Македонија
Се воведува авиолинија Скопје – Сараево

AEGEAN, грчкиот национален авиопревозник и член на STAR ALLIANCE, ќе воведе нова авиолинија од Меѓународниот аеродром „Скопје“ до Меѓународниот аеродром „Сараево“ од 2 октомври годинава, најавуваат од „ТАВ аеродроми“.
Како што се наведува, на оваа релација ќе има три лета неделно, односно секој понеделник, среда и петок.
„Возбудени сме што можеме да објавиме и да им честитаме на AEGEAN за одлуката да воведат лет од Скопје до Сараево од октомври оваа година и да овозможат одлична регионална поврзаност од Атина на југ преку Скопје до Сараево на северот на Балканот. Оваа авиоконекција во исто време претставува и значајно достигнување во нашата посветеност како аеродромски оператор за подобрување на опциите за авионски патувања за нашите ценети патници“, изјави Неџат Курт, генерален директор на „ТАВ Македонија“.
До крајот на летниот ред на летање за 2023 година, или до крајот на октомври, времето на поаѓање од скопскиот аеродром ќе биде во 19 часот, со време на пристигнување на аеродромот во Сараево во 20.10 часот, а времето на поаѓање од аеродромот во Сараево ќе биде во 20.50 часот со време на пристигнување на скопскиот аеродром во 21.50 часот.
Во текот на зимската сезона 2023/2024 времињата на пристигнување/заминување ќе бидат слични.
Резервација на авионски билети е достапна на веб-страницата на AEGEAN https://en.aegeanair.com/ и преку туристичките агенции.
„Задоволство ни е да го објавиме воведувањето на нашата нова авиолинија од Скопје до Сараево, која ќе почне да сообраќа во октомври 2023 година и подобрувањето на нашите операции меѓу Атина и Скопје преку зголемен капацитет и фреквенции бидејќи тоа ја одразува нашата посветеност да го прошириме присуството на Балканот и да го зајакнеме нашиот белег преку обезбедување зголемена поврзаност со висококвалитетните услуги на AEGEAN. Оваа авиолинија го означува и нашето враќање во Босна по предизвиците наметнати од ковид-пандемијата и пресреќни сме што повторно ќе се поврземе со нашите ценети патници во овој регион. Од октомври патниците од Скопје ќе имаат поголеми можности за поврзување преку Атина со мрежата на AEGEAN со речиси секојдневен лет, што ќе го прошири нашиот досег до дестинации во Грција, Европа и Блискиот Исток. Оваа новина нуди можности за патниците да истражуваат и да искусат разни дестинации со погодностите и сигурноста на високите стандарди по кои е позната авиокомпанијата AEGEAN“, изјави Роланд Јаги, главен комерцијален директор на AEGEAN.
„Среќни сме што по тринаесет години, Сараево повторно ќе се поврзе со главниот град на Северна Македонија – Скопје. Особено нѐ радува фактот што воведувањето на оваа авиолинија е резултат на заедничката и многу успешна соработка меѓу двата аеродрома – Меѓународниот аеродром ‘Скопје’ и Меѓународниот аеродром ‘Сараево’, и AEGEAN, грчкиот авиопревозник, кој ги препозна важноста и потенцијалот за воспоставување оваа авиолинија како одлична форма за подобрување на комуникацијата и зајакнување на соработката во областа на економијата и туризмот меѓу Северна Македонија и Босна и Херцеговина. Веруваме во одличната ефективност и ефикасност на оваа авиолинија и се радуваме на првиот лет на AEGEAN на релација Скопје – Сараево!“, изјави Алан Баиќ, директор на Меѓународниот аеродром „Сараево“.
Како што велат од „ТАВ аеродроми“, додавањето на оваа нова авиолинија на мрежата на рути и во портфолиото на Меѓународниот аеродром „Скопје“ ќе биде уште еден придонес за веќе силниот позитивен тренд на закрепнување на бројките во однос на авиосообраќајот, особено за првата половина на 2023 година.
За периодот јануари – јуни 2023 година, двата македонски аеродрома, Меѓународниот аеродром „Скопје“ и аеродромот „Св. апостол Павле“ во Охрид опслужиле вкупно 1,3 милион патници, што е годишен пораст од 41 % во однос на 2022 година, а во однос на 2019 година, референтна година во однос на патничкиот сообраќај пред ковид-кризата, зголемувањето е 15 % повеќе патници во првата половина од оваа година. Во однос на бројот на летови за истиот период, вкупно 10.299 лета се опслужени на двата аеродрома, што претставува годишен пораст од 23 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски: Пожарите можеби се дел од поинакво сценарио, истрагите за подметнувања се во тек

