Македонија
Се зголемува капитацискиот бод за сите матични лекари од општа пракса, гинекологија и стоматологија

Претседателот на Владата, Зоран Заев, на денешната прес-конференција, на која се обратија и министерот за здравство, Венко Филипче, и директорите на Фондот за здравствено осигурување, Ден Дончев и Орхан Рамадани, информира дека вредноста на капитацискиот бод за сите избрани, односно матични лекари во примарното здравство, се зголемува 8 денари.
За ова зголемување се обезбедени речиси половина милијарда денари, односно 465 милиони денари од буџетот.
„Парите на граѓаните сега се враќаат кај нив како поддршка за работата на матичните лекари за помотивирани здравствени услуги. Го зголемуваме и надоместокот за приватните специјалисти стоматолози по протетика и орална хирургија. Наместо сегашните 90.000 денари, ќе добиваат 103.000 денари месечно, односно 15 проценти зголемување. Висината на надоместокот на приватните специјалисти ортодонти од 97.000 денари се качува на 111.000 денари месечно, односно приближно 15 проценти зголемување. Има зголемување на надоместокот за сите други приватни специјалисти од другите дејности кои имаат договор со Фондот, и тоа зголемување изнесува околу 15 проценти исто така за што се обезбедени вкупно 62,5 милиона денари“, истакна премиерот Заев додавајќи дека ова е уште едно остварено ветување од програмата на Владата.
Тоа, како што оцени премиерот Заев, е една од мерките заедно со повисоките плати во секундарното и терцијарното јавно здравство и со поголемата вредност на дежурствата, со кои се спречува одливот на медицинскиот кадар од јавното здравство, а граѓаните добиваат подобри и поширок спектар на здравствени услуги.
Зборувајќи за најновата мерка во рамките на реформите во примарната здравствена заштита, министерот Филипче рече дека таа не значи само зголемување на сумата на средства што овие лекари ја земаат, туку и обезбедување поголем број услуги и превентивни мерки што најмногу ќе ги почувствуваат граѓаните, односно пациентите во нашата земја.
„Овие мерки ќе ги олеснат третирањето и водењето на хроничните болести, кои досега не им беа на располагање во рамките на примарната здравствена заштита“, изјави министерот Филипче, кој им упати благодарност за помошта при реализацијата на најновите реформи на делегацијата на Европската Унија кај нас и на евроамбасадорот Самуел Жбогар за помошта при сеопфатната анализа на здравствениот систем на секундарно и терцијално ниво, на Светската банка за анализата на здравствениот систем во примарното ниво и на Светската здравствена организација, која помогнала во евалуацијата и анализата на искуствата од други земји.
Директорите на ФЗО, Ден Дончев и Орхан Рамадани, се осврнаа на тоа дека покрај подобрување на материјалните и техничките капацитети на матичните лекари во примарното здравство, со најновите мерки се остварува и поголема ефикасност.
„Осигурениците, односно пациентите, ќе добијат квалитетна здравствена услуга уште во ординација. Така ќе се намали потребата за понатамошно упатување. Со тоа ќе се растоварат лекарите и здравствениот систем на секундарно и терцијарно ниво, а се поттикнува превентивата во примарната здравствена заштита“, истакна директорот Ден Дончев.
Директорот Рамадани оцени дека со овие мерки се олеснува и административната работа во примарната здравствена установа, при што ќе биде воведено кодирање, односно шифрарник на услуги на матичните лекари.
„Во Фондот планираме подобрување на методологијата за плаќање на матичните лекари во примарната здравствена заштита преку вреднување на квантитетот и квалитетот на дадените здравствени услуги во согласност со медицина базирана на докази“, рече директорот Рамадани.
Претставниците на Фондот за здравство информираа дека е донесена одлука од 1 ноември годинава да се зголеми и надоместокот за аптеките со кои Фондот има склучено договор за издавање лекови на рецепт од 16 на 18 проценти, а надоместокот за скапите лекови ќе изнесува 180 денари за рецепт.
Оваа мерка, комбинирано со неодамнешното укинување на квотите на аптеките, ќе придонесе кон уште поефикасно, квалитетно и непрекинато издавање лекови на рецепт кои се на товар на Фондот за здравствено осигурување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Наместо политика за развој на културата, Љутков води партиска пропаганда, велат од СДСМ

