Македонија
Сиљановска-Давкова: Родовата еднаквост не е само статистика, таа е реална слика на општествената стварност

Претседателката Гордана Сиљановска-Давкова се обрати на статистичката конференцијата „25 години родови податоци“ којашто се одржа во организација на Државниот завод за статистика, во партнерство со канцеларијата на UN Women и амбасадата на Кралството Шведска во земјава.
Честитајќи го значајниот јубилеј, претседателката изрази благодарност за континуираната професионалност, непристрасност и посветеност на општествената реалност и на вистината. Таа истакна дека како жена, како претседателка и како застапничка за еднаквост, знае колку е важно да постојат точни податоци коишто зборуваат за сите нас, не само за натпретставените, туку и за маргинализираните кои предолго биле невидливи за македонскиот општествен радар.
За неа, родовата еднаквост не е само статистика, не е море од бројки на хартија, туку е реална слика на општествената стварност, резултат што може да се постигне само со здружен општествен напор, со солидарност и постојано учење едни од други, но и едни за други. Таа е наш заеднички влог за порамноправно, похумано и понапредно општество.
Сиљановска-Давкова порача дека е потребно да создадеме држава во која сите ќе бидеме свесни дека секој податок одразува нечиј живот, секоја бројка раскажува индивидуална, вистинска човечка приказна, а трудот на секој човек, без разлика на полот и родот, треба да биде еднакво вреднуван, сечиј глас слушнат, без оглед дали е гласен или е тивок.
Со конференцијата се одбележаа 25 години од систематско собирање на родови податоци во државава и претставува дел од низата настани во рамки на одбележувањето на јубилејот – 80 години од основањето на македонскиот Државен завод за статистика.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)
Македонија
Претежно облачно со повремен дожд

Времето денеска ќе биде променливо облачно со повремени локални врнежи од дожд. Кон крајот на денот врнежите насекаде ќе престанат. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 6 до 13, а максималната ќе достигне од 8 до 16 степени.
Во Скопје, претежно облачно со повремен дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Од четврток времето ќе биде стабилно и суво со слаб до умерен северен ветер. Дневната температура ќе биде во пораст.