Македонија
Синдикатот на „Еуроникел“ ќе го тужи директорот: 6 месеци нѐ лаже дека фабриката ќе работи и ќе растат платите

Синдикатот на кавадаречката фабрика „Еуроникел индустри“, поранешна „Фени“, ќе поднесе кривични пријави против швајцарскиот фонд ГСОЛ, сопственик на фабриката, и против директорот Димитриос Пасхос за измама. Претседателот на Синдикалната организација на „Еуроникел“, Миле Ѓорѓиев, вели дека претставници на ГСОЛ и директорот ги измамиле работниците дека фабриката ќе работи.
„Подготвуваме кривични пријави за актуелниот сопственик ГСОЛ и за директорот Димитриос Пасхос за измама бидејќи 6 месеци нѐ лажат дека фабриката ќе работи, ќе расте производството, а ќе расте и нашиот личен доход. Ние сме во целост измамени затоа што фабриката денес не работи, ние не произведуваме и секој момент може да останеме на улица, а знаејќи дека сопственикот ја напушти фабриката и нема намера да исплати плата за октомври, тоа е уште едно кривично дело, кое исто така ќе биде дел од кривичната пријава што ја подготвуваме“, вели претседателот Ѓорѓиев.
Тој денес им испрати уште едно писмо на премиерот Димитар Ковачевски, на градоначалникот на Кавадарци, Митко Јанчев и на генералниот директор на Комерцијална банка, Хари Костов, каде што е сметката на фабриката, во кое бара помош за исплата на платите на вработените и поддршка во напорите да се обезбеди струја за да не мораат целосно да ја изгасат печката. Изминатава недела претседателот Ѓорѓиев имаше средби со сите оние од кои бара помош, но освен ветувања, во фабриката и денес нема поместување на состојбата.
Ѓорѓиев вели дека „Енерџи деливери солушнс“, од каде што се снабдувале со струја, им го откажале договорот и вечерва на полноќ фабриката ќе остане без снабдувач на струја. Тој смета дека исплатата на достасаното ДДВ за август, кое државата треба да ѝ го исплати на фабриката, може да помогне и за исплата на платите и за покривање дел од трошокот за струја за одржување на печката на неопходниот минимум.
Премиерот Димитар Ковачевски вчера вети дека ќе им помогне на вработените во „Еуроникел“ да ги задржат работните места онолку колку што Владата може да помогне оти се работи за приватна компанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.