Македонија
Северна Македонија ќе учествува на самитот на НАТО во Лондон на 3 и 4 декември
За неколку дена во Лондон, нашата држава седнува на масата на лидерскиот самит на алијансата, рамноправно со најмоќните земји на светот. Министрите за одбрана и за надворешни работи, Радмила Шекеринска и Никола Димитров, на денешната средба со шефот на канцеларијата на НАТО во Скопје, полковникот Зоран Јанковиќ, се заблагодарија за целата досегашна поддршка од НАТО-канцеларијата, особено поддршката во последните две години и истрајноста во достигнувањето на оваа, за граѓаните и државата, децениска стратешка цел.
Средбата се реализира во пресрет на самитот на алијансата во Лондон на 3 и 4 декември, на кој ќе учествува висока владина делегацијата, предводена од претседателот на Владата, Зоран Заев.
Министерката Шекеринска посочи дека нашето учество на лидерскиот состанок на НАТО, како рамноправни со другите 29 сојузници, е историски ден за државата.
„Првпат не дозволуваме некој друг за нас да дискутира, туку седиме на масата на која се носат одлуки што влијаат на целиот свет. На состанокот на НАТО-лидерите ќе бидеме не само присутни туку и ќе учествуваме и за разлика од ситуацијата пред една и пол година во Брисел, кога за нас се дискутира без да бидеме внатре, сега ќе имаме можност да кажеме – да, ние нашата историска улога ја исполнивме. Тоа немаше да се случи да не беше стратешката поддршка на сите граѓани на оваа држава, тоа немаше да се случи без навистина стратешкиот поглед на Владата, но тоа немаше да се случи и без големата поддршка од страна на алијансата“, рече министерката Шекеринска по средбата.
Министерот Димитров ги истакна посветеноста и важноста што нашата земја му го придава на членството во НАТО претставувајќи ги нашите позиции во однос на актуелни значајни прашања за алијансата.
„Денес, со колешката Шекеринска имавме убава можност да му се заблагодариме на полковникот Јанковиќ, кој заедно со сите свои претходници има голем удел во претстојниот голем успех – исполнување на една од двете најголеми стратешки цели, практично од нашата независност. Нè дели само една ратификација од полноправното членство. Во Министерството за надворешни работи веќе подготвивме нацрт-закон за ратификација на северноатлантскиот договор. Како што рече генералниот секретар Столтенберг – убаво е да се има пријатели, убаво е да се има моќни пријатели и првпат на лидерската маса ќе бидеме застапени, предводени од премиерот Заев, на 3 и 4 декември во Лондон. Тоа што за 10 месеци имаме 28 ратификации, говори дека сме добредојдени во алијансата и се надеваме дека тоа ќе биде одбележано и во еден параграф од завршната декларација на состанокот на лидерите во Лондон“, рече тој.
Шефот на канцеларијата на НАТО во државата, полковникот Јанковиќ, изрази задоволство од средбата со министрите Шекеринска и Димитров непосредно пред историскиот самит, каде што ќе се разговара за многу важни теми за алијансата.
„Досега имавте можност да земете директно учество во состаноците на ниво на началници на генералштабови, на ниво на министри, но следната недела ќе имате можност да седите на маса на лидерскиот состанок. Ова е всушност многу важен показател на посветеноста и напорот што го вложивте во последниве две години, што, секако, е резултат на работата на оваа Влада, а особено би рекол на Министерството за одбрана и Министерството за надворешни работи, и од мое лично име би сакал да ви се заблагодарам за овие напори“, рече полковникот Јанковиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) СДСМ бега од темата Груби и од борбата против корупцијата, рече Петрушевски
Пратеникот на ВМРО-ДПМНЕ, Бране Петрушевски, на денешната прес-конференција оцени дека Социјалдемократскиот сојуз, како што рече, бега од темата Груби, и наместо да го поздрави справувањето со криминалот, нуди приказни за театар и циркус.
