Советот на Апелациониот суд во Скопје, составен од судиите Татјана Дуковска како претседател на Советот, Тања Милева и Јусуф Ајрулахи, донесоа скандалозно и срамно решение против новинарите Мери Јордановска и Предраг Петровиќ, oцени Здружението на новинарите.

Апелациониот суд во Скопје со решението од 8 ноември ја укина пресудата на Основниот кривичен суд во Скопје и го врати предметот на повторно судење. Станува збор за приватната кривична тужба на пратеникот и претседател на политичката партија Левица, Димитар Апасиев, против колешката Јордановска и колегата Петровиќ и правното лице „Онлајн медија“ ДОО од Скопје за кривичното дело неовластено објавување лични записи.

Повод за тужбата на Апасиев кон новинарите беше објавениот текст со наслов: „’Сороспии’ и ‘курирци’ – Апасиев агресивен кон новинарите на „А1он“ кога беше запрашан дали ќе ги задржи буџетските пари“, објавен на 7 декември 2020 година на онлајн-медиумот „А1он“.

ЗНМ потсетува дека во постапката за овој случај, која траеше речиси една година, тужителот не се појави лично ниту еднаш на судска расправа, а новинарите повеќепати присуствуваа на расправи во судот, каде што ја застапуваа својата одбрана. Основниот кривичен суд Скопје пресуди во полза на новинарите во февруари оваа година, а со решението скопска Aпелација го враќа на повторно судење и новинарите веќе имаат покана за рочиште овој месец.

Ваквите одлуки на судиите од Апелациониот суд во Скопје и ваквата судска пракса, кога станува збор за приватни тужби на лидери на партии и пратеници кон новинари, негативно се одразува на слободата на изразување и поттикнува самоцензура.

„Повторно укажуваме дека ваков вид тужби служат да се предизвика заплашување и разни трошоци или, едноставно, исцрпување на тужените новинари. Целта не е да се добие правда, туку да се малтертираат тужените со цел да се демотивираат или да се откажат од јавна критика. Ваквите тужби во контекст на Советот на Европа се познати како стратешки тужби за спречување јавно учество (SLAPP). Овие тужби, особено кога се иницирани од политичари и носители на јавни функции, може да предизвикаат цензура кај новинарите, а со тоа да се наруши правото на информирање на граѓаните“, велат од Здружението на новинарите.

ЗНМ за ова решение на скопска Апелација ќе ја извести Европската федерација на новинарите (ЕФН), каде што ЗНМ е членка и ќе укаже дека станува збор за притисок преку судот на слободното новинарство.