Македонија
Сиљановска и американската амбасадорка разговараа за ЕУ: „Поцесот не смее да трпи притисоци од други земји-членки“
![](https://makfax.com.mk/wp-content/uploads/2024/06/siljanovska-ageler.jpg)
Претседателката Гордана Сиљановска Давкова денеска ја прими амбасадорката на Соединетите Американски Држави, Анџела Агелер.
На средбата беше разговарано за можностите за засилување на соработката меѓу двете земји, за македонските евроатлантски интеграции, како и за потенцијалите кои ги нуди Стратешкиот дијалог за конкретизирање на билатералната соработка меѓу двете земји.
Претседателката Сиљановска Давкова се заблагодари за севкупната поддршка од САД и ја истакна подготвеноста за натамошно продлабочување на македонско-американското пријателство и меѓусебна поддршка во насока на реализирање на македонските надворешно-политички цели.
Во тој контекст, претседателката истакна дека како стабилен партнер и докажан сојузник на САД во НАТО Алијансата, остануваме фокусирани на заедничките определби за безбедност, слобода и демократски просперитет, со активно учество во заедничките активности во борбата против тероризмот и другите закани врз мирот во светот.
Потенцирајќи дека евроинтеграциите имаат позитивно влијание за демократската и економската консолидација на земјите од регионот, претседателката ја истакна потребата од забрзана европска интеграција. Во таа насока, таа посочи дека пристапниот процес за членство во ЕУ, мора да биде мериторно валоризиран и не смее да трпи политички притисоци од страна на други земји членки.
На средбата претседателката ја потенцираше улогата и поддршката од САД во интензивирање на реформските процеси и истакна дека земјава и понатаму останува посветена на спроведување на реформите во владеењето на правото, борбата против корупцијата и реформите во безбедносниот сектор, како едни од нашите највисоки приоритети.
Двете соговорнички разменија мислења за исходот од Самитот за мир во Украина, за влијанијата и безбедносните случувања во регионот, како и за политиките во интерес на гарантирање на мирот, стабилноста и просперитетот на поширокиот регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Мицкоски на средба со евроамбасадорот Гир: Владата ќе продолжи да работи заедно со ЕУ во духот на партнерството и заедничките вредности
![](https://makfax.com.mk/wp-content/uploads/2024/06/27062024_SREDBA_MICKOSKI_GIR-3.jpg)
Претседателот на Владата Христијан Мицкоски, денеска оствари средба со Амбасадорот на Европската Унија во Северна Македонија, Дејвид Гир.
На средбата беа разменети мислења и ставови за тековните политички и економски прашања, како и за напредокот на државата кон интеграцијата во Европската унија.
Мицкоски ја истакна важноста на поддршката од Европската унија за реформските процеси и стабилноста на земјата, констатирајќи дека Владата ќе продолжи да работи заедно со ЕУ во духот на партнерство и заеднички вредности.
Амбасадорот Гир ја потврди посветеноста на Европската унија за продолжување на одличната соработка со Северна Македонија и изрази подготвеност за поддршка во клучните реформи и проекти што се предвидени во наредниот период.
Средбата заврши со согласност за натамошно зајакнување на билатералните односи и интензивирање на соработката во различни области од заеднички интерес.
Македонија
Косоварска платформа – соработник на Курти ќе биде вицепремиер во Владата на ДПМНЕ, велат од Левица
![](https://makfax.com.mk/wp-content/uploads/2024/06/IMG_20240627_144538_955.jpg)
Арбен Фетаи – поранешен соработник на косовската Влада, е избран за Вицепремиер за Добро владеење од страна ДПМНЕ, ВРЕДИ и ЗНАМ, на предлог од необалистот Арбен Таравари. Неговите професионални ангажмани никогаш не биле поврзани со Македонија, а на јавноста и е познат по долгогодишното работење за косовскиот премиер Албин Курти, кој е отворен промотор на великоалбанската идеја, велат од Левица.