Според СДСМ, денешната прес-конференција на министерот за култура Зоран Љутков е уште еден обид да се замаскира годишното фијаско на ВМРО-ДПМНЕ во културата. Наместо отчет, јавноста доби низа лаги, манипулации и самопофалби без основа.
„Нема „успешна година“ кога институциите немаат средства, проектите стојат, а вработените во Министерството за култура се сегрегирани по партиска припадност и без законски исплатената плата согласно со колективните договори.
Министерот премолчи и дека не се почитува Колективниот договор и се манипулира со културните работници, кои се под постојана закана и притисок.
Љутков не кажа ништо за запирањето на сите активности во заштитата на културното наследство, за нефункционалните конкурси, за партиските поставувања и за скандалите во кабинетот – кои не се „успех“, туку пораз на институцијата“, велат од СДСМ.
Додаваат дека на денешниот прес министерот за култура Љутков ја излажал јавноста дека за првпат по 8 години е распишан конкурс за креативни индустрии.
„СДСМ го потсетува Љутков дека во 2024 година беше распишан и спроведен Конкурс за креативни индустрии, кој ги содржеше во винстинска смисла на зборот креативните индустрии, а не како годинешниот конкурс на Љутков скроен по мерка за лукративни и корумптивни проекти што би требало на ВМРО-ДПМНЕ да му донесат повеќе гласови на претстојните локални избори.
Наместо културна дипломатија – само патувања без ефект и без отчет. Еве сега прашуваме што конкретно донесе за културата неговото последно патување во Америка и во крајна линија за туризмот? Наместо инвестиции – кратења од буџетот. Наместо визија – политичка пропаганда“.
Остро реагираат како што велат на обидите да се прикаже неработата како резултат.
Македонија
Онлајн закажување термин за сликање за лични документи и за македонската дијаспора, соопшти МВР

Министерството за внатрешни работи овозможи онлајн закажување термин за сликање за лични документи во државата и за македонската дијаспора, односно сите оние кои не поседуваат македонски телефонски број преку можност да извршат резервација преку електронската пошта, https://termin.mvr.gov.mk/Call_Request.
Од моментот на воведување на електронското закажување преку Веб страницата на МВР во текот на 2024 имало во просек по 7000 закажани термини месечно, а во текот на 2025 има над 4000 термини месечно или во просек речиси по 200 закажани термини на ден преку овој сервис.
МВР информира дека закажувањето термин преку редовните телефонски линии функционира беспрекорно и термин за редовна постапка се добива за еден ден.
Македонија
Ковачки од Берово: Во првата година од мандатот економијата заздравува

Наследивме една тешка социоекономска состојба во државата којашто беше резултат на катастрофалното владеење на СДС и на ДУИ. За среќа, резултатите на Владата на ВМРО-ДПМНЕ покажуваат дека уште во првата година од мандатот, економијата заздравува а ветувањата се оставруваат, истакна Драган Ковачки, пратеник на ВМРО-ДПМНЕ.
„Во првата година од мандатот го реализиравме предизборното ветување за 5.000 денари зголемување на пензиите на сите пензионери. Понатму, ветивме дека ќе го завршиме проектот со клиничката болница во Штип, нешто што е многу значајно за овој крај, за овие граѓани во селото Ратево, во селото Миташинци, воопшто за општината Берово каде што сме денеска во посета.
Заедно сме денеска со нашиот кандидат и иден градоначалник на општина Берово тоа е господинот Петар Ружински. Заедно да ги слушнеме проблемите на граѓаните, работите со коишто тие се соочуваат и имаат да ни ги предложат за да ги ставиме во нашата програма“, додаде тој.
Најави дека во наредниот период Владата предводена од ВМРО-ДПМНЕ и премиерот Христијан Мицкоски ќе бидат насочени на инфраструктурно градење на овој дел од државата којшто, според Ковачки беше заборавен од претходната власт.
„Верувам дека ВМРО-ДПМНЕ во наредниот период ќе има градоначалник од ВМРО-ДПМНЕ и тоа ќе биде господинот Петар Ружински за доброто на сите граѓани во Берово“.