Министерот за внатрешни работи, Панче Тошковски, изјави дека денеска бил тежок ден со вкупно 20 пожари ставени под контрола, а постојат основани сомневања дека дел од нив биле подметнати.
„Се дадоа натчовечки напори. За повеќето пожари причина беа временските услови и силниот ветер, но имаме сериозни индиции дека човечки фактор стои зад нивното распламтување“, рече Тошковски во денешното обраќање по состанокот на Кризниот штаб.
Министерот посочи дека се истражуваат неколку случаи на пожари во близина на клучни инфраструктурни објекти, патишта, густо населени места и приватни објекти.
„Не сакам да шпекулирам, но можно е да се работи за поинакво сценарио од случајност“, истакна Тошковски, додавајќи дека институциите работат на терен и се надева на брзо расветлување на причините.
Вчера, како што информираше Тошковски, било затекнато едно лице како намерно пали пожар. Истото било приведено, изнесено пред судија и му е изречена најстрога мерка.
Во врска со пожарот кај приватниот отпад во Визбегово, денес се приведени сопствениците на објектот и ќе бидат изнесени пред судија.
Пожарите во Дојран, Николиќ, Паланка, Волково и Визбегово се ставени под контрола. Активиран е и механизмот за европска помош, при што Грција учествува со два канадери и два пешадиски тимови. Тошковски информира дека сите владини институции се мобилизирани.
Македонија
Спој на електричен кабел од бандера разгоре сува трева во Бардовци

Во атарот на село Бардовци, под црквата Св. Троица, од спој на електричен кабел на улична бандера запалена е сува трева која со брза интервенција на мештаните е изгасната.
Општина Карпош соопшти дека своите екипи за косење, денеска и во наредните три дена ги упатувааат да косат сува трева во населеното место Бардовци со цел да се обезбедат куќите кои се наоѓаат во непосредна близина на висока сува трева.
Воедно апелираат до сопствениците на имот во Бардовци да ја окосат тревата, а посеаното жито под итно да се ожнее, како превентива од можни пожари.
Општина Карпош и натаму будно ќе јас следи состојбата во Бардовци и Злокуќани и апелира на поголема будност и од страна на граѓаните.
Македонија
(Видео) СДСМ бара вонредна координативна седница во Собранието за справување со пожарите

Координатрот на пратеничката група на Социјалдемократскиот сојуз, Оливер Спасовски, на денешната собраниска седница за пратенички прашања од опозицијата, го повика претседателот на Собранието, Африм Гаши, да свика итна координативна седница за справување со пожарите.
„Македонија гори во моментот, во Крива Паланка за жал ја имаме првата човечка жртва. Горат неколку куќи во кумановско во село Читирце, под опсада е веќе село Долно Коњае, гори селото Николиќ итн. Затоа барам веднаш претседателот Африм Гаши да се врати во Собранието каде и да е, да свика една ад-хок координација и на таа координација да видиме како Собранието може да помогне во целата оваа ситуација и што е тоа што треба да го да го направиме. Инаку се друго нема поента веќе да да дискутираме и да правиме се додека луѓе умираат од пожарите а нема никој да реагира во овој дел. И навистина мислам дека треба барем ние да покажеме малку поголема одговорност, барем час пауза и Африм Гаши да дојде во Собранито“, рече Спасовски.
При тоа, тој остро реагираше на отсуството на владини министри а од денешната собраниска седница наменета за пратенички прашања од опозицијата. Спасовски посочи дека тоа е грубо непочитување на Деловникот, но и на функцијата на Парламентот како претставнички дом на граѓаните.
„Не треба апсолутно ваков однос да се толерира повеќе, затоа што не е ова прв пат да имаме присутни еден или двајца или тројца министри од 24 министри во владата коишто ги имаме денеска. Што е поважната работа од тоа што денеска треба да работи Собранието, тоа е прво и второ за коешто сакам исто така реагирам, очигледно е дека сето ова што го правиме денеска одговараме поставуваме прашања нема кој да даде одговори“,рече Спасовски.