Македонија
Сиљановска-Давкова ги прими акредитивните писма на новоименуваниот португалски амбасадор, Жозе Руи Вележ Каросо: Португалија целосно го поддржува влезот на нашата земја во ЕУ
Претседателката Гордана Сиљановска Давкова денеска ги прими акредитивните писма на Жозе Руи Вележ Каросо, новоименуваниот амбасадор на Португалската Република, со седиште во Белград.
На церемонијата на предавање на акредитивните писма, претседателката истакна дека годинава се одбележуваат 30 години од воспоставувањето на дипломатските односи меѓу двете земји и посочи дека постојат бројни можности за натамошно искрено продлабочување на соработката, како на билатерален, така и на меѓународен план, со посебен интерес за интензивирање на економските врски.
Нагласувајќи дека континуираната поддршка од Португалската Република за интеграцијата на земјите од регионот во европските структури, а во тие рамки и на нашата држава, секогаш била од голема важност, Сиљановска Давкова истакна дека е значајно истата да продолжи со уште поголем интензитет во периодот којшто следи.
„Заслужуваме да ги отпочнеме преговорите за пристапување во ЕУ без натамошно одложување. Сакам да повторам дека и јас и Владата остануваме целосно посветени на неопходните реформи поврзани со нашата интеграција во ЕУ. Сепак, овој процес мора да се спроведе во согласност со критериумите од Копенхаген. Ако нашиот процес на интеграција во ЕУ не се дебилатеризира, верувам дека тоа ќе постави штетен преседан за сите идни земји кандидати. Другите држави можат да користат билатерални спорови како изговор за блокада на патот на земјите кандидати“, рече претседателката Сиљановска Давкова.
Португалскиот амбасадор Жозе Руи Вележ Каросо во своето обраќање истакна дека заедничките вредности што ги обединуваат двете земји, како и соработката во рамки на НАТО, во корист на евроатлантската безбедност, се од особено значење за обезбедување на слободата и демократијата. Тој нагласи дека Португалија целосно го поддржува влезот на нашата земја во ЕУ, како и на другите земји кандидати од Западен Балкан додавајќи дека со реформската агенда и Планот за раст, ова е момент на можност за сите кој не треба да се пропушти.
„Во овие времиња на предизвици со кои сега се соочуваме на глобално ниво, со агресивната војна во Украина и конфликтот на Блискиот Исток, како и со многу други штетни, насилни и страшни трагедии ширум светот, императив е заеднички да се бранат правдата и мирот, со мултилатерална перспектива, според принципите на Повелбата на Обединетите нации“, рече новоименуваниот португалски амбасадор на церемонијата на предавање на акредитивите.
Претседателката Сиљановска Давкова на амбасадорот Жозе Руи Вележ Каросо му посака успех во извршувањето на одговорната функција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во избришаната порака не пишувало „кажете само колку пари треба“, туку „полицијата не презема ништо, тврди дека Вања е избегана“, уверува Туфегџиќ
По денешното судење за убиствата на 14-годишната Вања Ѓорчевска и Панче Жежовски, адвокатот на таткото на Вања, Владимир Туфегџиќ, укажа дека полицискиот началник Дејан Димовски во сведоштвото не дал доказ дека татакото на Вања избришал порака на „Вибер“, во која зборувал за пари што бил спремен да ги даде. Началникот Димовски, објаснувајќи зошто се посомневале во таткото на Вања, Александар Ѓорчевски, рече дека една од причините била избришана порака во група на „Вибер“, која некои родители ја виделе и на полицијата ѝ кажале дека гласела „кажете само колку пари треба“.
