Македонија
Се бара спас од ѓубрето: Во Ѓорче Петров ќе се чисти со машини од Велес, во Аеродром помага Штип

Скопските градоначалници почнаа да бараат помош од други градови да им испратат возила за собирање на комунален смет поради бојкотот на скопските комуналци и натрупаноста на Скопје со ѓубре.
Велат дека поради хаосот кој настана поради штрајкот во јавното претпријатие „Комунална Хигиена“, неопходно е веднаш самите да го решаваат проблемот со натрупаниот смет во контејнерите.
„Побарав помош од градоначалникот на Општина Велес, Марко Колев, кој ќе испрати соодветни возила за собирање на комунален смет. Вечерва екипите на Комунален пункт на Општина Ѓорче Петров заедно со механизација од Општина Велес ќе бидат на терен“, објави градоначалникот на општина Ѓорче Петров, Александар Стојковски.
Помош од Велес побарал и градоначалникот на Бутел, Дарко Костовски, а помошта ќе стигне уште вечерва.
„Граѓаните на општина Бутел не смеат да бидат заложници на нечие несовесно работење“, истакна тој.
Аеродром ќе го чистат комуналците од Штип. Градоначалникот Тимчо Муцунски порача дека најважна е грижата и здравјето на граѓаните.
„На мое барање, Градоначалникот на Општина Штип Иван Јорданов одобри испраќање на механизација и работници кои со поддршка на општинските капацитети, вечерва ќе спроведат акција за расчистување на натрупаниот смет од контејнерите. Благодарност до Иван и Општината Штип за поддршката и помошта. Ние, утре со своите расположливи капацитет продолжуваме да работиме на расчистување на сметот и контејнерите“, вели Муцунски.
Градоначалникот на Гази Баба, Стефковски пак остварил телефонска комуникација со градоначалниците на општините Илинден и Петровец, Александар Георгиевски и Борче Митевски со кои се договориле да испратат камиони за собирање на сметот од контејнерите во општина Гази Баба.
„Ја мобилизирав дел од администрацијата и целото ЈКП Гази Баба и во текот на вечерта ќе се превземат теренски активности за подигање на сметот. Граѓаните пред и над се!“, рече Стефковски.
Претходно денес, Општина Центар објави дека сама ќе го собира отпадот оти состојбата е алармантна.
Комуналците бојкотираат и не го собираат отпадот откако директорката Косана Мазнева не им го продолжи договорот на стотина лица, за кои тврди дека 20 години земале плата, а не оделе на работа. Вработените во Јавното претријатие синоќа се собраа на протест пред дирекцијата од каде на Мазнева и’ порачаа дека бараат да им ги врати колегите и да им ги покачи платите за 50 отсто. Во жестока дискусија пред дирекцијата, Мазнева им вети К15 и порача дека законите мора да функционираат за сите.
Преговорите помеѓу директорката Мазнева и вработените продолжуваат од понеделник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски со пораки до младите: Нема подобар начин да го изразиме нашиот патриотизам од формирање семејство

Премиерот и претседател на ВМРО-ДПМНЕ, Христијан Мицкоски на настанот во организација на УМС по повод 34 години од формирањето на унијата, упати пораки на обединување како на младите така и на сите граѓани од сите етнички заедници, затоа што тогаш сите сме посилни.
Мицкоски ова го истакна откако претходно посочи дека доаѓа од настан во Тетово, каде беше пуштен во употреба булевар и на кој настан присутни беа голем број на млади лица од сите етнички заедници, Македонци, Албанци, Турци, Роми.
„Мојата прва порака од овој настан е да бидеме сите како едно и кога сме како едно, тогаш никој ништо не може да ни направи. Кога сме раздвоени, кога сме поделени тогаш сме чесен плен за предаторите. Затоа е многу важно да бидеме сите ние како едно, а тоа посебно важи за младите луѓе“, рече Мицкоски.
Тој истакна дека исто така е важно, младите луѓе да бидат авангарда, каква што е Унијата на млади сили на ВМРО-ДПМНЕ.
„Ова не е само роденден, 34 години Унија на млади сили на ВМРО-ДПМНЕ, туку ова претставува и една приказна која што се прераскажува од генерација на генерација, од Извршен комитет на Извршен комитет. Јас се надевам дека таа приказна ќе трае децении, а зошто да не и векови понатаму и ќе се прераскажуваат сите оние случувања кои што денеска се случуваат во една критичка, позитивна конотација. Убеден сум кога го гледам сето ова и тој потенцијал на млади луѓе овде, дека сето тоа ќе продолжи во таа насока“, истакна Мицкоски.
Понатаму Мицкоски рече дека кога зборува за приказната наречена УМС на ВМРО-ДПМНЕ, посочувајќи дека на УМС денеска се потпира функционирањето на државата, затоа што голем е бројот на луѓе кои што денеска предводат големи општини кои го поминале својот пат во Унијата на млади сили, се градоначалници, претседавачи на Совети, се директори на јавни претпријатија, пратеници како и министри во Владата која што својата младост ја поминале како дел од унијата.
„И затоа, со еден збор кога ќе заокружам, можам да кажам дека денеска Унијата на млади сили на ВМРО-ДПМНЕ ја води Македонија, ги води процесите во Македонија. И јас сум убеден дека голем дел од вас и во иднина ќе продолжат тие процеси да ги водат, дали на локално ниво, дали во рамките на централното ниво. Јас сум пресреќен кога гледам вака мотивирани луѓе коишто се подготвени да го преземат тој предизвик и да се соочат со тие предизвици на дневно ниво и да ги решаваат“, потенцираше Мицкоски.
Мицкоски до младите испрати уште една порака посочувајќи дека за секој еден млад човек убава е комоцијата во животот, секој еден млад човек сака да прошета, да излегува, да другарува, да стекнува нови пријателства, едноставно да ужива во младоста и тоа е во ред, но дека многу важна работа и вредност е и семејството.
„Во животот стекнуваме вредности и тие вредности понатаму ние ги пренесуваме на тие коишто нас не наследуваат, а една од тие важни вредности е и семејството. Денеска современиот патриотизам е и љубовта кон Македонија и сето она коешто е поврзано со Македонија е и иднината на Македонија како држава, но и иднината на еден од најмалку бројните народи во Европа, а тоа е македонскиот народ заедно со останатите граѓани кои што живеат денеска во Македонија, зависи токму од таа вредност, од тој столб наречен семејство. Тоа е многу важно, затоа што ако имаме многудетно семејство и доколку млади почнеме да формираме семејство, тогаш нема подобар начин да го изразиме нашиот патриотизам и љубовта кон сопствениот народ и сопствената држава“, посочи Мицкоски.
Тој додаде дека ова го кажува затоа што ние сме во една фаза на носење на закони, а дел веќе и се донесоа во основното и средното образование, каде што ја промовираме нашата единствена политика, а тоа е семејството како единствена вредност, како столб на државноста на Македонија, каде што ја напуштаме родовата политиката која ја водеше минатата влада.
„Тоа е она кое што е содржано во оние законски измени коишто ние ги имаме. Читанката, нема повеќе да биде јас, мама и тато, туку ќе биде јас, мама, тато, дада и бато. Тоа е многу важно, затоа што кога мене ќе ме прашаат кои се мерките кои вие ги носите во насока на подобра демографија, во насока на подобри и помногубројни семејства, тогаш мојот одговор е тука“, рече меѓу другото Мицкоски.
Македонија
Таравари бара отворање на истрагите за Дурмо Турс, Беса Транс и модуларна, но и целосна истрага за Кочани без влијанија

