Македонија
Се очекува пикот на коронавирусот, Куманово засега е најкритично
Бројот на заболени од коронавирусот очекувано расте, иако големо изненадување е Куманово, град кој во изминативе 24 часа ја надмина и бројката на заразени во Скопје.
Надлежните директори на здравствените установи на денешниот видео-брифинг со новинарите информираа дека се уште се испитува на што се должи ова, дали тоа може да се препише на културолошките карактеристики на граѓаните или можеби станува збор големи семејства кои живеат заедно па оттаму се и почестите контакти.
Министерот за здравство Венко Филипче информира дека ова е моментот кога треба да се направи пресек, со оглед на тоа што во периодот што следува ќе дојде и пикот на заболени, па оттаму се преземаат и дополнителни чекори за превенција и заштита.
Министерот за информатичко општество Дамјан Манчевски информираше дека е изработена апликација која секој ќе може да ја инсталира на својот мобилен телефон, а преку која ќе може да се следат контактите што евентуално ги имало заболеното лице од Ковид – 19. Манчевски рече дека станува збор за неинвазивна апликација која нема да ја наруши приватноста, нема да ги открива телефонските броеви на граѓаните, туку ќе работи на база на апликациски броеви.
Имено, откако граѓанинот ќе ја симне апликацијата ќе му биде доделен број кој нема врска со бројот на неговиот мобилен телефон или со матичниот број. Преку тој број ќе се следат контактите што ги имал со други лица кои имаат симнато апликација на своите мобилни телефони на кои им се приближил на помалку од два метра. За да функционира апликацијата цело време ќе треба да биде вклучен „bluetooth”.
По 14 дена податоците автоматски ќе се бришат од уредот и воопшто нема да бидат преземени во друг уред, а единствено ќе се преземаат во серверот на инфектолозите доколку имателот на апликацијата се заболи од Ковид-19 за полесно да се следат контактите што ги имал со другите лица.
Министерот за здравство Венко Филипче информираше дека во текот на идниот период се очекува и МАНУ да се приклучи во капацитетот на тестирањето. Освен тоа, реорганизирана е и Градската болница „8 Септември“, извршена е реорганизација на просторот и персоналот, а на располагање има 50-60 кревети со соодветна интензивна нега и операциони сали.
Тој рече дека неделава ќе се врши набавка на респиратори, а главниот критериум ќе биде брзината на испорака, иако тоа во моментов е мошне тешко остварливо со оглед на тоа што потреба од респиратори има насекаде во светов.
На сметката на Министерството за здравство, како што кажа, има донации од 500.000 евра од домашни компани, а има и донации на медицински апарати и големи количини на заштитна опрема од околу еден милион парчиња, како и донирани возила кои им се доделуваат на центрите за јавно здравје.
Надлежните не ја исклучуваат можноста доколку ситуацијата станува полоша од очекуваното, да се предложат и други мерки што ќе значат зголемување на рестриктивноста.
Според последните информации, што ги даде директорката на Инфективната клиника Милена Стевановиќ, на клиниката се хоспитализирани 74 лица и веќе се приближуваат до пополнување на капацитетите.
Во последниве 24 часа се примени нови шест пациенти од кои едно лице починало неколку часа по приемот. Вчера е примено двегодишно дете, кое е стабилно.
Статистиките покажуваат и дека 9.1 проценти од заразените од Ковид-19 се здравствени работници, што според надлежните е очекувано, бидејќи тие се во најголем ризик и се во најбизок контакт со заболените.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лабудовиќ: Четири дена пред гласање, Герасимовски се слика со ракавици на рацете како чисти контејнери
Кандидатот за градоначалник на Центар, Мирослав Лабудовиќ, упати повик до жителите на неговата општина да му ја дадат довeрбата на 2 ноември да ја води општината во следните четири години.
„Време е за промена во Центар. Резултатите од гласањето во првиот круг недвосмислено покажаа опозициско расположение во општината. Близу 2/3 од тие што излегоа на изборните места, гласаа против актуелниот градоначалник Горан Герасимовски. Затоа што сакаат промена на нештата, сакаат нешто ново, поинакво – а тоа значи нова визија, нова енергија, непресушна река на идеи и проекти за подобрување на секојдневниот живот на граѓаните. Но, и нивно активно учество во носењето на сите одлуки што во надлежност на општината, а значат суштинска промена – промена кон подобро за нив“, порача Лабудовиќ.
Актуелниот градоначалник, според него, ако имаше што да понуди, ќе го правеше тоа во континуитет за сите претходни четири години.
„А, не на еден месец пред изборите да поправа реквизити од детски игралишта, на четири дена пред гласање да се слика со ракавици на рацете како чисти контејнери и други слично популистички активности – допадливи за око, но со кои не се решава ништо“, рече тој.
