Македонија
Синдикатот на Клиничкиот центар е против иницијативата за формирање синдикат на УКИМ

Синдикатот на Клиничкиот центар категорично се спротивставува на иницијативата за формирање синдикат на УКИМ затоа што потекнува од министерот за образование, а се спроведува преку другите работодавци, што претставува директно мешање на власта во синдикалното организирање, велат од Синдикатот.
Од таму го повикуваат членството да не пристапува кон овој синдикат, кој, како што се наведува во соопштението, се формира директно по налог од работодавецот.
„На оние што веќе потпишале им укажуваме дека постапката за основање и дејствување на овој синдикат е спротивна на законот. На оние што во име на единицата доставуваат пристапници за овој синдикат, кој се формира директно по налог од работодавецот, им укажуваме дека прават или направиле постапки спротивни на законот“, се наведува во соопштението.
„Во електронскиот допис со работен наслов ‘Основање синдикат на УКИМ’, генералниот секретар на УКИМ во прилог доставува документација поврзана со иницијативата, односно барањата на Министерството за образование и наука на РСМ во согласност со темата на дописот, при што одредува рокови и замолува за придржување до нив. Во воведот на документот во прилог на дописот со наслов ‘Основање синдикат на вработените во УКИМ’ се укажува дека на состанокот од страна на министерот за образование и наука со ректорите и генералните секретари на јавните универзитети во РСМ на присутните им било кажано дека поради планираното зголемување на платите на вработените на јавните универзитети во висина од 10 отсто, почнувајќи со платата за јануари 2020 година, потребно е да се склучи колективен договор и да се формира синдикат на вработените на УКИМ. Во понатамошниот дел на документот се укажува на единицата (факултет или научен институт) да ‘пушти пристапници за членство до сите вработени на единиците (наставен и ненаставен кадар)’, а ‘копии од пристапниците да се достават до генералниот секретар’“, појаснуваат од Синдикатот.
Во соопштението се наведува дека иницијативата, содржината и препораките изразени во дописот и документот се директно спротиставени на конвенцијата бр. 87 на Меѓународната организација на трудот за слобода на здружување и заштита на правото на организирање, 1948, која Република Македонија ја има ратификувано на 17.11.1991 година, на членот 37 од Уставот, а особено на
членот 195 од Законот за работните односи, во кој јасно се укажува дека работодавците и нивните здруженија не смеат да имаат надзор над основањето и дејствувањето на синдикатите.
„За неверување е препораката на генералниот секретар на УКИМ и од него утврдената членарина од 50 денари месечно да се уплаќа на приватна сметка на идниот претседател, со тоа што тој ќе потпише изјава дека ќе ги префрли на сметката на синдикатот кога таа ќе биде отворена. Истовремено, крајно понижувачка се намената и целта за формирање на овој синдикат, сведени само на покачување на платите на вработените од 10 отсто“, велат од Синдикатот.
Од таму велат дека постапувајќи по дописот на генералниот секретар на УКИМ и документот во прилог, во претходните денови била вршена агитација во одредени универзитетски клиники и институти, Стоматолошкиот клинички центар „Свети Пантелејмон“ – Скопје, а особено на Медицинскиот факултет, УКИМ Скопје, за зачленување членови на Синдикатот на Клиничкиот центар од наставно-научниот кадар во овој синдикат во формирање.
„Речиси сите вработени од наставно-научниот кадар и докторите специјалисти на Медицинскиот факултет, УКИМ Скопје, се членови на Синдикатот на Клиничкиот центар, а во сите универзитетски клиники и институти нашиот синдикат е репрезентативен на ниво на работодавец. Не сакаме да веруваме дека покачувањето од 20 отсто, а не 25 отсто во јавното здравство за наставно-научниот кадар, може да биде дел од некоја поголема игра. Синдикатот на Клиничкиот центар има искуство со синдикат формиран и организиран од работодавец или т.н. синдикат по нарачка, а во нашиот случај како контрасиндикат. Нејасно е како во изминатиот период владејачките партии не го разбраа за нив негативниот ефект од ваквите синдикати по нарачка“, велат од Синдикатот на Клиничкиот центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Уапсена сопругата на докторот кој беше застрелан во Куманово, била вмешана во обидот за неговото убиство