Алијанса за Албанците на Арбен Таравари, на денешниот партиски состанок донесе резолуција со која повика на независна и транспарентна истрага за трагедијата во Кочани, но и повторно отворање на истрагите за претходните трагедии – Дурмо Турс, Беса Транс и модуларната болница во Тетово.
Во резолуцијата се бара:
1. Спроведување на целосна, независна и транспарентна истрага за трагедијата во Кочани, под раководство на надлежните институции, ослободени од секакво политичко влијание, со обврска за редовно и јавно информирање на граѓаните за текот и наодите од истрагата.
2. Се бара повторно отворање на истрагите за претходните трагедии – Дурмо Турс, Беса Транс и модуларната болница во Тетово – во кои животот го загубија вкупно 135 граѓани, и за кои сè уште не е утврдена ниту институционална, ниту индивидуална одговорност.
3. Се бара јасна идентификација и утврдување на одговорноста, и индивидуална и институционална, преку длабинска анализа на причините за системските пропусти, адресирајќи ја негрижата, неспособноста и корумпираните практики.
4. Се потенцира неопходноста од зајакнување на транспарентноста и отчетноста, преку објавување на инспекциските постапки, контролни извештаи и редовно и достапно споделување на податоци со јавноста.
5. Се бара детална проверка на имотот и интересите на сите одговорни функционери и инспектори, со цел откривање на евентуален судир на интереси или можни коруптивни врски со инспектираните субјекти.
6. Се препорачува спроведување на вонреден надзор во сите објекти со висок ризик, во согласност со меѓународните безбедносни стандарди, особено во секторите за угостителство, здравство, образование, спорт, транспорт и градежништво.
7. Се бара итна реформа на казнената политика, што ќе обезбеди правични, строги и спроведливи санкции за сите оние кои, преку свои дејствија или пропусти, придонеле до случување на вакви трагедии.
8. Се инсистира на итна и целосна примена на сите антикорупциски препораки дадени од Комисијата за антикорупција и Државниот завод за ревизија, без одлагање, одстапување или селективност.
Собранието на Алијансата за Албанците повторно ја потврдува уверувањето дека трагедијата во Кочани не смее да се сведува на болна статистика, туку мора да послужи како пресвртница во градењето на нова култура на одговорност, безбедност и владеење на правото во Република Северна Македонија.
Македонија
Во странство се лекуваат 68 пациенти по пожарот во „Пулс“, најавени неколку исписи деновиве

Во моментот во медицинските центри надвор од државата се лекуваат 68 лица, односно еден пациент е испишан од медицинскиот центар во Љубљана и својот медицински третман го продолжува во друга држава каде лицето има здравствено осигурување, информираат од Министерството за здравство.
Најавени се неколку исписи за пациенти за наредниве денови, по финализирање на постапката со протоколите.
Непроменета останува состојбата на пациентите кои се третираат во странство, вклучително и состојбата на критичните пациенти.
Во клиниките во Скопје се лекуваат 11 пациенти, од кои шест во Хируршка клиника ,,Св. Наум Охридски”, двајца на Клиниката за токсикологија, останува еден пациент на Клиниката за пластична хирургија, каде тројца се испишани на домашно лекување и двајца во ,,Систина”.