.

Таа бара власта веднаш да се откаже од, како што рече, штетните економски политики и да ги прифати предлозите на СДСМ кои ќе значат вистинско намалување на цените и покачување на платите.

„Само со укинување на ДДВ за храна ќе се намалат цените на 250 производи. Тоа го бара народот и тоа го заслужува. Граѓаните заслужуваат достоинствен живот, стандард и држава што стои зад нив кога им е најтешко“, изјави Ристова.

Работна група која ќе ја сочинуваат претставници на Министерството за образование и наука, владината Служба за општи и заеднички работи, Градежниот факултет и повеќе други високообразовни установи при Универзитетот „Св. Кирил и Методиј“ во Скопје, ќе ги отстранува пречките за продолжување на изградбата на објектите за ФИНКИ и Факултетот за физичко образование, спорт и здравје, која започна во 2015 година, а беше стопирана во 2019-та.

За оваа цел, денеска министерката за образование и наука проф. д-р Весна Јаневска, ректорката на УКИМ проф. д-р Биљана Ангелова, деканот на Градежен факултет проф. д-р Горан Марковски и директорот на СОЗР, Ивица Томовски потпишаа меморандум за соработка кој предвидува, овие институции да спроведат индивидуални и заеднички активности кои ќе придонесат кон обезбедување на чиста состојба за продолжување на изградбата на објектите во кампусот на најстариот универзитет во Македонија.

„Повеќе од 6 години нема никаква теренска активност. Ова е период во кој истечена е важноста на одредена документација за градба, изменети се дел од законските решенија, а отпочнатите објекти се на ниво на карабина и во лоша состојба. Затоа, заедно ќе извршиме увид во фактичката состојба, ќе направиме преглед на расположливата инвестиционо-техничка документација и ќе дефинираме начин на кој би се продолжила изградбата во согласност со потребите на крајните корисници“, рече министерката Јаневска.

Според неа, административните предизвици ќе бидат надминати до крајот на годината, по што преку постапка за јавна набавка ќе се одбере најповолен изведувач на ревидираните проекти за двата објекти. Изрази голема благодарност до сите кои прифатија да помогнат во остварувањето на целта која е од интерес на младите, на високото образование и државата.

„Особено сум благодарна на деканот на Градежниот факултет проф. д-р Марковски, кој ќе одлучи какви профили на стручни лица се потребни во работната група, на пример претставници и од други факултети, и ќе ја предводи нејзината работа. Овде се покажува висока општествена одговорност, имајќи предвид дека меморандумот нема финансиска компонента и не предизвикува фискални импликации“, додаде Јаневска.

Министерката потсети дека според потпишаните договори за реализација на проектите во 2015 година, ФИНКИ требало да чини 784 милиони денари, но само 14% од работите во договорот се реализирани и исплатени. Во апсолутен износ, тоа е износ од 110 милиони денари. Додека Факултетот за физичко образование, спорт и здравје требало да чини 432 милиони денари, а реализацијата на проектот е 16,8%, односно исплатени се 73 милиони денари.

Ректорката на УКИМ, проф. д-р Ангелова и деканот на Градежен факултет, проф. д-р Марковски рекоа дека се вклучуваат за да му помогнат на министерството, но и на самите себеси, бидејќи објектите припаѓаат на овој универзитет. Најлоша варијанта, како што посочија, е објектите да останат незавршени, односно неопходно е да се спречи понатамошно пропаѓање и заокружување на отпочнатата инвестиција.