Спротивно на тоа, Лабудовиќ нагласува дека припаѓа на нова генерација политичари кои кога ќе дадат збор – истиот и го исполнуваат. Верува дека искуството од работење во реномирани меѓународни компании ќе биде пресудно во имплементација на вистински системски и одржливи решенија со кои ќе се надминуваат сите проблеми во Центар, не кампањски, туку долгорочно.
Тој упати повик до поддржувачите на кандидатките кои испаднаа во првиот круг, Билјана Ивановска и Марија Среброва, но и до сите граѓани кои се уште се мислат дали да гласаат во вториот круг.
„Ги повикувам граѓаните да излезат што помасовно и да гласаат. Да го заокружат бројот 2. Само така ќе ја донесеме вистинската промена во Центар. Промена која ќе значи Центар да биде целосна спротивност од сегашната слика. Почиста, еколошки ефикасна, побезбедна, урбано и плански средена општина. Општина со светли улици, слободни тротоари, со нови катни гаражи и повеќе паркинг места. Општина која ќе биде шампион во транспарентност, нон-стоп достапна и отворена за граѓаните. Општина во која ќе „царуваат“ културата и спортот, во која од училиштата ќе направиме образовни оази, а на младите ќе им понудиме перспективност“, повика Лабудовиќ.
Македонија
Независниот кандидат во Могила се откажа од изборната трка, ВМРО-ДПМНЕ доби уште еден градоначалник
Независниот кандидат за градоначалник на Општина Могила, Сашо Пивковски, објави дека се повлекува од изборната трка.
„Драги сограѓани, по внимателно размислување и бројни разговори со многумина од вас, одлучив да ја повлечам својата кандидатура од изборната трка. Ова не беше лесна одлука, но верувам дека е исправна и чесна во овој момент – во интерес на нашата општина и на сите граѓани што живеат во неа. Во изминатиот период слушнав различни мислења, совети и размислувања. Сфатив дека политиката не смее да создава поделби меѓу луѓето, особено не меѓу пријатели и семејства. Нашата сила е во заедништвото, не во поделбите. ВМРО-ДПМНЕ е мојата партија, мојот политички дом. Како нејзин член секогаш сум се водел од идејата за чест, работа и почит кон луѓето. Така било и ќе остане. Ќе продолжам да го поддржувам сето она што е во интерес на граѓаните и на вредностите за кои се залага оваа организација“, објави Пивковски.
Понекогаш, додава тој, вистинското лидерство не се покажува само кога чекориш напред, туку и кога знаеш кога треба достоинствено да застанеш на страна, за да не му наштетиш на она што го сакаш и почитуваш.
„Свесен сум дека оваа вест ќе изненади многумина, но ја носам со мирна совест и со чувство на одговорност. Убеден сум дека ова е најдоброто нешто што можев да го направам во овој момент. Ќе продолжам и понатаму да бидам тука – достапен, искрен и подготвен да помогнам секогаш кога ќе има потреба. Вашата поддршка, доверба и добри зборови ќе останат нешто што длабоко го ценам“, објави Пивковски.
Македонија
Герасимовски: Собрани три големи контејнери за кабаст отпад и 25 помали контејнери во Центар
Градоначалникот на Општина Центар, Горан Герасимовски, информира дека хигиеничарите на општината со целата механизација при денешното чистење собрале три големи контејнери за кабаст отпад и 25 помали контејнери.
„Интензивно чистиме во сите населби во Центар. Од рано изутрина, почнавме со чистење позади Капиштец, Водно, продолжуваме на повеќе локации во Дебар Маало, Кочо Рацин, Пролет позади Даре Џамбаз. Дел по дел, маало по маало, го расчистуваме целиот смет. Работиме во две смени, со активираност на целата механизација со која располагаме. Изминатава година постојано апелиравме за хигиената, но ги засукавме ракавите и чистиме и онаму кадешто општината нема надлежност, затоа што граѓаните заслужуваат чисти улици и празни контејнери без смет”, вели Герасимовски.
Тој информира дека ЈП „ПОЦ“ организира посебни пунктови и распоред за собирање на угостителски отпад.
„Реализираме нов начин на дистрибуција и депонирање на сметот. Викендов спроведуваме дератизација во училиштата и градинките. Во тек е вонредна дератизација, кадешто во сите 1980 шахти се фрла сертифициран препарат, но потребно е да се изврши и дератизација во сите згради. За тоа, организираме средба со сите управители на згради и куќни совети. Ја подигнуваме хигиената на повисоко ниво. Им благодарам на сите хигиеничари кои со натчовечки напори целиот овој период го чистат и хаосот на градската власт која го преплави Скопје во смет”, истакнува Герасимовски.
Тој ги повика компаниите да помогнат со механизација, камиони и логистика.