„Времето покажува дека на СДС – безрбетна најдобро ѝ оди кога нешто треба да се продава, распродава и да се мести. И тоа е така без разлика дали тоа е местење на тендери или продавање на државата“, изјави Петрушевски.
Тој рече дека партијата наместо да поздрави, како што наведе, „чин на справување со незаконити дејствија, криминал, фаќање на лица кои бегаат или бегале од правдата“, се занимава со други теми.
„Очигледно е зошто го прават тоа, веројатно затоа што во конкретниот случај со Артан Груби не можат ни да се сетат во што се биле заедно вмешани, во какви зделки, коруптивни активности или криминал. Поточно во што се шурувале“, изјави Петрушевски.
Тој додаде дека актуелното раководство на СДСМ, меѓу кои ги спомена Венко Филипче, Оливер Спасовски, Јованка Тренчевска и Јон Фрчкоски, „кажуваат секојдневно некакви приказни“, но дека суштината, според него, е борбата против корупцијата.
„Професионална, координирана активност на надлежните служби за да се фати бегалец од правдата покажува на дело дека сега борбата со корупцијата и криминалот е решителна“, изјави Петрушевски.
Тој нагласи дека за ВМРО-ДПМНЕ клучна е борбата со корупцијата и криминалот и, како што рече, „поставувањето на здрави темели на начелото на владеење на правото“.
Македонија
Кардиологија и Кардиохирургија стануваат еден центар: заштедите од спојувањето ќе одат во опрема и едукација, најави Алиу
Владата на последната седница, која се одржа минатиот вторник(24.02.2026), на предлог на Министерството за здравство, донесе одлука за спојување на Клиниката за кардиологија и Државната клиника за кардиохирургија, со цел обезбедување повисок степен на интегрираност, координација и ефикасност во третманот на пациентите со кардиоваскуларни заболувања, преку рационално искористување на постојните човечки, просторни и технолошки ресурси на двете установи.
„Со донесената одлука за спојување на двете клиники формираме единствен центар на терциерно ниво за кардиоваскуларна медицина, кој овозможува континуитет на дијагностичко-терапевтскиот процес, од превенција и дијагностика, до интервентен и хируршки третман. Преку укинување на административните дупликати и оптимизација на организациската структура, создаваме предуслови за заштеда на средства кои ќе се реинвестираат во унапредување на квалитетот на услугите, модернизација на медицинската опрема и професионална едукација на кадарот“, појаснува министерот за здравство, Азир Алиу.
На овој начин ќе се овозможи подобра искористеност на капацитетите, односно зголемен број интервенции со интеграција на лабораториските, стерилизациските и операционите служби. Пациентите ќе добиваат комплетна кардиолошка и кардиохируршка грижа во рамки на единствена установа, без административни пречки и чекање трансфер, што значи поголема достапност и континуитет на здравствените услуги.
Воедно, спојувањето на клиниките ќе придонесува кон развој во сегментот на едукација и истражување, со креирање обединет академски центар со повеќе можности за обука на специјализанти, супспецијализанти и развој на научни програми.
Македонија
Исчистен просторот кај СЦ „Борис Трајковски“, подигнати 3.500 м³ отпад за 100 дена
Општина Карпош спроведе сериозни активности за уредување на јавните површини. Дивите депонии на повеќе локации се расчистени, а просторот околу Спортскиот центар „Борис Трајковски“ е целосно исчистен. На потегот кај „Скупи 5“ и кон Бардовци се подигнати над 3.500 кубни метри отпад, информираат од општината.
Покрај тоа, од општината велат дека се реализирани повеќе од 50 интервенции на јавното осветлување, спроведена е редовна дератизација и одржување на противпожарната инфраструктура во училиштата и градинките. Исто така, објавен е повик за стерилизација на улични мачки, а во училиштата започнаа активности за производство на компост и намалување на аерозагадувањето.

