Македонија
СДСМ: Нереално, Андоновски го призна скандалот со тендерите, итно да си поднесе оставка
Со неверување ја примивме скандалозната изјава на министерот Стефан Андоновски. Андоновски ги призна и ги потврди информациите на СДСМ а со тоа и скандалот дека тендерите во неговото министерство ги има добиено сопругот на државната секретарка во истото министерство Гордана Клинчарова, реагираат од СДСМ на изјавата на Андоновски.
„СДСМ ги објави и двата договори од добиените тендери, потпишани лично од Андоновски. Првиот договор за набавка на конференциска и презентациска опрема во вредност од 2.400.000 денари и вториот договор, за набавка на ИТ опрема во вредност од 529.000 денари.
Наместо да се извини и да поднесе оставка, тој дрско се обиде да ја брани Клинчарова а всушност ја дозакопа.
Андоновски вели дека Државната секретарка, во случајот сопругата на тој што го добил тендерот, била само ангажиарана во административно – буџетско работење на министерството. А Државниот секретар во секое министерство па и во неговото раководи со целата администрација. Што значи дека Клинчарова е шефица на сите кои учествувале во водењето на постапката за оваа и на било која друга јавна набавка“.
Според СДСМ, изјавата на Андновски дека не може да знае со кого е потпишан Договорот паѓа во вода затоа што на договорот е неговиот потпис и потписот на сопругот на Клинчарова, Мартин Клинчаров.
„Или Клинчаров не му се видело познато презиме на Андоновски? Овој случај е најеклатантен пример за конфликт на интереси, непотизам и корупција што е одлика на ВМРО-ДПМНЕ. Тендерските мрежи на ВМРО-ДПМНЕ сè повеќе се шират, а институциите мора итно да реагираат“
Бараат јавното обвинителство и ДКСК веднаш да постапат по овој случај. Андоновски без одлагање да поднесе оставка и целосно расчистување на коруптивните шеми во Министерството.
СДСМ, како што велат, нема да дозволи оваа афера да помине неказнето. Ќе бараат одговорност сè додека правдата не биде задоволена. Ова не е само прашање на злоупотреба на функцијата – ова е удар врз довербата на граѓаните и државните институции, додаваат од партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Љутков од Виница: По седум години започнуваме со нови културни инвестиции за заштита и промоција на културното наследство
Министерот за култура и туризам Зоран Љутков денеска е во посета на Општина Виница.
Покажуваме, рече тој, дека и помалите општини заслужуваат системска поддршка и внимание, особено кога станува збор за заштита и промоција на културното и историското наследство.
На археолошкиот локалитет Виничко Кале, каде е откриено едно од најзначајните богатства на македонската археологија со ретка уметничка и духовна вредност, познатите теракотните икони, министерот најави почеток на голем проект за истражување, конзервација и ревитализација на локалитетот.
„Во 2026 година Министерството за култура и туризам, преку своите институции: Националниот конзерваторски центар и Археолошки музеј од Скопје заедно со локалниот Музеј „Теракота“ од Виница, ќе започне со реализација сеопфатен проект за истражување, заштита, конзервација и ревитализација на локалитетот. Проектот вклучува целосна конзервација на објектите и на бедемите, структурна стабилизација на загрозените делови, како и современи археолошки истражувања, што ќе овозможат долгорочна заштита и достапност на локалитетот за јавноста“, рече Љутков.
Целта е, како што истакна, Виничко Кале да стане централна точка за културен туризам, научни истражувања и едукативни програми во овој дел на државата. Тоа, според кажаното не значи само зачувување на наследството, туку и нова перспектива за економски и туристички развој на целиот регион. Локалитетот ќе стане жив културен простор, отворен за сите граѓани, посетители и идни генерации.
Во Виница Љутков ќе ги посети и сите локални институции од областа на културата.
Македонија
(Видео) Милевски: Изборниот процес во Виница продолжува со закани, уцени и казни на секој чекор
Изборниот процес пред првиот круг во Виница започна со насилство, инциденти и нарачани апсења на неистомисленици на ВМРО–ДПМНЕ, а сега продолжува со закани, уцени и казни на секој чекор, посочи на прес-конференција кандидатот за градоначалник на Виница од СДСМ, Гоце Милевски.
Како што оцени, веќе повеќе од година и пол, политичката, а во голема мера и институционалната моќ во Општина Виница, се концентрира во рацете на еден човек, Митко Костадиновски – Книжар.
„Координатор на Општинскиот комитет Виница, началник на шумска полиција на државно ниво и истовремено кандидат за градоначалник – еден човек кој, според бројни сведоштва и реакции од јавноста, има влијание врз сите институции во општината. Оваа концентрација на моќ не е случајна. Таа, според голем дел од граѓаните и јавноста, се одржува преку притисоци, уцени, поткупи и физички пресметки – не само со политички противници, туку и со сопствени партиски членови. Се зборува дека истиот човек одлучува кој ќе биде началник на полиција, секретар на општина, директор на училиште, раководител или вработен во институција – па дури и како ќе се преуредуваат училници во училиштата“.
Таквото владеење, додава Милевски, нема ништо заедничко со демократијата и разумот.
Тоа, како што напомена, не е начин на управување што води кон развој, туку кон страв, поделби и злоупотреба на институциите за лични и партиски цели.
„Твојот човек од народот“ на ВМРО–ДПМНЕ за Виница, според информации што кружат во јавноста, зад себе носи минато исполнето со контроверзии и сериозни сомнежи: поврзаност со случајот Детонатор, со ослободување на осомничен инспектор за пожарот во „Пулс“, со скандалот околу сечата на дрва во Малешевијата, како и со наводи за вмешаност во напад врз кандидат за советник од ромската заедница.
Изборот на Митко Костадиновски за градоначалник, според многумина, би значел ризик за иднината на нашиот град и на идните генерации.
Клучното прашање што останува без одговор е зошто досега нема ниту една негова јавна реакција или став за сите овие случаи“, прашува Милевски.
Упатува порака до виничани да не се плашат.
„Не дозволувајте да ве уценуваат или поткупуваат. Не прифаќајте притисоци, а секој обид за закана или репресија охрабрувам да го пријавите.
Исто така, упатувам порака и до симпатизерите и членовите на ВМРО–ДПМНЕ Виница:
Време е партијата да си ја вратите во свои раце и повторно да се борите со идеи, програми и визија – а не со страв и насилство.
Македонија
Герасимовски: Воведуваме ваучери за користење вештачка интелигенција, современа поддршка за младите во Центар
„Воведуваме месечни ваучери за користење на вештачка интелигенција, со цел младите да добијат пристап до современи дигитални алатки и да ги унапредат своите знаења и вештини. Во новиот мандат вложуваме во младите преку конкретни мерки кои ќе им овозможат да го развијат својот потенцијал и да бидат подготвени за иднината,“ изјави кандидатот за градоначалник на Општина Центар за втор мандат, Горан Герасимовски.
Тој посочи дека особено внимание ќе биде насочено кон младите кои не се вклучени во образование, вработување или обуки.
„За оваа група креиравме програми за активно вклучување преку обуки, интерактивни работилници и волонтерски ангажмани, со цел да ги поттикнеме нивната мотивација и личен развој,“ нагласи Герасимовски.
Дополнително, Општина Центар, како што е соопштено, ќе ги зголеми за 50% стипендиите за талентирани ученици, а ќе продолжи и со субвенциите за полагање возачки испит и за купување велосипеди.