„Началникот бил должен да спроведе целокупна постапка и да достави доказ дека тоа е така. Тој денес потврди дека, освен избришана порака, таква содржина во вибер-група меѓу другите родители нема. Кажува свои претпоставки што ги добил како сознание од други родители, па сега јас поставувам прашање, па зошто не е опфатен некој од тие родители денеска да биде дел од постапката. Тврдам, се знае и кој е родителот и кое е лицето. Александар има комуникација на прашање од тоа лице како загрижен родител, одговара на прашање и одлучува по ова, да ја избрише комуникацијата бидејќи смета, вели и самиот, да не сфати полицијата дека ја попречува истрагата. Тоа е лична комуникација во вибер-групата, од која се издвојува еден родител и упатува прашање, на кое тој одговара и потоа одлучува да ја избрише пораката, како што и самиот ми кажа – ‘за ако прочита полицијата, да не ми забележат дека ја опструирам постапката’. Инаку, неговиот одговор е баш така, децидно: што преземаат? – ‘ништо, тврдат дека Вања е избегана’“, рече адвокатот Туфегџиќ во изјава за медиумите по судењето.
Адвокатот тврди дека таткото на Вања, Александар, и неговиот кум Гоце Трајковски, три дена пред полицијата да дознае за смртта на Панче Жежовски побарале снимка од бензинска станица во Велес оти таткото на Вања се раководел од лични чувства, а пријателите од „Сејв сити“ им посочиле дека на снимката има автомобил што се бара, па затоа ја побарале и ја предале на полицијата. Туфегџик вели дека таа снимка е клучна за откривање на целиот случај.
„Јас лично тврдам, да не биле вклучени овие двајца луѓе, ние и денеска ќе имавме состојба при што Панче и Вања ќе се водеа за исчезнати и немаше да бидат пронајдени и во тоа сум сигурен“, рече адвокатот Туфегџиќ.
Ставот на одбраната е дека полицијата постапувала, без да следи правила и стандарди за постапување во вакви случаи, постапувале според свои видувања, а денешното сведочење на началникот го потврдило тоа.
Туфегџик сведоштвото на началникот го оцени како контроверзен исказ за кој ќе приговараат како одбрана, а по сослушувањето на таткото на Вања, за целосно расчистување на работите, ќе побараат негово соочување со началникот и неговиот колега, со кои бил во постојан контакт.
Македонија
Мицкоски: Јотова советите да ги упати до бугарските власти да дозволат Македонците да се организираат во невладини
Во однос на изјавата на бугарската потпретседателка Илијана Јотова, која ги повика македонските власти „да ги читаат европските вредности со поголемо разбирање“, премиерот Христијан Мицкоски рече дека постојат, за жал, земји членки на ЕУ што не ги почитуваат европските вредности.
„Колку што сум информиран, апсолутно ние како држава ги почитуваме и постапуваме доколку постојат такви пресуди од институцијата која е одговорна да носи одлуки за почитување и непочитување на човековите права, тоа е Судот за човекови права во Стразбур. За жал, имаме земји членки во Европа што имаат десетици такви пресуди што не ги почитуваат. Претпоставувам тоа ќе важи и за земјите членки, не само за кандидатите. Јас би сакал да ја упатам Јотова овој совет да го даде и кон тие земји членки кои треба, конечно, да ги почитуваат и кои се испречени пред можни санкции за почитување на човековите права. Еве имаме такви 14 пресуди за македонската заедница во Бугарија. Еве ги повикувам истите овие што ни даваат нам совет да ги советуваат и бугарските власти да може да дозволат македонската заедница барем да се организира во невладини организации. Ние не бараме да бидеме дел од Уставот, барем од тоа што таму сум го слушнал, туку да се организираат во невладини организации. Тоа е нешто што може да го направат во таа насока бидејќи јас колку што знам, Бугарија како држава е потписник на Резолуцијата за заштита на човековите права. Така некако би бил мојот коментар“, рече Мицкоски.
Македонија
Лавров: Нема ништо од нуклеарното оружје на Украина, тоа е луда идеја
Рускиот министер за надворешни работи Сергеј Лавров ги нарече луди оние во Киев што зборуваат за можноста за создавање нуклеарно оружје во најкус можен рок.
Тој ги коментира публикациите што се појавија во западните медиуми, во кои, повикувајќи се на украински претставници, се наведува дека Киев може да создаде нуклеарно оружје за неколку недели, пренесе ТАСС.
„Будали и, се разбира, ништо нема да излезе од ова, под никакви околности, но Зеленски веќе, според мене, веројатно се разбуди и стана на левата нога“, изјави рускиот министер за надворешни работи на прес-конференција во Истанбул.