Центарот за граѓански комуникации, Здружението на даночните советници и „Активо“ ги објавија истражувањата за последиците од зголемените буџетски трошоци од кризата во 2022 година врз области што влијаат врз животот на граѓаните, и на национално и на општинско ниво.

Според нивните извештаи, клучните наоди од истражувањата вклучуваат:

„За покривање на дополнителните расходи што ги наметна енергетската криза во 2022 година Владата и општините вкупно жртвуваа проекти што се од важност за граѓаните во вредност од најмалку 220 милиони евра.

Владата жртвуваше проекти од најмалку 170 милиони евра, како што се: реновирање здравствени установи, купување медицинска опрема, изградба на детски градинки и домови за стари лица, изградба на патишта, реконструкција на студентски домови, како и проекти за унапредување на животната средина. Дополнителни 50 милиони евра капитални проекти требало да се реализираат од локалните власти.

За да се прикрие ударот на енергетската криза врз капиталните инвестиции во 2022 година, дури 28 % од капиталните расходи, односно 130 милион евра, биле потрошени за исплати што не може да се сведат под категоријата „капитални“, како што се исплатите кон АД „Електрани“ за надминување на енергетската криза, како и плаќања гаранции според рати за кредити на државните претпријатија“, наведуваат од Центарот за граѓански комуникации.

Вкупните пријавени финансиски обврски на буџетските субјекти само во 2022 година се зголемиле за нови 186 милиони евра, односно 30 %, со што достигнале вкупен износ од 800 милиони евра.

Наспроти кратењето проекти од важност за граѓаните, локалните власти, според извештаите, се однесувале како да не е криза кога станува збор за трошоците за патни расходи, плати, договорни услуги и привремени вработувања, кои дури пораснале во 2022 година.