Во текот на акциите за време на викендот, што ги спореведе градскиот инспекторат во Скопје, во контејнер за комунален отпад поставен во близина на спортскиот центар „Борис Трајковски“ бил пронајден несоодветно фрлен медицински отпад, односно шприцови.

Инспекциските служби во наредниот период ќе работат на пронаоѓање на лабараторијата која несоодветно го одложила медицинскиот отпад по што таа ќе биде санкционирана.

Во текот на вчерашниот ден биле контактирани специјалните служби на ЈП „Дрисла“, кои со специјална опрема го презеле медицинскиот отпад и го транспортирале до депонијата, каде што ќе биде соодветно третиран, соопштија градските власти.

Град Скопје апелира до сите компании што работат со медицински отпад да се придржуваат до законските прописи и постапки за одлагање и третирање овој отпад.

За потсетување, граѓаните на Скопје, што имаат потреба да се ослободат од својот стар мебел и неупотребливите електронски и електрични уреди, може да ја нарачаат услугата за подигнување и транспорт на отпадот со специјалните возила на ЈП „Комунална хигиена“ на бесплатниот телефонски број 0800 222 33.

Со воведените измени на услугата граѓаните ќе имаат можност да ја изберат опцијата нивниот кабаст отпад да биде преземен директно од внатрешноста на домот, без разлика дали станува збор за индивидуални или за колективни домаќинства.

Услугата за собирање кабаст отпад од домовите на граѓаните се наплатува во согласност со ценовникот на ЈП „Комунална хигиена“.