На денешната средба меѓу директорот на Македонски народен театар, Никола Кимовски, и Ректорот на факултетот на ИУ ЕУРОПА ПРИМА – Скопје, проф. д-р Александар Трајковски, во просториите на МНТ, се потпиша Меморандум за соработка меѓу двете институции.

Во согласност со изразената желба на двете институции за развивање партнерски односи, дефинирање на конкретни програмски активности, како и подобра соработка во областа на културата, се овозможува учеството на студентите од Универзитетот (како дел од нивната практична работа), за време на студиите во тековните проекти во МНТ.
Користење на просторниот капацитет на МНТ за подготовка и одржување на магистерски и дипломски испити, следење на претставите од тековниот репертоар на МНТ, од страна на студентите на Универзитетот, без финансиска надомест, како и користење на просторните и технички ресурси на Универзитетот за потребите на МНТ.

Двете институции со овој Меморандум, поставуваат основа за долготрајно партнерство и го препознаваат значењето на размена, едукација и промоција на младите таленти, како основа за понатамошен развој на културата и уметноста во државата.
Согласно Меморандумот за соработка, на 6 февруари со почеток во 19:00 часот, на малата сцена, се одигра претставата „Еволуцијата на распадот“ по „Отело“ на В. Шекспир во класа по актерска игра и театарска режија на проф. Дејан Пројковски. Режисер на претставата е Дамјан Димовски, а како композитор се потпишува Дарко Спировски.
Во „Еволуцијата на распадот“ играат: Илин Јовановски – Јаго, Тодор Стојковски – Касио, Бранко Михајлоски – Отело, Ѓорѓе Нешковиќ – Родриго, Леонида Гулевска – Дездемона и Илина Чонкова – Емилија.

ПР

Демократската унија за интеграција (ДУИ) денеска соопшти дека го отпочнува сеопфатниот процес на реформи и ветинг во партијата, предводени од претседателот на партијата Али Ахмети и раководството на партијата. Оваа иницијатива, како што велат, ја нагласува посветеноста на ДУИ за добро владеење и интегритет, поставувајќи нов стандард за политичките партии во регионот.

„Пратениците од ДУИ го отпочнаа процесот на реформи со проценка на ризик од корупција и го потпишаа Кодексот за добра пракса и интегритет на ДУИ. Овој кодекс е усогласен со Кодексот за добра практика на полето на политичките партии, усвоен со Резолуција на Венецијанската комисија и на Парламентарното собрание на Советот на Европа.

ДУИ покрај пратениците, решително продолжува со проширување овој процес на ветинг таргетирајќи ги сите високи партиски функционери, членовите на Претседателството на ДУИ и раководството на локалните партиски ограноци. Со стратешкиот акциски план ДУИ има за цел не само да го зајакне ставот на партијата против корупцијата, туку и да ја поттикне културата на интегритет во политичките процеси“.

Како предводник на овие реформи, ДУИ, додаваат од партијата, поставува преседан за другите политички партии.

Нагласуваат дека оваа иницијатива ја потврдува посветеноста на ДУИ за владеење на правото и ја демонстрира одлучноста на партијата за справување со корупцијата во сите сегменти.

„ДУИ е посветена на градење исклучителен институционален и личен интегритет“, изјави Али Ахмети, претседател на ДУИ. „Нашиот пристап е сеопфатен и добро планиран, со фокус на поединци со силен интегритет кои ќе ја бранат антикорупциската агенда и ќе го движат процесот на ветинг.

Преку стратешките акции и непоколеблива посветеност, ДУИ останува посветена и решителна да предводи реформи преку својот личен пример, со крајна цел да изврши значајни промени во партијата, како и во националната рамка на владеење“, се истакнува во соопштението.

ЈП Комунална хигиена-Скопје ја демантира изјавата на градоначалникот на општината Центар, каде што, како што велат, повторно се наведени низа невистинити информации поврзани со активностите на Претпријатието во оваа скопска општина.

Демантот го пренесуваме во целост:

„На територијата на општината Центар, ЈП Комунална хигиена Скопје секојдневно го собира и транспортира комуналниот отпад без никаков застој, според динамиката утврдена со Оперативната програма за собирање и транспортирање на комуналниот отпад од подрачјето на градот Скопје.

Го информираме градоначалникот дека доколку констатирал проблем со масовно одлагање отпад надвор од поставените контејнери, во тој случај станува збор за кршење на Законот за јавна чистота, а токму во негова надлежност е преку општинските инспекциски служби да ги санкционира лицата или правните субјекти што ќе бидат затекнати при непрописно одлагање отпад на јавни или сообраќајни површини.

Во текот на 2024 година, екипите на ЈП Комунална хигиена-Скопје подигнаа и транспортираа вкупно 167 364 тони комунален отпад од скопските домаќинства во урбаниот и во руралниот дел на градот, при што се реализирани 36 245 тури за собирање и транспорт на отпадот.

Некоректно е постојано паушално да се обвинува ЈП Комунална хигиена-Скопје за активностите што спаѓаат во надлежност токму на општина Центар, како што е одржувањето на хигиената на сервисните улици, за чиешто одржување се надлежни комуналните служби при самата општина.

Уште еднаш го потсетуваме градоначалникот Герасимовски и дека ЈП Комунална хигиена Скопје во текот на 2024 година отстрани вкупно 22 194 кубни метри отпад од диви депонии на територијата на градот Скопје, при што голем дел од активностите за подигнување непрописно одложен отпад беа реализирани на територијата на општината Центар. Воедно, во периодот 05.08.2024 – 13.09.2024 во сите скопски општини беше реализирана акција за собирање кабаст отпад во чиишто рамки беа поставени специјални садови каде што граѓаните имаа можност да го одложат својот кабаст отпад. Во текот на оваа акција од страна на екипите на ЈП Комунална хигиена Скопје беа подигнати и транспортирани 130 кубни метри кабаст отпад само на територијата на општината Центар.

Го замолуваме градоначалникот да престане да ги негира наведените активности и акции поврзани со одржувањето на хигиената и чистотата на општината Центар“, се вели во демантот.