„Парламентарниот состав на ДПМНЕ за Вицепремиер избра кадар кој не знае македонски јазик, ниту пак живее во Македонија! Професионалната политичка кариера на Фетаи секогаш му била врзана за интересите на косовските Албанци, додека националистичките политики секогаш ги водел заедно со најголемиот промотор на великоалбанската идеја, којшто минатата година вееше вакво знаме во Тетово – Албин Курти. Кадровски решенија за кои сведочиме изминативе денови, не можат да се гледаат поинаку, освен како кадровски адути кои треба да ја спроведат т.н. Косовска платформа! Сѐ поочигледно е дека функционерите донесени на власт се стремат да ја нормализираат горе споменатата необалистичка реторика и спроведуваат иредентистичка политика со одредени европски примеси, кои овде се „претставуваат“ како некаква вредност“, дополнуваат од Левица.
Според партијата Левица, токму ваквата реторика е намерена во дискурсот да ја придвижи идејата за федерализација на државата.
„Целта за поткопување на унитарниот карактер на државата, оди паралелно со притисоците од бугарска страна, а ваквиот избор на кадровски решенија се само машата преку која се насочува реализацијата на погубните политики кон Македонија, кои надворешни центри ги спроведуваат преку директна партиципација во новиот владин состав. Сметаме дека кадровските решенија кои поседуваат државјанство на друга држава, можат да бидат закана за државните и национални интереси на Македонија. Ја потсетуваме јавноста дека Левица во својата програма се залага лица со две или повеќе државјанства да не можат да бидат кандидирани, бирани или именувани на било која јавна или раководна функција, во сите нивоа на централната и локалната власт, токму за спречување на вакви политички појави“, завршуваат од Левица.
Македонија
Рустеми: Тврдењата на Николоски се неточни и се со впечатлива политичка позадина, стоиме на располагање за сите видови проверки
![](https://makfax.com.mk/wp-content/uploads/2020/10/122020048_2821788098053198_956484644172381361_n.jpg)
Директорот на ЈПДП, Ејуп Рустеми ги оценува како „неточни и неосновани“ вчерашните тврдења на министерот за транспорт и врски, Александар Николоски околу тоа како се трошеле државните пари и зошто не се готови почнатите проекти. Според Рустеми, ова се прави „со впечатлива политичка позадина“.
Како што тврди, за сите реализирани проекти, од страна на ЈПДП и менаџментот, испочитувани се сите законски процедури, за коишто има и соодветна документација.
-Проект за изградба на автопат, патна делница Кичево-Охрид. Вредноста на договорот е зголемена со Закон за изменување и дополнување на Законот за реализација на инфраструктурните проекти, за изградба на патна делница Миладиновци- Штип и патна делница Кичево-Охрид, објавен во Службен весник бр.208 од 14.11.2018 година. Проект втора делница ТЕН-Т проект за автопат од Скопје до граница Косово, проценетата вредност од 112 милиони евра е зголемена на 198 милиони евра од страна на независна техничка консултантска куќа – Аткинс, ангажирана од ЕБОР, во соработка со проектантот Конзорциумот Хил Интернешнл, избран преку ИПФ 7 со грант од Европска комисија. При изборот на консултантската куќа и проектантот, ЈПДП немал и не може да има никакво влијание.
Проект во ИПА II – Изградба на патна делница Градско-Дреново.
Потенцираме дека во ИПА оперативната структура Министерство за финансии – ЦФЦД ги има обврските на “Договорен орган”, додека Министерството за транспорт и врски е “корисник”, а Јавното претпријатие за државни патишта е “краен корисник”, стои во соопштението.
Рустеми тврди дека стои на располагање на сите надлежни институции за секаков вид на проверки и ревизии на нивното работење како државно претпријатие.
-Апелираме да не се изнесуваат невистини и шпекулации во јавноста поврзани со работењето на ЈПДП и неговиот менаџмент, затоа што ваквите невистини штетат на угледот на самото претпријатие, на раководните лица и на сите вработени, велат меѓу другото од ЈПДП.
И државниот ревизор излезе со критики за капиталните инвестиции во изминатите години. Во извештајот нотираа дека недостигаат точни податоци за јавните инвестиции, а проектите се одвивале бавно или не се реализирале.
Според Николоски, за автопатот Кичево-Охрид, вредноста е зголемена за дури 175 милиони евра, со тие пари вкупно се потрошени 446 милиони и по 10 години, ништо не е завршено. Слична е ситуацијата и со железничката пруга, Коридор 8.