Полицијата ја уапси сопругата на докторот кој беше застрелан вчера во Куманово. Тој со повреди беше пренесен во болница, но се наоѓа во стабилна состојба. Според информациите на МВР, сопругата е осомничена дека е вмешана во обидот за неговото убиство.
„Вчера полициски службеници од СВР Куманово ја лишија од слобода А.А. (43) од Тетово, поради основи на сомнение дека е поврзана со обидот за убиство на нејзиниот сопруг З.Ш. (43) од село Слупчане, липковско“, велат од МВР.
Исто така, во врска со настанот на службен разговор во СВР Куманово се повикани шест лица, а во домот на Б.С. (50) од Куманово по судска наредба, е извршен претрес.
По целосно документирање на случајот, против сопругата ќе следува соодветна пријава, додека против Љ.Ф. (36) од Гостивар, кој се сомничи за обид за убиство и се уште е во бегство, по консултација со Основното јавно обвинителство, исто така ќе биде поднесена кривична пријава.
Од Министерството за здравство вчера соопштија дека во вооружениот напад во Куманово е повреден докторот Зекирија Шаини. Од таму известија дека повредите не се животно-загрозувачки и дека докторот е во стабилна состојба и се опоравува.
Од ДУИ, пак, информираа дека станува збор за нивен кандидат и носител на листата во Општина Липково.
Македонија
Евакуации во објектите околу плоштадот „ВМРО“ поради куфер оставен на плочникот, полицијата утврди дека е празен

Обезбедувањето на Јавното претпријатие за државни патишта пријавило во полиција дека две лица денес оставиле куфер на плочникот пред нивниот објект сместен на плоштадот „ВМРО“ веднаш до седиштето на владејачката партија ВМРО-ДПМНЕ. Полицијата веднаш излегла на терен, почнала евакуација на вработените од објектите околу плоштадот, а проверките покажале дека куферот е празен.
„Денеска (08.10.2025) во 12.55 часот лице од обезбедувањето на ЈП ‘Државни патишта’ пријавило дека на видеонадзор пред канцелариите на ЈП ‘Државни патишта’ на плоштадот ‘ВМРО’ во Скопје биле забележани две лица како го разгледуваат местото, а едно од лицата оставило куфер. Веднаш по добиената пријава, преземени се соодветни мерки и активности, извршени се потребните проверки и утврдено е дека куферот е празен“, соопшти МВР.
Македонија
Културен дом „Есма Реџепова“ на местото на старото матично во Шутка вети Орце Ѓорѓиевски: Вака ќе и оддадеме посебна почит

Кандидатот за градоначалник на Скопје од ВМРО-ДПНЕ Орце Ѓорѓиевски денес на жителите на Шуто Оризари им вети низа инвестиции што ќе создадат подобра локална инфраструктура, повеќе јавен простор и нови можности за спорт, култура, и социјална поврзаност пред се. Нов фудбалски стадион и нов културен дом кој ќе го носи името Есма Реџепова се главните проекти за Шутка.
„Во Шуто Оризари планираме изградба на нов културен дом ’Есма Реџепова’ на местото на старото матично. Ќе вложиме во културата како темел на заедништвото и локалниот идентитет овде. Домот ќе биде простор за театар, концерти, изложби, кино проекции и младински активности, но и симбол на достоинство, традиција и културна енергија на Шуто Оризари. Со тоа ќе оддадеме и посебна почит кон големата Есма Реџепова амбасадорка на ромската култура која со својот глас го претставуваше не само Шуто Оризари туку, Скопје и цела Македонија во целиот свет“, рече Ѓорѓиевски.
Со изградбата на нов фудбалски стадион во Шутка, Ѓорѓиевски очекува да се создаде современ спортски комплекс со терен за голем фудбал, трибини, соблекувални, осветлување и пристапна инфраструктура. Заедно со изградбата на новиот фудбалски стадион, Ѓорѓиевски предвидува и обнова на спортскиот центар Шуто Оризари, со целосна реконструкција на терените, засадување нови дрвја, зелени површини и нова урбана опрема.

И на жителите на Шутка Ѓорѓиевски им вети расчистување на депониите во првите 72 часа од преземањето на власта
На жителите на Шутка Ѓорѓиевски денес им го претстави проектот „Скопје, град кој се грижи за сите“ кој предвидува пакет социјални мерки со кои ќе се обезбеди системски одржлива и праведна поддршка за граѓаните во социјален ризик.
„Планираме градот да обезбедува поддршка за социјално загрозените семејства и поединци преку финансиска помош, хуманитарни пакети, психо-социјална поддршка и програми за образование и преквалификација“, рече Ѓорѓиевски.
Вложувањата во Шутка, Ѓорѓиевски ги претстави како дел неговата визија за Скопје како град кој расте рамномерно и создава можности за сите бидејќи, како што рече, Скопје е силно само кога сите негови општини се силни.
И на жителите на Шутка им вети расчистување на депониите во првите 72 часа од преземањето на власта заедно со Општината, граѓаните и општествено одговорни компании. Шуто Оризари е обиколено со големи диви депонии, а мини депонии има и на речиси сите места каде што се поставени контејнери и канти за отпад.