Македонија
Сиљановска Давкова во Дихово: Руралните жени се хероини на кои треба да им се восхитуваме и да ги поддржуваме

Претседателката Гордана Сиљановска Давкова по повод Меѓународниот ден на руралната жена се обрати на трибината на тема „Родовата еднаквост на руралните жени: Подобрување на економскиот статус“, што во организација на Националната федерација на фармери се одржа денеска во битолското село Дихово.
Во своето обраќање, претседателката заблагодарувајќи се на жените од руралните средини, посочи дека нивната улога не е само да придонесуваат во земјоделието, како една од најзначајните стопански гранки, туку далеку поширока. „Јас се гордеам со луѓето што живеат во руралните средини. Македонија била рурална држава. Храната била и ќе остане стратешка цел, покрај енергијата“, рече претседателката.
Истакнувајќи дека тие вложуваат енормен труд, без или со минимален надомест, претседателката ги потенцираше бројните проблеми и предизвици со кои се соочуваат жените: системската дискриминација, недостиг на инвестиции и донации во земјоделството, неплатена домашна работа и скратен дневен, неделен и годишен одмор, отсуство на здравствено осигурување за време на бременост, недостиг на социјална грижа заради непокриеност со детски установи, нецелосна и несоодветна здравствена заштита, недостиг на домови за стари лица, непоседување на имот, слабата инфраструктура, отсуство на редовен превоз, неинформираност, како и е несоодветната и неправична заработка.
Таа истакна дека не смееме да дозволиме руралните жени да бидат вештачки хендикепирани и фрустрирани и дека се потребни измени на Законот за работни односи и Законот за здравствено осигурување. Во таа насока таа порача и дека економските и социјалните политики мора да ги земат во предвид потребите на најранливите категории.
Потенцирајќи дека најпогодени се жените од сиромашните земји, таа порача дека суштинска е поддршката и охрабрувањето на женското претприемништво, менторството и лидерство, додавајќи дека успешните жени, како во политиката и економијата, така и во руралните средини треба да бидат инспирација.
„Не смееме да ги занемаруваме трудот, вештините, секојдневниот ангажман на оние што придонесуваат не само за благосостојбата на семејството, туку и на заедницата и на општеството. Со право велат дека животот на жените лидерки од руралните средини е 24 часовен ангажман, битка со земјата, љубов со земјата, со производството на храна и секојдневна битка и соживот со природата. За мене, жените од руралните средини се апсолутните лидерки, хероини на кои треба да им се восхитуваме, но не е доволно само да се восхитувате, туку треба да ги поддржуваме и да ги помагаме, индивидуално, институционално и на секаков начин. Поддршката на руралните жени е поддршка на македонското село, поддршка на запирање на процесот на иселувањето, поддршка на земјоделството, поддршка на македонската економија, но и поддршка на македонската иднина“, рече во обраќањето претседателката Сиљановска Давкова.
Таа посочи дека покрај актуелните безбедносни и економски кризи, климатските промени може да имаат огромно влијание врз руралните средини, односно врз производството на храна, што уште повеќе ќе ја загрози кревката економска и егзистенцијална положба на руралната жена. Од тие причини, додаде претседателката, покрај глобалниот одговор мораме да дејствуваме локално. „Ако ни се заканува суша треба да размислуваме за штедење на водните ресурси, да инвестираме во брани и акумулации, да имплементираме современи системи за наводнување, да користиме исплатливи технологии. Во од треба да се прилагодуваме на состојбите, за да не се соочуваме со катастрофи“, рече претседателката во обраќањето.
Таа изрази задоволство од изборот на нашата земја за членка во Советот за човекови права, додавајќи дека женските права се човекови права, правата на руралните жени се човекови права, и дека можеме да ги решаваме не само локално, национално, регионално и европски, туку и на ниво на Обединетите Нации.
Целта на трибината е да се истакне важноста на улогата на жените од руралните средини за земјоделскиот и руралниот развој на нашата земја и можностите за нивно економско зајакнување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„СДС и Филипче да одговорат дали Заев на поранешен премиер на Бугарија му понудил продажба на македонска телевизија и прислушкувани материјали“, прашува ВМРО-ДПМНЕ

„СДС лидерот го менува, но навиките не. Прислушкуваните материјали и купопродажбата на имоти, како и на државните интереси, продолжуваат да му бидат навика и на Венко Филипче, како на неговиот претходник и ментор, Зоран Заев. Затоа го прашуваме Филипче да каже дали Зоран Заев му понудил стик со прислушкувани материјали на поранешен бугарски премиер, како и една шема за купување на две големи фирми, од кои едната била телевизија“, прашува ВМРО-ДПМНЕ
„Венко Филипче да не молчи, туку да одговори што содржел стикот со прислушкувани материјали, кое неговиот, ментор Зоран Заев го дал на поранешен премиер на Бугарија, која сега ги злоупотребува механизмите на членка во ЕУ за да ја блокира државата.
Освен за стикот, СДС и Филипче, исто така, треба да кажат дали и зошто Зоран Заев понудил шема за купување на две големи фирми во Македонија од страна на фирми од Бугарија блиски до тој поранешен премиер и дали една од тие фирми е една голема телевизија, преку која требало да се врши бугарска пропаганда во државата?
Оттука произлегува уште едно прашање, на кое СДС и Филипче должат одговор, дали ова е подарокот кој Заев го дал во замена за логистичка и финансиска поддршка од Бугарија би им ја давала на партија и сега и во иднина и дали зад кампањата на СДС стои тој поранешен бугарски премиер со кој Заев е во контакт?
Од се ова можеме да видиме дека Венко Филипче не е ништи друго, освен алатка за реализација на планот на Заев и неговата таканаречена резолуција е само продолжеток на тој план за потчинување на државата во однос на Бугарија.
Овој нивен план е откриен, Филипче и неговиот ментор и гуру се фатени на дело.
Нивните планови нема да успеат, затоа што на претстојните избори народот жестоко ќе ги казни и со заокружување на број 9 ќе го направат вистинскиот избор, за твојот човек, за твоето место, за твојата иднина“, соопшти ВМРО-ДПМНЕ.
Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)