Намалување на членовите на управните и надзорните одбори, укинување и спојување на непотребните институции и воведување јасни правила за професионално управување, најави министерот за јавна администрација, Горан Минчев, порачувајќи дека започнува процес на рационализација на јавниот сектор.

Според него, доста беше јавниот сектор да биде сервис за партиските кадри и распределба на привилегии.

Како што оценува, управните и надзорните одбори со години беа структури со преголем број членови, со сомнителни критериуми и без отчетност. Тоа, за Минчев е неприфатливо.

„Ќе воспоставиме ред, помалку одбори, помалку членови и избор само на професионалци со знаење, стручност и компетенции, а не со партиска книшка“, потенцира Минчев.

Најави дека ќе се стави крај и на нефункционалните институции.

Како што вели, во државата има институции кои постојат само на хартија, со по неколку вработени и преклопени надлежности.

Тој оценува дека тоа се симболи на неефикасност и расфрлање на државните пари.

„Со нивно спојување и оптимизација ќе обезбедиме рационализација, помалку трошоци, подобра координација и поефикасни услуги за граѓаните“.

Најавувајќи модерна и професионална администрација, Минчев појасни дека се подготвува нов закон за висока раководна служба со кој ќе биде искоренета партизацијата при избор на функционери.

Нагласи дека никој повеќе нема да биде назначен по партиска книшка, туку според знаење, искуство и стручни вештини.

Радарот на Скопскиот аеродром утрово повторно е ставен во функција и проблемот е решен за само три дена. Сите безбедносни протоколи се испочитувани овие денови и сообраќајот се одвива безбедно. Проблемот постои триесетина години, зошто претходната Влада седум години не го решила проблемот и зошто не е инсталиран новиот радар кој е набавен, – истакна заменик претседателот на Владата и министер за транспорт Александар Николоски, при денешната работна посета на Кавадарци.

„Од утрово имаме целосно функционален радар на Скопскиот аеродром и на тој начин проблемите се решени. Проблемот успеавме да го решиме во рекордно време од само три дена и уште повеќе да детектираме една работа која што можеби не и беше позната на јавноста, а тоа е дека и досега, седум години наназад, овој радар работел само со еден канал. Во овие три дена, со заедничка координација, на повеќе ресори од Владата, како и со активна работа на раководството на М-НАВ, како и во пријателска работа и помошта од контролата за летање од Бугарија, како и Владата на Италија успеавме да најдеме решение и сега двата канали се во функција”, истакна Николоски.

„Сите безбедносни протоколи беа испочитувани овие три дена и гледате дека најнормално слетуваа и полетуваа авиони од сите авио компании и така ќе продолжи да биде и во иднина” додаде Николоски.

Посочи дека моменталниот радар е 27 години стар и за истиот престанале да се произведуваат делови уште пред седум години. Исто така праша зошто претходната Влада на СДСМ не го инсталирала новиот радар кој е набавен, пристигнат во Скопје и стои во депо. Тој ја повика опозицијата да не шири паника помеѓу граѓаните.

„Навистина е на раб на чудо како успеавме да набавиме резервни делови. И во исто време да прашам, зошто претходната Влада на СДСМ не го инсталираше целосно новиот радар кој што е пристигнат во Скопје од компанијата “Леонардо” и стои немонтиран. Еве да најавам дека на следната седница на Влада во вторник, ние ќе донесеме одлука со која што ќе пристапиме кон монтирање на истиот”, рече Николоски.

Кандидатот за градоначалник на Општина Чаир од коалицијата ВЛЕН, Изет Меџити, денеска го претстави еден од најзначајните проекти за зачувување на културното наследство и за развој на Чаир како современ културен и урбан центар.

Тој соопшти дека „Шенѓул амам“, еден од највредните споменици на османлиската архитектура во Скопје, ќе биде реставриран и ќе добие нов изглед преку детален проект кој веќе е подготвен.

„Нашата цел е да го вратиме овој историски бисер во функција на граѓаните и на културата. По реставрацијата, „Шенѓул амам“ ќе се претвори во современ културен центар каде ќе се одржуваат активности од областа на сликарството, музиката, литературата и уметничкото творештво“, изјави
Меџити.

Додаде дека објектот ќе биде наменет за здружението “Јени Јол“, кое повеќе од 70 години е чувар на турската култура, јазик и литература во Северна Македонија, како и за здружението “Лиљан“, кое повеќе од една деценија достојно ја претставува бошњачката култура.

„Со овој проект не само што го чуваме и негуваме нашето наследство, туку создаваме и услови за новите генерации да имаат свој простор за изразување и креација. Ова ќе биде место каде ќе се среќаваат генерации, култури и идеи, симбол на Чаир како општина која отсекогаш знаела само
да обединува“, истакна Меџити.

Тој нагласи дека инвестициите во културата ќе бидат една од клучните столбови на неговата визија за Чаир.

„Како иден градоначалник на Општина Чаир, мојата визија е јасна – да инвестираме во културата, да ја оживееме Чаршијата и да ја направиме нашата општина вистински модерен, урбан и културен центар. „Шенѓул амам“ ќе биде симбол на таа визија, мост меѓу минатото и иднината, место кое
ќе нѐ инспирира“, појасни Меџити.